Pagin “Born Again”—Ito ba an Dalan Tipakadto ha Kaluwasan?

ANO an imo baton ha pakiana, “Born again ka ba?” Minilyon han Kakristianohan ha bug-os nga kalibotan an mabaton hin marig-on nga “Oo!” Para ha ira, an pagin born again o pagin igin-anak utro pangirilal-an han ngatanan nga tinuod nga Kristiano ngan an amo la nga dalan tipakadto ha kaluwasan. Nauyon hira ha gintotoohan han mga lider han relihiyon sugad han teologo nga hi Robert C. Sproul nga nagsurat: “Kon an usa diri ‘born again,’ . . . diri hiya Kristiano.”

Usa ka ba han natoo nga an pagin born again magtutugway ha imo ha dalan tipakadto ha kaluwasan? Kon ito an imo gintotoohan, sigurado nga karuyag mo buligan an imo mga paryente ngan kasangkayan nga mabilngan ito nga dalan ngan makaglakat dida hito. Kondi, basi mahimo ito, kinahanglan nira hisabtan an kaibahan han usa nga igin-anak utro ngan han usa nga waray ig-anak utro. Salit, paonan-o mo isasaysay an kahulogan han pagin born again?

Damu an natoo nga an mga pulong nga “igin-anak utro” o born again nagtutudlok ha usa nga sinsero nga nagsasaad pag-alagad ha Dios ngan kan Kristo. Tungod hito, nabag-o hiya tikang ha pagin waray maopay nga relasyon ha Dios ngadto ha pagin duok ha Iya.

Kon hibabaroan mo nga an Biblia diri nauyon hito, mahipapausa ka ba? Karuyag mo ba hibaroan kon ano gud an igintututdo han Pulong han Dios mahitungod ha pagin born again? Kon uusisahon mo ini hin maopay, sigurado nga magpapahimulos ka. Kay ano? Tungod kay an pagkaada husto nga pagsabot hini makakaapekto han imo kinabuhi ngan han imo ginlalaoman ha tidaraon.

Ano an Igintututdo han Biblia?

Ha bug-os nga Biblia, an mga pulong nga “igin-anak utro” mababasa la ha Juan 3:1-12 (NW), diin ginhuhulagway an makapainteres nga pakig-istorya ni Jesus ha lider hin relihiyon ha Jerusalem. An kabug-osan hini nga teksto mababasa ha kahon ha pahina 4. Gin-aaghat ka namon nga basahon ito hin maopay.

Hito nga mga bersikulo, ginpabug-atan ni Jesus an pipira nga bahin han “bag-o nga katawo.” * Ha pagkamatuod, an iya ginsiring nabulig nga mabaton inin lima nga importante nga pakiana:

◼ Mationan-o kaimportante an pagin born again?

◼ Kita ba an magbubuot kon karuyag naton magin born again?

◼ Ano an katuyoan hito?

◼ Ha ano nga paagi magigin born again an usa?

◼ Ano nga pagbag-o ha relasyon an magigin resulta hito?

Tagdon naton an tagsa hini nga pakiana.

[Footnote]

 [Kahon/Retrato ha pahina 4]

“Kinahanglan Ig-anak Utro Kamo”

“Niyan nakadto an usa nga tawo tumikang ha mga Pariseo, nga an ngaran niya hi Nikodemo, nga puno han mga Judio. Ini nga tawo dinaraon kan Jesus han gab-i, ngan nagsiring ha iya: Rabbi, kami nakilala nga ikaw nakanhi nga magturutdo, nga tikang ha Dios; kay waray usa nga makakahimo han mga katingalahan, nga imo ginbuhat kon diri upod niya an Dios. Hi Jesus nagbaton, ngan siniring ha iya: Matuod, matuod ako nasiring ha imo, nga waray bisan hin-o nga diri ig-anak tikang ha igbaw [“igin-anak utro,” NW] nga sadang makakita han ginhadian han Dios. Hi Nikodemo nasiring ha iya: Oonan-on nga an usa nga tawo ig-anak, nga hiya tigurang na? Sadang ba hiya makasulod liwat ha tiyan han iya iroy, ngan ig-anak? Hi Jesus binaton: Matuod, matuod, ako nasiring ha imo, nga waray bisan hin-o nga diri matawo han tubig ngan han espiritu, nga sadang makasulod ha ginhadian han Dios. An igin-anak han unod, amo man an unod; ngan an igin-anak han espiritu, amo man an espiritu. Diri ka maburong hadton iginsiring ko ha imo: Kinahanglan nga ig-anak kamo tikang ha igbaw [‘ig-anak utro,’ NW]. An hangin, kon diin an iya buot, nahuyop, ngan hinbabatian mo an iya harupoy, kondi diri mo mahibabaroan kon diin tikang, ngan kon diin kadto. Sugad man hito an ngatanan nga ipinanganak han espiritu. Hi Nikodemo nagbaton ngan siniring ha iya: Oonan-on an kahimo hini? Hi Jesus nagbaton, ngan siniring ha iya: Ikaw magturutdo ha Israel, ngan waray mo ini hibaroi? Matuod, matuod, ako nasiring ha imo, nga nayakan kami hadton amon hinbabaroan, ngan nagpapamatuod hadton amon hinkit-an; ngan waray kumarawat han amon pagpamatuod. Kon iginsumat ko ha iyo an mga bagay nga tunan-on ngan kamo waray tumoo, oonan-on an iyo pagtoo, kon ako magsumat ha iyo han mga bagay nga langitnon?”—Juan 3:1-12.