San-o Maabot an Ginhadian han Dios?

“GINOO, pahihiulion mo ba an ginhadian ngadto ha Israel hini nga panahon?” (Buhat 1:6) Karuyag gud mahibaroan han mga apostol kon san-o ig-iestablisar ni Jesus an iya Ginhadian. Yana, paglabay hin mga 2,000 ka tuig, an mga tawo naruruyag pa gihapon mahibaro: San-o maabot an Ginhadian han Dios?

Tungod kay an Ginhadian amo an tema han mensahe nga iginsangyaw ni Jesus, bangin maghunahuna ka nga ginhisgotan niya ini nga pakiana. Oo, ginhisgotan gud niya ito! Damu ka beses nga nag-istorya hiya mahitungod hin espisipiko nga peryodo hin panahon nga iya gintawag nga iya presensya. (Mateo 24:37) a Ito nga presensya may-ada gud kalabotan ha kaestablisar han Ginhadian han Dios nga pagdudumarahon ni Jesus. Ano ito nga presensya? Aton paghisgotan an upat nga kamatuoran nga iginsasaysay han Biblia mahitungod han presensya ni Kristo.

1. An presensya ni Kristo maiha pa nga magtitikang katapos han iya kamatay. Hi Jesus naghatag hin ilustrasyon diin iginpariho niya an iya kalugaringon ha tawo nga “linakat ha hirayo nga lalawigan pagkarawat hin usa nga ginhadian.” (Lukas 19:12) Ha ano nga paagi natuman iton matagnaon nga ilustrasyon? Bueno, hi Jesus namatay ngan nabanhaw; katapos sugad hin kinadto hiya ha “hirayo nga lalawigan,” nga amo an langit. Sugad han iya igintagna ha pariho nga ilustrasyon, an iya pagbalik sugad nga hadi mahitatabo la “katapos hin kamaihaan nga panahon.”—Mateo 25:19.

 Paglabay hin pipira ka tuig katapos sumaka hi Jesus ha langit, hi apostol Pablo nagsurat: “Hiya [hi Jesus], ha katapos niya paghalad hin usa nga halad ha waray kataposan, tungod ha mga sala, naglingkod ha too nga kamot han Dios; tikang hadto hiya naghihinulat nga an iya mga kaaway himoon nga turumbanan han iya mga tiil.” (Hebreo 10:12, 13) Salit han binalik na hi Jesus ha langit, naghulat hiya hin maiha nga panahon. Natapos an paghulat han ginhimo hiya ni Jehova nga Dios nga Hadi han maiha na nga iginsaad nga Ginhadian. Hito nga takna nagtikang an presensya ni Kristo. Makikita ba han mga tawo ha tuna inin makatirigamnan nga panhitabo?

2. An presensya ni Kristo diri makikita han mga tawo. Hinumdumi nga iginsaysay ni Jesus an tigaman han iya presensya. (Mateo 24:3) Kon nakikita han mga tawo an iya presensya, pagkikinahanglanon pa ba an tigaman? Ha pag-ilustrar: Handurawa nga nagbibiyahe ka basi makita an kadagatan. Samtang nagbibiyahe, bangin kumita ka hin mga karatola nga maggigiya ha imo, kondi kon aadto ka na ha baybayon ha atubangan han kadagatan, naglalaom ka pa ba nga kumita hin karatola nga may daku nga surat nga “Dagat”? Syempre diri! Kay ano nga magbutang pa hin karatola kon nakikita mo na ito?

Iginhulagway ni Jesus an tigaman han iya presensya, diri basi unabihon an nakikita han mga tawo, kondi basi buligan hira nga hisabtan an mahitatabo ha langit. Salit, hiya nagsiring: “An ginhadian han Dios diri makanhi nga magpapasabot.” (Lukas 17:20) Kon sugad, paonan-o mahibabaroan han mga aanhi ha tuna nga nagtikang na an presensya ni Kristo?

3. An presensya ni Kristo matitigamnan hin panahon han duro nga kakurian dinhi ha tuna. Hi Jesus nagsiring nga an iya presensya ha langit sugad nga Hadi matitigamnan hin mga girra, gutom, linog, sakit, ngan karaotan. (Mateo 24:7-12; Lukas 21:10, 11) Ano an hinungdan hini ngatanan? An Biblia nasiring nga hi Satanas, an ‘punoan hini nga kalibotan,’ daku an kasina tungod kay maaram hiya nga halipot na hinduro an iya panahon yana nga nagtikang na an presensya ni Kristo. (Juan 12:31; Pahayag 12:9, 12) Damu an sugad nga dayag nga ebidensya han kasina ni Satanas ngan han presensya ni Kristo ha aton panahon. Labi na tikang han 1914, an tuig nga gintatagad han mga historyador nga may daku hinduro nga pagbag-o, nga ini nga ebidensya nahitabo ha waray kapariho nga sukol ngan ha bug-os nga kalibotan.

