Ha Amon mga Magbarasa

NALILIPAY kami ha pagpahibaro ha iyo nga tikang hini nga gowa han An Barantayan, magkakaada mga pagbag-o. Antes namon isaysay an mga pagbag-o, amon anay isusumat an diri magbabag-o.

An ngaran hini nga magasin, An Barantayan Nagsasamwak han Ginhadian ni Jehova, diri magbabag-o. Salit, magpapadayon ito ha pagpasidungog kan Jehova sugad nga matuod nga Dios ngan ha pagliaw han mga magbarasa hito pinaagi han maopay nga sumat han iya Ginhadian. An mga artikulo ha pahina 5 tubtob 9 hini nga gowa naghihisgot kon ano ito nga Ginhadian ngan kon san-o ito maabot. Dugang pa, magpapadayon ito ha pag-aghat han pagtoo kan Jesu-Kristo, pagsuporta han kamatuoran ha Biblia, ngan pagsaysay han kahulogan han mga panhitabo ha kalibotan ha bulig han mga tagna ha Biblia, sugad han ginbubuhat hito ha damu na ka dekada.

Ano, kon sugad, an magbabag-o? Paghisgotan naton an pipira nga makapainteres nga bag-o nga bahin han ika-1 nga edisyon han kada bulan. a

Hini nga edisyon, may-ada pipira nga artikulo nga nakakaaghat hin hilarom nga paghunahuna. An artikulo nga “Maaram Ka Ba?” maghahatag hin makapainteres nga impormasyon nga magsasaysay han kahulogan han pipira nga asoy ha Biblia. An “Magin Duok ha Dios” maghihisgot han aton mahibabaroan mahitungod kan Jehova tikang ha espisipiko nga mga teksto ha Biblia. An “Pakiana han Magbarasa” magbabaton han komon nga mga pakiana may kalabotan han Biblia. Pananglitan, damu an nagpapakiana, “An Ginhadian ba han Dios aada ha imo kasingkasing?” Mababasa mo an baton hito ha pahina 13.

May pipira nga artikulo nga regular nga makikita dinhi hini nga edisyon nga gindisenyo para ha kapulsanan han pamilya. Mababasa ha artikulo nga “Mga Yawi ha Kalipayan han Pamilya,” an tinuod nga panhitabo ha pamilya nga nagpipresenta hin mga problema ngan mga paagi kon paonan-o an mga prinsipyo ha Biblia makakabulig ha pagsulbad hito. An “Tutdui an Imo mga Anak,” usa nga artikulo nga sadang basahon han mga kag-anak ha ira mga anak. Usa pa nga makapainteres nga artikulo amo an “Para ha mga Batan-on.”

May pipira nga dugang nga artikulo nga mababasa dinhi hini nga edisyon. An artikulo nga “Subara an Ira Pagtoo” magdadasig ha aton nga subaron an ehemplo han usa nga tawo nga ginhihisgotan ha Biblia. Pananglitan, ha pahina 18 tubtob 21 hini nga gowa, mababasa mo an makapabantad nga asoy mahitungod kan propeta Elias ngan mahibabaroan kon paonan-o naton masusubad an iya pagtoo. Ipipresenta han artikulo nga “Surat Tikang . . .” an report han mga misyonero ngan han iba ha magkalain-lain nga bahin han kalibotan. Hihisgotan han “Kon Ano an Aton Nahibabaroan Tikang kan Jesus” an basihan nga mga katutdoan ha Biblia ha simple nga paagi.

Sigurado kami nga An Barantayan padayon nga maruruyagan han mga magbarasa nga natahod han Biblia ngan naruruyag nga mahibaro kon ano gud an igintututdo hito. Naglalaom kami nga ini nga magasin mabulig ha imo ha pagtagbaw han imo hingyap ha kamatuoran han Biblia.

AN MGA NAGPUBLIKAR

[Footnote]