Pariho han carbon monoxide, hi Satanas peligroso gud ngan diri nakikita. Kondi an Dios nagtatagana ha aton hin bulig. Salit diri kita sadang mahadlok kan Satanas kon sasalingabuton naton an masunod nga mga tagana han Dios.

Kagawasan ha pagpili. An Santiago 4:7 nasiring: “Atohi an Yawa, ngan mabaya hiya ha iyo.” Bisan kon gamhanan hi Satanas, diri ka niya mapipirit ha pagbuhat hin diri mo karuyag. May-ada ka mapipilian. An 1 Pedro 5:9 nasiring: “Atohi niyo hiya [an Yawa], magmarig-on ha iyo pagtoo.” Hinumdumi nga han marig-on nga nagdumiri hi Jesus ha tulo nga pagsulay ni Satanas, ginbayaan hiya ni Satanas. (Mateo 4:11) Kon kakaruyagon mo, maaatohan mo liwat an mga pagsulay ni Satanas.

Pakigsangkay ha Dios. Gin-aaghat kita han Santiago 4:8 nga ‘magin duok ha Dios.’ Hi Jehova mismo an nag-aaghat ha imo nga kultibaron an duok nga pakigsangkay ha iya. Paonan-o mo ito mahihimo? An siyahan nga pinakamaopay buhaton amo an paghibaro hin dugang mahitungod ha iya pinaagi han Biblia. (Juan 17:3) An imo mahibabaroan mahitungod kan Jehova magpapagios ha imo nga higugmaon hiya, ngan ito nga gugma an mag-aaghat ha imo nga buhaton an iya kaburut-on. (1 Juan 5:3) Samtang nagigin mas duok ka ha imo langitnon nga Amay, ano an iya bubuhaton? Hi Santiago nagpadayon: ‘[An Dios] magigin duok ha imo.’

Proteksyon. An Proberbios 18:10 nasiring: “An ngaran ni Jehova amo an marig-on nga balwarte; an matadong nadalagan ngadto ngan naluluwas.” Pero diri ito nangangahulogan nga an ngaran han Dios pariho hin anting-anting. Lugod, nagpapasabot ito nga an tinuod nga may kahadlok ha iya ngaran makakaaro ha iya hin proteksyon ha anoman nga panahon.

Susbaranan. Ha Buhat 19:19, may mahibabaroan kita mahitungod ha bag-o nga nakombirte nga mga Kristiano ha Efeso, nasiring ito: “Gindara han damu nga nagbubuhat hin madyik an ira mga libro ngan  ginsunog ito ha atubangan han ngatanan. Han ginkwenta nira, nagkakantidad ito hin 50,000 ka sinselyo nga silber.” * Ginbungkag hito nga mga Kristiano an ngatanan nga may kalabotan ha espiritismo, anoman kadaku an kantidad hito. Damu an aton mahibabaroan tikang hini. Yana, kalyap ha kalibotan an okultismo ngan espiritismo. Bisan kon an usa nga butang o buhat baga hin diri man nakakadaot, kondi kon may kalabotan ito ha espiritismo, mahimo ito gamiton han demonyo ha pag-impluwensya ha aton. Salit kinahanglan bungkagon ito, anoman kadaku an kantidad hito.​—Deuteronomio 18:10-12.

Hi Rogelio nga gin-unabi ha tinikangan nga artikulo hini nga serye, diri natoo nga may Yawa. Kondi han mga 50 anyos na hiya, nagbag-o an iya panhunahuna. Kay ano? “Tikang han akon kabata, yana la ako nagkaada Biblia,” siring ni Rogelio. “An kahibaro tikang ha Kasuratan nakakombinse ha akon nga may-ada Yawa. Ito nga kahibaro nagpapanalipod ha akon yana nga diri niya ako maimpluwensyahan.”

Ginhihingyap mo ba an adlaw nga waray na hi Satanas? Igintatagna han Biblia nga maabot an panahon nga an Yawa, nga naglilimbong ha damu hinduro nga tawo, ‘ilalabog ngadto ha linaw nga kalayo ngan asupre.’ (Pahayag 20:10) Syempre, an literal nga kalayo ngan asupre diri makakadaot ha usa nga espiritu nga persona. Salit an linaw nga kalayo nagsisimbolo ha waray kataposan nga kabungkagan. Hi Satanas mawawara ha kadayonan. Makalilipay gud ini nga panahon para ha mga nahigugma ha Dios!

Samtang diri pa ito nahitatabo, padayon nga kumuha hin kahibaro mahitungod kan Jehova ngan ha iya mga paagi. * Hunahunaa an adlaw nga makakagsiring na kita, “Waray na hi Satanas!”