Magin Duok ha Dios

Hukom nga Pirme Nagbubuhat hin Husto

Genesis 18:22-32

HUSTISYA. Waray pagpasulabi. Waray dinadapigan. Diri ka ba naruruyag hinin mag-opay nga kalidad? Kita nga mga tawo may natural nga panginahanglan nga tratuhon ha makatadunganon nga paagi. Makasurubo, an duro nga kawaray hustisya kalyap yana. Kondi, may usa nga hukom nga takos han aton pagsarig—hi Jehova nga Dios. Pirme hiya nagbubuhat hin husto. Iginpatin-aw ini durante han pag-istorya ni Jehova ngan ni Abraham nga nakarekord ha Genesis 18:22-32. a

Han hi Jehova nagsumat kan Abraham nga Iya uusisahon an kahimtang han Sodoma ngan Gomorra, nabaraka hi Abraham ha kahimtang han mga magtadong nga naukoy didto, upod na han iya umangkon nga hi Lot. Tungod hito, nanginyupo hiya kan Jehova: “Imo pagpapanason an mga magtul-id upod han mga magraot? Bangin la kon didto may-ada kalim-an nga mga magtadong ha sakob han bungto: . . . Diri mo [ba] pagpapasayloon an lugar tungod han kakalim-an nga mga magtadong nga aadto ha sulod hito?” (Bersikulo 23, 24) An Dios nagsiring nga diri niya bubungkagon an mga syudad kon may-ada bisan 50 la nga magtadong didto. Lima pa ka beses nga nanginyupo hi Abraham, sunod-sunod nga gin-inibanan an kadamu tubtob nga nagnapulo na la ito. Ha iya tagsa nga paghangyo, an Dios nasiring nga diri niya bubungkagon an mga syudad kon may-ada didto magtadong nga sugad kadamu han iya hangyo.

Nakikiglantugi ba hi Abraham ha Dios? Diri! Kon ito an iya ginbuhat, makikita unta ha iya an pagpahitaas. Kondi, an paagi han pakiistorya ni Abraham nagpapakita hin pagtahod ngan pagpaubos. Iya pa ngani gintawag an iya kalugaringon sugad nga “tapotapo ngan agbon” la. Dugang pa, an iya mga pulong nagpakita han iya pagsarig ha pagin waray ginpapasulabi ni Jehova. Diri la usa kondi duha ka beses nga nagsiring hiya nga ‘hirayo’ mahitabo nga bungkagon han Dios an magtadong upod han magraot. Iginpahayag hinin matinumanon nga patriarka nga natoo hiya nga ‘an hukom han tuna magbubuhat hin matadong.’—Bersikulo 25.

Husto ba hi Abraham ha iya mga ginsiring? Oo ngan diri. Sayop hiya ha paghunahuna nga may-ada diri maminos napulo nga magtadong ha Sodoma ngan Gomorra. Kondi sigurado nga husto hiya ha pagsiring nga diri gud han Dios “pagpapanason an mga magtul-id upod han mga magraot.” Han bungkagon han Dios ha urhi inin magraot nga syudad, nakapalagiw an matadong nga hi Lot ngan an iya duha nga anak ha bulig hin mga anghel.—2 Pedro 2:7-9.

Ano an igintututdo ha aton hini nga asoy mahitungod kan Jehova? Pinaagi ha pagsumat ha Iya sangkay nga hi Abraham han Iya plano ha pag-usisa han mga syudad, sugad hin gin-aaghat Niya hi Abraham ha pagpahayag han iya pagbati. Katapos, mapailubon nga namati Hiya samtang iginsusumat ni Abraham an iya ginkakabarak-an. (Isaias 41:8) Ha maopay nga paagi, nagtututdo ini ha aton nga hi Jehova mapainubsanon nga Dios—nga nagpapasidungog ngan nagtatahod ha iya mga surugoon ha tuna! Matin-aw, may-ada kita han ngatanan nga hinungdan nga sumarig hin bug-os kan Jehova, an Hukom nga pirme nagbubuhat hin husto.

[Footnote]

[Retrato ha pahina 24]

Nanginyupo hi Abraham para ha Sodoma ngan Gomorra