Maaram ba an Dios nga Makakasala Hira Adan Ngan Eva?

DAMU nga tawo an naruruyag gud mahibaro han baton hito. Kon naiistoryahan kon kay ano nga gintutugotan han Dios an karaotan, naiistoryahan liwat an pakasala han siyahan nga mag-asawa ha hardin han Eden. Tungod han pagtoo nga ‘an Dios maaramon-ha-ngatanan,’ nakakasiring an iba nga maaram na hiya nga daan nga makakasala hira Adan ngan Eva.

Kon maaram na gud nga daan an Dios nga makakasala inin hingpit nga mag-asawa, ano an aton huhunahunaon ha iya? Magawas nga hiya diri mahigugmaon, diri makatadunganon, ngan malimbong. An iba bangin makasiring nga madarahog gud hiya tungod kay iginbutang niya hira ha sitwasyon nga maaram hiya nga maraot an dadangatan. Baga hin hiya an may baratunon, o usa han hinungdan, han tanan nga karaotan ngan pag-antos han tawo. Bangin hunahunaon pa ngani han iba nga diri maaramon an aton Maglalarang.

Sugad gud ba hito hi Jehova nga Dios sumala ha Biblia? Basi mabaton ito, usisahon naton an ginsisiring han Biblia mahitungod han mga linarang ngan personalidad ni Jehova.

“Ito Duro hin Kaopay”

May kalabotan ha mga linarang han Dios, upod na an siyahan nga mag-asawa, an Genesis nasiring: “An Dios nakakita han ngatanan nga iya ginhimo, ngan iini, ito duro hin kaopay.” (Genesis 1:31) Hira Adan ngan Eva ginlarang nga hingpit, gindisenyo nga mabuhi ha tuna. Waray gud hira depekto. Tungod kay ginlarang hira nga “duro hin kaopay,” sigurado nga may kapas hira ha pagpakita hin maopay nga panggawi nga amo an ginkikinahanglan ha ira. Ginlarang hira “ha ladawan han Dios.” (Genesis 1:27) Salit may kapas hira ha pagpakita han mga kalidad han Dios sugad han kinaadman, maunungon nga gugma, hustisya, ngan pagkamaopay. Pinaagi hini makakahimo hira hin mga desisyon nga makakaopay ha ira ngan makakapalipay ha ira Amay ha langit.

Gintagan ni Jehova inin hingpit ngan intelihente nga mga linarang hin kagawasan ha pagbuot. Salit waray hira iprograma nga daan, pariho hin robot, ha pagbuhat hin espisipiko nga butang sugad han pagpalipay ha iya. Tagda ini. Ano nga regalo an mas makakalipay ha imo—an iginhatag han usa nga naobligar la o an kinasingkasing nga iginhatag? Matin-aw an baton. Ha pariho nga paagi, kon pipilion nira Adan ngan Eva nga sugton an Dios, mas makakalipay ito ha iya. Tungod han ira kagawasan, maipapakita nira nga an ira pagsunod kan Jehova ginpapagios han gugma.—Deuteronomio 30:19, 20.

Matadong, Hustisya, Ngan Maopay

Iginsusumat han Biblia an mga kalidad ni Jehova. Tungod hito nga mga kalidad, imposible hiya makasayop. Hi Jehova ‘nahigugma ha katadongan ngan hustisya,’ siring han Salmo 33:5. Salit, an Jakobo 1:13 nasiring: ‘An Dios diri sadang pagsulayon hin maraot, ngan diri hiya magsusulay hin bisan hin-o nga tawo.’ Tungod han hustisya ngan pagpaid, ginpahamangnoan han Dios hi Adan: “Ha tagsa nga kahoy han tanaman makakahimo ikaw pagkaon hin waray makauulang, kondi han kahoy han kinaadman han kaopayan ngan han karaotan, diri ka makakakaon: kay ha adlaw nga ikaw kumaon hito, ikaw gud mamamatay.” (Genesis 2:16, 17) An siyahan nga mag-asawa ginpapili—waray kataposan nga kinabuhi o kamatayon. Diri ba baga hin ginlilimbongan la hira han Dios kon papahamangnoan niya hira mahitungod hin usa nga espisipiko nga sala, kon maaram na man ngay-an hiya nga magtatalapas hira? Sugad nga  ‘nahigugma ha katadongan ngan hustisya,’ diri hira papapilion ni Jehova kon waray man hira mapipilian.

