Magin Duok ha Dios

“Magsubad Kamo ha Dios”

Efeso 4:32–5:2

KALOOY. Pagpaid. Pagpasaylo. Gugma. Makasurubo nga talagsa na la yana an nagpapakita han sugad nga mga kalidad. Kumusta ka man? Inabat ka na ba nga bisan pa han duro nga pangalimbasog, diri mo gud makukultibar ini nga mga kalidad? Tungod han pagin kritiko ha kalugaringon, mahimo ka maghunahuna nga imposible an pagkultibar hin makaruruyag nga mga kalidad tungod kay may mga ulang sugad han nakagamot na nga magraot nga kinaiya o makasurubo nga mga eksperyensya hadto. Kondi, ginpapasarig kita han Biblia nga maaram an aton Maglalarang nga may-ada kita kapas ha pagkultibar hin mag-opay nga mga kalidad.

An Pulong han Dios nagsasagdon ha tinuod nga mga Kristiano: “Magsubad kamo ha Dios, sugad ha mga hinigugma nga anak.” (Efeso 5:1) Makatirigamnan ito nga kapahayagan han pagsarig han Dios ha iya mga magsiringba. Ha ano nga paagi? Ginlarang ni Jehova nga Dios an tawo ha Iya “ladawan,” uyon ha Iya “panagway.” (Genesis 1:26, 27) Nangangahulogan ito nga ginhatagan han Dios an tawo hin mga kalidad nga pariho han iya mga kalidad. a Salit, ha pagsagda han Biblia ha mga Kristiano nga ‘magsubad ha Dios,’ sugad hin hi Jehova mismo an nasiring ha ira: ‘Nasarig ako ha iyo. Maaram ako nga bisan pa han iyo mga kaluyahan, may-ada kamo abilidad nga subaron ako ha pipira nga paagi.’

Ano an pipira han mga kalidad han Dios nga mahimo naton subaron? Ginbabaton ito han konteksto. Kitaa an nahiuna nga bersikulo, nga nag-unabi han kalooy, mahumok nga kasingkasing o pagpaid, ngan pagpasaylo. (Efeso 4:32; 5:1) Katapos, ha bersikulo nga nasunod han sagdon nga subaron an Dios, gin-aghat ni Pablo an mga Kristiano nga mangalimbasog ha pagkinabuhi ha paagi nga nagpapakita hin nagsasakripisyo nga gugma. (Efeso 5:2) Oo, may kalabotan ha pagpakita hin kalooy, kinasingkasing nga pagpaid, bug-os nga pagpasaylo, ngan gugma, may-ada kita gimaopayi nga susbaranan—hi Jehova nga Dios.

Kay ano nga karuyag naton subaron an Dios? Tigamni an marig-on nga hinungdan nga makikita ha mga pulong ni Pablo: “Magsubad kamo ha Dios, sugad ha mga hinigugma nga anak.” Diri ba makapabantad ito? Gintatagad ni Jehova an iya mga magsiringba sugad nga hinigugma gud nga mga anak. Sugad la nga an gutiay nga bata mahimo mangalimbasog nga subaron an iya tatay, sugad man ginbubuhat han tinuod nga mga Kristiano an ngatanan nga ira mahihimo basi subaron an ira langitnon nga Amay.

Diri ginpipirit ni Jehova an mga tawo nga subaron hiya. Ha kabaliktaran, ginpapasidunggan kita niya pinaagi ha paghatag ha aton hin kagawasan ha pagbuot. Salit ikaw an magbubuot kon susubaron mo an Dios o diri. (Deuteronomio 30:19, 20) Kondi, ayaw hingalimti nga may-ada ka kapas ha pagpakita hin mga kalidad nga pariho han mga kalidad han Dios. Syempre, basi masubad an Dios kinahanglan mo anay hibaroan an iya personalidad. An Biblia makakabulig ha imo nga hibaroan an ngatanan nga kalidad ngan pamaagi han Dios, kan kanay personalidad nga diri matupngan nakakadani ha minilyon nga tawo nga magsubad ha iya.

[Footnote]