Ano an Ginhadian han Dios?

ANO an tema han mensahe nga iginsangyaw ni Jesus? Sumala ha iya mismo, ito an Ginhadian han Dios. (Lukas 4:43) Agsob niya unabihon ito ha iya pakiistorya ha mga tawo. Nakawurok ba ito ha ira? Ginpakianhan ba nira hi Jesus kon ano ito nga Ginhadian? Waray. An mga Ebanghelyo waray mag-unabi hito. Kon amo, pamilyar ba hira ha ideya han Ginhadian han Dios?

Ha pagkamatuod, an kadaan nga Kasuratan nga gintagad han mga Judio nga baraan naghulagway hito nga Ginhadian, ngan matin-aw ngan klaro nga nagsusumat kon ano ito ngan kon ano an hihimoon hito. Yana, mas damu pa an aton mahibabaroan mahitungod ha Ginhadian pinaagi ha paggamit han Biblia pariho han ginbuhat han mga Judio. Aton paghisgotan an pito nga kamatuoran nga igintututdo ha aton han Biblia mahitungod han Ginhadian. An siyahan nga tulo nabasa na han mga Judio ha panahon ni Jesus ngan antes pa hito. An sunod nga tulo iginsumat ni Kristo o han iya mga apostol han siyahan nga siglo. Ngan an ultimo nagin matin-aw ha aton panahon.

1. An Ginhadian han Dios tinuod nga gobyerno nga magpapabilin tubtob ha waray kataposan. An siyahan nga tagna ha Biblia nagsusumat nga an Dios magpapadara hin paratalwas ha magtinumanon nga katawohan. Ini nga Usa, nga tinatawag nga “binhi,” magwawara han ngatanan nga kakurian nga nagtikang han nagrebelde hira Adan, Eva, ngan Satanas. (Genesis 3:15, NW) Paglabay hin mga panahon, an matinumanon nga hi Hadi David ginsumatan hin makalilipay nga impormasyon mahitungod han  “binhi,” o Mesias. Magmamando hiya hin Ginhadian. Ini nga Ginhadian maiiba ha ngatanan. Magpapadayon ito tubtob ha waray kataposan.—2 Samuel 7:12-14.

2. An Ginhadian han Dios magbubungkag han ngatanan nga gobyerno han tawo. Hi propeta Daniel gintagan hin bisyon diin nakita niya an pagkasunod-sunod han mga gahum ha kalibotan tubtob ha aton panahon. Tigamni an makalilipay nga pungkay hito nga bisyon: “Ha mga adlaw hito [nga ultimo nga tawhanon] nga kahadian an Dios ha langit magpapabangon hin usa nga ginhadian, nga diri gud magugunaw, diri man an kagamhanan hini itatapod ha iba nga katawohan; kondi ini magpipinitpinit ngan mag-aanaw hini ngatanan nga ginhadian, ngan ini matindog ha kadayonan.” Salit, an ngatanan nga ginhadian, o gobyerno, hini nga kalibotan—upod na an girra, panalumpigos, ngan panlimbong hito—bubungkagon ha kadayonan. Sugad han ipinapakita han tagna ni Daniel, an Ginhadian han Dios diri na maiha magmamando ha bug-os nga tuna. (Daniel 2:44, 45) Diri la kay tinuod ini nga Ginhadian, kondi ito la an gobyerno nga maeksister ha tuna. a

3. An Ginhadian han Dios magwawara han mga girra, sakit, gutom, bisan han kamatayon. An makalilipay nga mga tagna ha Biblia nagsusumat kon ano an bubuhaton han Ginhadian han Dios dinhi ha tuna. Hihimoon hito nga gobyerno an waray mahimo o diri mahihimo han bisan ano nga gobyerno han tawo. Handurawa—waray na an ngatanan nga hinganiban ha kadayonan! “Napaukoy niya an mga pag-away tubtob ha kataposan han tuna.” (Salmo 46:9) Waray na mga doktor, hospital, o sakit. “An umurukoy diri masiring: Ako masakit.” (Isaias 33:24) Waray na gutom, kakulang hin pagkaon, ngan malnutrisyon. “Magkakaada kahuraan hin lugas ha tuna.” (Salmo 72:16) Waray na punerarya, lamay, sementeryo, morge, o kabidoan nga resulta hito. Mawawara na gud an aton diri napupugngan nga kaaway, an kamatayon. “Linamoy [han Dios] ha kadayonan an kamatayon; ngan an Ginoo nga hi Jehova magpapahid han mga luha tikang ha ngatanan nga nawong.”—Isaias 25:8.