Hi Jehova hura liwat ha pagkamaopay. (Salmo 31:19) Ha paghulagway han Iya pagkamaopay, hi Jesus nagsiring: “Hin-o nga tawo ha iyo nga, kon umaro an iya anak hin usa nga tinapay, tatagan niya hin usa nga bato? O kon mangaro hin usa nga isda, tatagan hiya niya hin usa nga halas? Busa kon kamo, nga mga magraot, maaram maghatag hin mga mag-opay nga hatag ha iyo mga anak mationan-o an kadarodaku han ighahatag han iyo Amay, nga aadto ha langit, an mag-opay nga mga butang hadton mga mangangaro ha iya?” (Mateo 7:9-11) Iginhahatag han Dios an “mag-opay nga mga butang” ha iya mga linarang. An pagkalarang ha tawo ngan ha ira urukyan nga Paraiso ebidensya han iya pagkamaopay. An sugad kamaopay nga Soberano diri magtatagana hin sugad nga urukyan kon maaram hiya nga mahahanaw ito ha urhi. An matadong ngan maopay nga Maglalarang diri gud sadang basulon ha pakasala han tawo.

‘Uusa La nga Makinaadmananon’

Iginpapakita liwat han Biblia nga hi Jehova an ‘uusa la nga makinaadmananon.’ (Roma 16:27) Nakita han iya mga anghel an damu nga ebidensya han iya waray tubtoban nga kinaadman. “Naggugliat [hira] ha kalipay” han ginhimo ni Jehova an iya mga linarang ha tuna. (Job 38:4-7) Sigurado nga interesado hira ha mga panhitabo ha hardin han Eden. Salit, makatadunganon ba para ha maaramon nga Dios nga katapos maglarang hin makatarag-ob nga uniberso ngan mag-opay nga butang ha tuna ha atubangan pa gud han mga anghel, maghihimo hin duha nga espesyal nga linarang nga maaram man hiya nga daan nga diri magmamatinumanon? Diri gud.

Kondi, bangin may rumiwa, ‘Kay ano nga diri mahibabaro an maaram-ha-ngatanan nga Dios?’ Oo, bahin han daku nga kinaadman ni Jehova an iya abilidad ha paghibaro “han kataposan tikang ha tinikangan.” (Isaias 46:9, 10) Pero diri niya kinahanglan gamiton pirme ini nga abilidad, sugad la nga diri niya kinahanglan gamiton pirme hin bug-os an iya daku hinduro nga gahum. Maaramon nga ginpipili niya kon san-o gagamiton an iya abilidad ha paghibaro han tidaraon. Ginagamit la niya ito kon kinahanglan ngan kon angayan.

An pagdesisyon nga diri gamiton ito nga abilidad mahimo ipariho ha usa nga feature han moderno nga teknolohiya. Mahimo pilion han usa nga nagkikita hin nakarekord na nga daan nga kompetisyon hin isport nga kitaon anay an kataposan nga bahin basi hibaroan kon hin-o an nagdaog. Kondi diri hiya obligado nga buhaton ito. Masisiring ba nga sayop hiya kon magtikang hiya ha tinikangan? Ha pariho nga paagi, matin-aw nga ginpili han Maglalarang nga diri anay kitaon an mahitatabo ha urhi. Lugod, nagdesisyon hiya nga maghulat ngan kitaon kon ano an bubuhaton han iya mga anak dinhi ha tuna.

Sugad han ginhisgotan na, tungod han kinaadman ni Jehova waray niya laranga an siyahan nga mag-asawa sugad hin robot nga nakaprograma na an bubuhaton. Lugod, mahigugmaon nga gintagan niya hira hin kagawasan ha pagbuot. Kon bubuhaton nira an husto, maipapakita nira an gugma, pagpasalamat, ngan pagkamasinugtanon, ngan maghahatag ito hin kalipay ha ira ngan kan Jehova, an ira Amay ha langit.—Proberbios 27:11; Isaias 48:18.

