DAMU an maaram nga hi Jesus may-ada 12 nga apostol. Pero bangin diri hira maaram nga may mga disipulo gihap hiya nga kababayin-an nga duok gud ha iya. Usa ha ira hi Juana.—Mat. 27:55; Luc. 8:3.

Ano an papel ni Juana ha ministeryo ni Jesus, ngan ano an aton mahibabaroan tikang ha iya susbaranan?

Hi Juana “asawa ni Cusa, an tinaporan ni Herodes.” Posible nga hi Cusa an tinaporan ha panimalay ni Herodes Antipas. Hi Juana usa han kababayin-an nga gintambal ni Jesus. Upod han iba pa nga kababayin-an, nagbiyahe hiya kaupod ni Jesus ngan han mga apostol.—Luc. 8:1-3.

Igintutdo han Judio nga mga rabi nga an kababayin-an diri sadang makig-upod ha kalalakin-an nga diri nira paryente, asay pa an pagbiyahe kaupod hin kalalakin-an. Ngani, an Judio nga kalalakin-an haros diri nakikiistorya ha kababayin-an. Pero waray ito sunda ni Jesus. Gintugotan niya nga umupod ha ira hi Juana ngan an iba pa nga disipulo nga kababayin-an.

Inupod hi Juana kan Jesus ngan ha iya mga apostol bisan pa kon posible hiya pakarauton han iba. An ngatanan nga naupod kan Jesus kinahanglan magin andam ha paghimo hin mga pagbag-o ha ira adlaw-adlaw nga pagkinabuhi. Kondi may kalabotan hito nga mga sumurunod, hi Jesus nagsiring: “Ini hira nga namamati han pulong han Dios ngan nagbubuhat hito amo an akon nanay ngan an akon kabugtoan.” (Luc. 8:19-21; 18:28-30) Diri ka ba napaparig-on ha paghibaro nga ginpapabilhan gud ni Jesus adton naghihimo hin mga sakripisyo basi makasunod ha iya?

Hi Juana ngan an iba pa nga kababayin-an “naggamit han ira panag-iya” ha pag-asikaso kan Jesus ngan ha mga apostol. (Luc. 8:3) “Diri ginsusumatan ni Lucas an iya magbarasa nga an kababayin-an an nagluluto han pagkaon, naghuhugas han mga plato, ngan naglalaba han mga bado,” siring han usa nga parasurat. “Bangin ginbuhat nira ito . . . , pero diri ito an iginpapasabot ni Lucas.” Posible gud nga gin-gamit han kababayin-an an ira kwarta, panag-iya, o propyedad ha pag-asikaso ha ira mga kaupod.

Hi Jesus ngan an iya mga apostol waray magtrabaho durante han ira mga biyahe para ha pagsangyaw. Salit bangin waray hira panggasto para ha pagkaon ngan iba pa nga panginahanglan han ira grupo nga posible nga naabot hin 20 ka tawo. Bisan kon may mga nag-aabiabi ha ira, an pagdara han Kristo ngan han mga apostol hin “kahon han kwarta” nagpapakita nga diri hira nadepende ha mga pag-abiabi ha ira.  (Juan 12:6; 13:28, 29) Hi Juana ngan an iba pa nga kababayin-an posible nga naghatag hin amot basi mataparan an mga gastos.

May mga nasiring nga an Judio nga kababayin-an imposible magkaada mga panag-iya. Pero iginpapakita han kadungan-dungan nga mga reperensya nga an Judio nga kababayin-an posible magkaada panag-iya ha iba-iba nga paagi: (1) sugad nga panurundon kon namatay an iya tatay nga waray anak nga lalaki, (2) sugad nga propyedad nga iginhatag ha iya, (3) sugad nga kwarta nga makukuha niya kon magdiborsyo hira han iya bana uyon ha ira kontrata ha kasal, (4) sugad nga kwarta ngan/o propyedad tikang ha iya namatay nga bana, o (5) sugad nga personal nga kità.

Waray ruhaduha nga naghatag an mga sumurunod ni Jesus han ira maaakos. Posible nga may mga nagin disipulo hiya nga riko nga kababayin-an. Tungod kay hi Juana asawa o nagin asawa han tinaporan ni Herodes, nasiring an iba nga riko hiya. Riko la nga pariho ha iya an makakaghatag han marahalon nga bado nga waray tinakipan nga iginsul-ot ni Jesus. Usa nga parasurat an nagsiring nga an sugad nga butang “diri maihahatag han asawa han mga parapangisda.”—Juan 19:23, 24.

An Biblia waray espisipiko nga magsiring nga hi Juana naghatag hin pinansyal nga donasyon. Kondi ginbuhat niya an iya mahihimo, ngan may hibabaroan kita nga leksyon tikang hini. An aton iginhahatag sugad nga suporta ha mga buruhaton para ha Ginhadian—o kon mahatag kita o diri—nadepende ha aton. An importante ha Dios, malipayon nga ginbubuhat naton an aton mahihimo.—Mat. 6:33; Mar. 14:8; 2 Cor. 9:7.

Han ginpatay hi Jesus, posible nga presente hi Juana ngan an iba pa nga kababayin-an “nga nag-inupod ngan nag-ataman kan Jesus han nakadto hiya ha Galilea, ngan an damu pa nga kababayin-an nga inupod kan Jesus ngadto ha Jerusalem.” (Mar. 15:41) Han ginkuha an lawas ni Jesus tikang ha kahoy basi ilubong, “an kababayin-an nga nagsinunod ha iya tikang ha Galilea kinadto liwat pagkita han lubnganan, ngan nakita nira an pagbutang didto han iya lawas. Ngan inuli hira basi mag-andam hin mga pahamot ngan maghamot nga lana.” Ini nga kababayin-an—nga ginngaranan ni Lucas nga hira “Maria Magdalena, Juana, Maria nga nanay ni Santiago”—binalik katapos han sabbath ngan nakakita hin mga anghel nga nagsumat ha ira nga ginbanhaw hi Jesus.—Luc. 23:55–24:10.

Posible nga usa hi Juana han mga disipulo, upod na an nanay ngan kabugtoan ni Jesus, nga nagkatirok ha Jerusalem han Pentekostes 33 C.E. (Buh. 1:12-14) Tungod kay an iya bana nagtrabaho kan Herodes Antipas, posible nga hiya an nagsumat kan Lucas han personal nga mga impormasyon mahitungod kan Herodes Antipas, labi na kay hi Lucas la an parasurat han Ebanghelyo nga nag-unabi han ngaran ni Juana.—Luc. 8:3; 9:7-9; 23:8-12; 24:10.

An istorya mahitungod kan Juana nagtututdo ha aton hin mag-opay nga leksyon. Gin-ataman niya hi Jesus ha pinakamaopay nga paagi nga iya mahihimo. Posible gud nga nalipay hiya nga an iya mga donasyon nakabulig kan Jesus, ha mga apostol, ngan ha iba pa nga disipulo ha pagbiyahe ngan pagsangyaw. Gin-asikaso niya hi Jesus ngan nagin maunungon ha iya bisan pa han mga pagsari. Maopay gud nga subaron han Kristiano nga kababayin-an an iya disposisyon.