Ha Pagpamiling hin Baton

“Haros an ngatanan may-ada opinyon mahitungod [kan Jesus]. Anoman kadaku an aton pagtoo o pagruhaduha, nagpapakiana la gihap kita, ‘Hin-o ini nga tawo?’”—STAN GUTHRIE, AWTOR.

INTERESADO an mga tawo kan Jesus. An mga libro mahitungod ha iya nagin popular. An mga pelikula han iya kinabuhi nagin box-office hit. Kondi damu la gihap an may pakiana mahitungod ha iya ngan iba-iba an opinyon han mga tawo kon hin-o gud hiya.

Pipira pa la ka tuig an naglabay, duha nga journalist an nag-post hin pakiana ha Internet, “Hin-o hi Jesus?” Ini an pipira han baton:

● “Matin-aw nga usa hiya nga rabi (magturutdo) nga an pagkinabuhi susbaranan ha pagpaid.”

● “Ordinaryo hiya nga tawo nga may diri ordinaryo nga pagkinabuhi.”

● “Waray ebidensya nga nag-eksister hi Jesus.”

● “Hi Jesus Anak han Dios nga natawo, namatay, ngan nabanhaw basi talwason kita ha aton mga sala. Buhi Hiya yana, ngan mabalik Hiya utro ha tuna.”

● “Natoo ako nga hi Jesu-Kristo bugtong nga anak han Dios, hiya tawo ngan dios ha pariho nga panahon.”

● “Binata-bata an istorya mahitungod kan Jesus kondi gintotoohan han kalagasan.”

Klaro nga diri puydi magin husto iton magkalain-lain nga opinyon. May-ada ba kita makukuhaan hin matataporan nga impormasyon nga makakahatag hin masasarigan nga baton ha aton mga pakiana mahitungod kan Jesus? An nagpublikar hini nga magasin natoo nga an Biblia an Pulong han Dios ngan ito gud la an nagsusumat han kamatuoran mahitungod kan Jesus. *—2 Timoteo 3:16.

Ha sunod nga artikulo, paghihisgotan naton an mga baton han Biblia ha pipira nga komon nga pakiana mahitungod kan Jesus. Hiya mismo nagsiring nga an dalan ngadto ha kaluwasan abrido ha “ngatanan nga natoo ha iya.” (Juan 3:16) Gin-aaghat ka namon nga usisahon an mga baton, ngan katapos pagdesisyon kon kinahanglan mo mahibaro hin dugang pa mahitungod kan Jesus ngan kon paonan-o makukultibar an pagtoo ha iya.

[Footnote]