Iginpapakita han Biblia nga ha damu nga higayon, waray gamita han Dios an iya abilidad ha paghibaro nga daan han mahitatabo. Pananglitan, han iginhahalad na han matinumanon nga hi Abraham an iya anak, hi Jehova nagsiring: “Yana ako nasabot nga ikaw nahadlok han Dios, kay waray mo igdumiri ha akon an imo anak, an imo anak nga bugtong.” (Genesis 22:12) Ha luyo nga bahin, may mga higayon nga ‘nasubo’ an Dios tungod han magraot nga buhat han pipira nga indibiduwal. Masusubo ba hiya kon  maaram na hiya nga daan han ira bubuhaton?—Salmo 78:40, 41; 1 Hadi 11:9, 10.

Salit, makatadunganon la hunahunaon nga waray gamita han Dios nga maaramon-ha-ngatanan an iya abilidad ha paghibaro nga daan basi abanse nga hibaroan nga makakasala an aton siyahan nga mga kag-anak. Diri waray-buot an Dios nga maghihimo hin tawo basi la makita an ira paghikaraot nga maaram naman hiya nga daan nga ito an mahitatabo.

‘An Dios Gugma’

An kaaway han Dios nga hi Satanas an nagpatikang han pagrebelde ha Eden, ngan nagkaada ito magraot nga resulta upod na an sala ngan kamatayon. Salit, hi Satanas usa nga ‘parapamatay.’ Hiya liwat ‘buwaon, ngan amay han buwa.’ (Juan 8:44) Tungod han maraot nga motibo, nangangalimbasog hiya nga an aton mahigugmaon nga Maglalarang an gumawas nga maraot. Karuyag niya nga hi Jehova an basulon ha sala han mga tawo.

An gugma an nangunguna nga rason kon kay ano nga ginpili ni Jehova nga diri hibaroan nga daan nga makakasala hira Adan ngan Eva. Gugma an Iya nangunguna nga kalidad. ‘An Dios gugma,’ siring han 1 Juan 4:8. An gugma positibo, diri negatibo. Ginkikita hito an maopay ha iba. Oo, tungod han gugma, karuyag ni Jehova an pinakamaopay para kanda Adan ngan Eva.

Bisan kon may posibilidad hira Adan ngan Eva nga maghimo hin diri maaramon nga desisyon, an mahigugmaon nga Dios waray maghunahuna hin maraot o magtahap ha ira. Iginhatag niya an tanan nira nga panginahanglan ngan iginsumat an tanan nga kinahanglan hibaroan. Salit, husto la nga laoman han Dios nga magigin masinugtanon hira, diri magigin rebelyoso. Maaram hiya nga may kapas hira nga magin maunungon, sugad han ginpamatud-an ha urhi han diri hingpit nga mga tawo sugad kanda Abraham, Job, Daniel, ngan damu pa.

“Ha Dios an ngatanan nga mga bagay mahihimo,” siring ni Jesus. (Mateo 19:26) Nakakaliaw gud ito nga mga pulong. An gugma ni Jehova, upod an iya iba pa nga nangunguna nga kalidad nga hustisya, kinaadman, ngan gahum, nagpapasarig nga mahihimo niya ngan wawad-on niya ha husto nga panahon an tanan nga epekto han sala ngan kamatayon.—Pahayag 21:3-5.

Matin-aw, diri maaram nga daan hi Jehova nga makakasala an siyahan nga mag-asawa. Bisan kon nasubo hiya han pakasala han tawo ngan han pag-antos nga resulta hito, maaram hiya nga inin temporaryo nga kahimtang diri makakapugong han katumanan han iya waray kataposan nga katuyoan para ha tuna ngan ha katawohan. Kay ano nga diri usisahon ito nga katuyoan ngan kon paonan-o ka makakapahimulos han urusahon nga katumanan hito? *

[Footnote]

[Blurb ha pahina 14]

Waray laranga ni Jehova an siyahan nga mag-asawa sugad hin robot nga nakaprograma na an bubuhaton

[Blurb ha pahina 15]

Maaram an Dios nga hira Adan ngan Eva may kapas nga magin maunungon