Mahibaro Tikang ha Pulong han Dios

Kay Ano nga Kinahanglan Mahibaro Tikang ha Dios?

Ini nga artikulo naghihisgot hin mga pakiana nga bangin nahunahuna mo na, ngan iginpapakita hini kon diin ha Biblia mabibilngan an mga baton hito. Nalilipay an mga Saksi ni Jehova nga hisgotan ini nga mga baton ha imo.

1. Kay ano nga kinahanglan mahibaro tikang ha Dios?

May maopay nga sumat an Dios para ha katawohan. Iya iginsusumat ito ha aton ha Biblia. An Biblia pariho hin usa nga surat tikang ha aton mahigugmaon nga Amay ha langit.—Basaha an Jeremias 29:11.

2. Ano an maopay nga sumat?

An katawohan nagkikinahanglan hin maopay nga gobyerno. Waray tawhanon nga lider an nakagwara han kamadarahog, kawaray-hustisya, sakit, o kamatayon. Kondi may maopay nga sumat. An Dios maghahatag ha katawohan hin maopay nga gobyerno nga magwawara han ngatanan nga hinungdan han pag-antos.—Basaha an Daniel 2:44.

3. Kay ano nga importante hinduro nga mahibaro tikang ha Dios?

Diri na maiha, pupoohon han Dios an mga tawo nga hinungdan han pag-antos. Samtang yana, iya gintututdoan an minilyon nga mag-aghop nga magpahimulos hin mas maopay nga paagi han pagkinabuhi ngan magpakita hin gugma ha Dios ngan ha igkasi-tawo. Tikang ha Pulong han Dios, nahibabaro an mga tawo kon paonan-o aatubangon an mga problema ha kinabuhi, kon paonan-o magigin tinuod nga malipayon, ngan kon paonan-o mapapalipay an Dios.—Basaha an Sepania 2:3.

  4. Hin-o an Awtor han Biblia?

An Biblia ginkukompwesto hin 66 nga gudtiay nga libro. Kwarenta ka tawo an nagsurat hito. An siyahan nga lima iginsurat ni Moises mga 3,500 ka tuig na an naglabay. An ultimo iginsurat ni apostol Juan sobra 1,900 ka tuig na an naglabay. Kondi an panhunahuna han Dios, diri an ira, an iginsurat han mga nagsurat han Biblia. Salit, an Dios an Awtor hito.—Basaha an 2 Timoteo 3:16; 2 Pedro 1:21.

Maaram kita nga an Biblia tikang ha Dios tungod kay husto ngan detalyado nga nagtatagna ito han tidaraon. Waray tawo an makakahimo hito. (Isaias 46:9, 10) Dugang pa, iginpapakita han Biblia an mga kalidad han Dios. May gahum ito ha pagbag-o han kinabuhi han mga tawo. Nakakombinse ini ha minilyon nga an Biblia Pulong han Dios.—Basaha an Josue 23:14; 1 Tesalonika 2:13.

5. Paonan-o mo masasabtan an Biblia?

Kilala hi Jesus sugad nga magturutdo han Pulong han Dios. Bisan kon pamilyar ha Biblia an kadam-an han iya nakakaistorya, nagkikinahanglan hira hin bulig basi masabtan ito. Basi buligan hira, gumamit hi Jesus hin mga teksto ngan iginsaysay an kahulogan hito. Hini nga artikulo, “Mahibaro Tikang ha Pulong han Dios,” gagamiton gihapon an pariho nga paagi basi buligan ka.—Basaha an Lukas 24:27, 45.

Waray mas malabaw pa kay ha paghibaro tikang ha Dios mahitungod han katuyoan han kinabuhi. Kondi diri ngatanan nalilipay nga nagbabasa ka han Biblia. Pero ayaw panluya. An imo paglaom nga magkaada kinabuhi nga waray kataposan nadepende ha imo paghibaro mahitungod ha Dios.—Basaha an Mateo 5:10-12; Juan 17:3.

Para hin dugang nga impormasyon, kitaa an kapitulo 2 hini nga libro Ano Gud ba an Igintututdo han Biblia? nga iginpublikar han mga Saksi ni Jehova.