Baga hin maraot ito ngatanan nga sumat, kondi diri ito sugad. Nangangahulogan ito nga an Ginhadian nagmamando na yana ha langit. Diri na gud maiha, magmamando na ito ha bug-os nga tuna. Kondi, ha ano nga paagi mahibabaro an mga tawo mahitungod hito nga Ginhadian basi makarawat an pagmando hito ngan magin sakop hito?

4. An presensya ni Kristo matitigamnan han pagsangyaw ha bug-os nga kalibotan. Hi Jesus nagsiring nga an iya presensya magigin pariho “han mga adlaw ni Noe.” b (Mateo 24:37-39) Diri la hi Noe parahimo hin arka; “parawali [liwat  hiya] han katadongan.” (2 Pedro 2:5) Iya ginpahamangnoan an mga tawo nga may tiarabot nga paghukom an Dios. Hi Jesus nagsiring nga sugad liwat hito an bubuhaton han iya mga sumurunod ha tuna durante han iya presensya. Hiya nagtagna: “Ini nga maopay nga sumat han ginhadian igwawali ha bug-os nga kalibotan ha pagpamatuod ha ngatanan nga mga nasud; ngan niyan an kataposan maabot.”—Mateo 24:14.

Sugad han aton hinbaroan ha nauna nga artikulo, bubungkagon han Ginhadian han Dios an ngatanan nga gobyerno ha kalibotan. An pagsangyaw nga buruhaton nagpapahamangno ha mga tawo nga hirani na gumios inin langitnon nga gobyerno, nga naghahatag hin higayon ha ngatanan nga makatalwas ha tiarabot nga kabungkagan ngan magin sakop hito nga Ginhadian. Salit, ini an importante nga pakiana, Ano an imo bubuhaton?

Magigin Maopay ba nga Sumat Para ha Imo an Ginhadian han Dios?

An mensahe nga iginsangyaw ni Jesus nagpapahayag hin paglaom nga waray kapariho. Katapos han pagrebelde ha Eden yinukot ka tuig na an naglabay, determinado hi Jehova nga Dios nga iestablisar an gobyerno nga magtatadong han ngatanan, ngan iya ibabalik an magtinumanon nga tawo ha kahimtang nga iya karuyag para ha katawohan tikang pa ha tinikangan—an kinabuhi nga waray kataposan ha paraiso dinhi ha tuna. May-ada pa ba mas makalilipay kay ha paghibaro nga nagmamando na yana ha langit inin maiha na nga iginsaad nga gobyerno? Diri ito waray klaro o diri matin-aw nga ideya kondi usa nga kamatuoran!

Yana, an ginpili han Dios nga Hadi nagmamando ha butnga han iya mga kaaway. (Salmo 110:2) Hinin maraot nga kalibotan nga nagpahirayo ha Dios, ginbubuhat han Mesias an karuyag han iya Amay nga pamilngon an ngatanan nga naruruyag mahibaro mahitungod ha Dios ngan kon hin-o gud hiya, ngan magsingba ha Iya “ha espiritu ngan ha kamatuoran.” (Juan 4:24) An paglaom nga magkinabuhi ha waray kataposan nga sakop han pagmando han Ginhadian han Dios abrido ha mga tawo han ngatanan nga nasyonalidad, pangidaron, ngan kahimtang ha kinabuhi. (Buhat 10:34, 35) Gin-aaghat ka namon nga karawaton iton maopay hinduro nga higayon nga igintatanyag ha imo. Pag-aram mahitungod ha Ginhadian han Dios yana basi makapahimulos ka ha pagkinabuhi ilarom han matadong nga pagmando hito ha waray kataposan!—1 Juan 2:17.

[Mga footnote]

[Retrato ha pahina 8]

An magraot nga sumat nga aton nababatian kada adlaw nagpapamatuod nga hirani na umabot an maopay nga kahimtang

[Ginkuhaan han Retrato]

Antiaircraft gun: U.S. Army photo