4. An Ginhadian han Dios may-ada Magmarando nga Iya pinili. Diri an Mesias an nagpili han iya kalugaringon nga magin Magmarando, diri man hiya pinili la hin diri hingpit nga mga tawo. Personal nga ginpili hiya ni Jehova nga Dios. An titulo nga Mesias ngan Kristo nagpapasabot nga pinili hiya han Dios. Iton duha nga pulong nangangahulogan hin “Dinihogan nga Usa.” Salit, ini nga Hadi dinihogan, o gintokahan ni Jehova hin espesyal nga buruhaton. Mahitungod ha iya, an Dios nasiring: “Kitaa, an akon surugoon, nga akon inalang-agang; akon pinili, nga ikinalilipay han akon kalag: akon iginbutang an akon espiritu dida ha iya; hiya magdadara han kasubayan ngadto ha mga Hentil.” (Isaias 42:1; Mateo 12:17, 18) May-ada ba mas maaram kay ha aton Maglalarang kon ano nga klase hin magmarando an aton ginkikinahanglan?

5. Ginpamatud-an han Magmarando han Ginhadian han Dios ha ngatanan nga tawo nga takos hiya magmando. Ginpamatud-an ni Jesus nga taga-Nasaret nga hiya an igintagna nga Mesias. Natawo hiya ha pamilya nga ginpili han Dios. (Genesis 22:18; 1 Kronikas 17:11; Mateo 1:1) Han nakanhi hiya ha tuna, iya gintuman an damu nga tagna mahitungod han Mesias nga ginatos ka tuig na nga nakarekord. Iginpakilala liwat hiya tikang ha langit sugad nga an Mesias. Ha ano nga paagi? Bueno, an Dios nagyakan tikang ha langit, iginpakilala hiya sugad nga Iya kalugaringon nga Anak; an mga anghel nagsiring nga hi Jesus an igintagna nga Mesias; ngan hiya naghimo hin mga milagro—agsob ha atubangan han ginatos o yinukot pa ngani nga tawo—nga matin-aw nga pinaagi han gahum han Dios. b Pauroutro nga ipinakita ni Jesus kon magigin ano nga klase hiya nga Magmarando. Diri la kay may gahum hiya ha pagbulig, kondi hingyap liwat niya nga buhaton ito. (Mateo 8:1-3) Hiya mahinatagon, mapinairon, maisugon, ngan mapainubsanon. Mababasa han ngatanan ha Biblia an rekord han iya kinabuhi ha tuna.

6. An Ginhadian han Dios may-ada 144,000 nga magmamando kaupod ni Kristo. Hi Jesus nagsiring nga an iba, upod an iya mga apostol, magmamando ha langit kaupod niya. Gintawag niya ini nga grupo nga ‘gutiay nga panon.’ (Lukas  12:32) Ha urhi, ginsumatan hi apostol Juan nga inin gutiay nga panon magkakaada kadamuon nga 144,000. Magkakaada hira makalilipay nga buruhaton ha langit, magmamando hira sugad nga mga hadi ngan mag-aalagad sugad nga mga saserdote kaupod ni Kristo.—Pahayag 5:9, 10; 14:1, 3.

7. An Ginhadian han Dios nga nagmamando na yana ha langit, andam na liwat ha pagmando ha bug-os nga tuna. Inin ikapito nga kamatuoran usa han pinakamakalilipay nga aton mahibabaroan. An Biblia naghahatag hin damu nga pamatuod nga iginhatag na kan Jesus an awtoridad sugad nga Hadi ha langit. Nagmamando na hiya didto yana, ha aton panahon, ngan ha diri na gud maiha ipapadangat niya an iya pagmando ha bug-os nga tuna ngan ipapatuman an makalilipay hinduro nga tagna nga aton na gin-unabi. Kondi, paonan-o kita makakasiguro nga nagmamando na yana an Ginhadian han Dios? Ngan san-o ito magtitikang pagmando ha bug-os nga tuna?

[Mga footnote]