Tutugotan ba han Dios nga padayon nga dominaran han tawo an usa kag usa ngan mameligro an tidaraon han katawohan? Diri. Sugad han aton nahibaroan, manginginlabot hiya ngan tatapuson an kasakit ngan panalumpigos nga gin-aantos han mga tawo ha sulod hin ginatos na ka mga tuig. Karuyag han Maglalarang han katawohan ngan han tuna nga hibaroan mo nga hirani na hiya gumios. Paonan-o niya iginpapahayag inin importante nga kamatuoran?

Tagda ini nga ilustrasyon: Kon magbibiyahe ka, bangin kitaon mo anay an Internet, mga mapa, ngan mga barasahon para hin direksyon. Ngan samtang nakikita mo an mga karatola ngan mga pangirilal-an ha ginsisiring han direksyon, nakakasiguro ka nga nagtitikahirani ka na ha imo destinasyon. Ha pariho nga paagi, iginhatag ha aton han Dios an iya Pulong nga naghuhulagway hin dagku nga mga panhitabo ha kalibotan. Samtang nakikita naton nga nahitatabo ito nga mga tigaman, nakukombinse kita nga nagkikinabuhi na kita ha peryodo han panahon nga nagtutugway ha kataposan.

An Biblia nasiring nga an mga panhitabo ha kalibotan maabot ha waray kapariho ngan importante gud nga peryodo han panahon nga matatapos ha kataposan. Hito nga panahon, makikita an iba-iba nga panhitabo ngan kahimtang ha bug-os nga kalibotan nga waray pa gud mahitabo ha kasaysayan han tawo. Tagda an pipira hini nga gin-uunabi ha Biblia.

1. KASAMOK HA BUG-OS NGA KALIBOTAN Ha tagna ha Mateo kapitulo 24, mababasa an mga panhitabo ha tuna nga magkukompwesto hin usa nga tigaman. Ito an magtitigaman “han ikatarapos hini nga sistema” ngan magtutugway ha panahon han ‘pag-abot han kataposan.’ (Bersikulo 3, 14) Ini nga tigaman nag-uupod han dagku nga mga girra, gutom, linog ha iba-iba nga lugar, pagtikadamu han karaotan, kawaray-gugma, ngan tuso nga pangalimbasog han mga lider han relihiyon ha paglimbong ha mga tawo. (Bersikulo 6-26) Syempre, nahitatabo na ito ha sulod hin mga siglo. Kondi samtang nagtitikahirani an kataposan, ini ngatanan durungan nga mahitatabo ha usa ka peryodo han panahon. Kaupod liwat nga mahitatabo an masunod nga tulo pa nga nagpapahamangno nga tigaman.

2. PAMATASAN HAN MGA TAWO An Biblia nasiring nga “ha kataposan nga mga adlaw”—an peryodo han panahon nga magtutugway ha kataposan—makikita an duro nga pagtikaraot han pamatasan han tawo. Aton mababasa: “An mga tawo magigin mahigugmaon ha ira la kalugaringon, mahigugmaon ha kwarta, hambog, daku an buot, mapasiparahon, diri-masinugtanon ha mga kag-anak, diri mapasalamaton, diri maunungon, waray gugma ha mga kapamilya, diri naruruyag ha bisan ano nga pakigsabot, mga parapakaraot, waray pagpugong ha kalugaringon, mapintas, waray gugma ha kaopayan, mga traydor, matig-a an ulo, mapahitas-on, mahigugmaon ha kalipayan imbes nga mahigugmaon ha Dios.” (2 Timoteo 3:1-4) Oo, diri la yana nahitatabo an kawaray-respeto ha igkasi-tawo, kondi “ha kataposan nga mga adlaw” la ito mas magduduro, salit ito nga peryodo angayan matawag nga “peligroso gud nga mga panahon nga makuri pakiangayan.” Naoobserbaran mo ba an nagtitikaraot nga pamatasan han mga tawo?

3. PAGKABUNGKAG HAN TUNA An Biblia nasiring nga ‘bubungkagon [han Dios] an mga nagbubungkag han tuna.’ (Pahayag 11:18) Ha ano nga mga paagi ginbubungkag han tawo an tuna? Iginhulagway ito pariho ha panahon ni Noe: “An tuna nagmalaw-ay [o, nabungkag] ha atubangan han Dios, ngan an tuna napuno hin panraugdaog. Ngan han Dios kinita han tuna, ngan, iini, an tuna nagmalaw-ay [o, nabungkag].” Salit an Dios nagsiring hiton maraot nga katawohan: “Pupoohon ko hira.” (Genesis 6:11-13) Nakikita mo ba an damu hinduro nga ebidensya nga an tuna napupuno na hin panraugdaog o kamadarahog? Dugang pa, an tawo nagkikinabuhi na ha waray kapariho nga peryodo ha kasaysayan: Mahihimo na nira literal nga bungkagon an tuna pinaagi ha pagpoo ha ngatanan nga tawo. May-ada na hira magagamit nga mga armas. Dugang pa, ira ginbubungkag an tuna ha iba pa nga paagi. An mga sistema nga nasuporta ha kinabuhi ha tuna—an hangin nga aton gin-giginhawa,  an ekosistema han hayop ngan tanom, an kadagatan—padayon nga gindadaot pinaagi han sayop nga paggamit han mga tawo.

Pakianhi an imo kalugaringon, ‘Ha naglabay nga siglo, may abilidad ba an mga tawo nga poohon an bug-os nga katawohan?’ Kondi yana, ginagamit na han tawo ito nga abilidad pinaagi ha pagtirok hin moderno nga mga armas ngan ha pagdaot ha palibot. Tungod han malaksi nga pag-uswag han teknolohiya, baga hin diri na masabtan o makontrol han tawo an mga resulta hito. Kondi diri an tawo an magdidesisyon o magkukontrol han tidaraon han tuna. Antes mapoo an kinabuhi ha tuna, magios an Dios ha pagbungkag ha mga nagbubungkag han tuna. Ito an iya saad!

4. PAGSANGYAW HA BUG-OS NGA KALIBOTAN Usa pa nga bahin han tigaman han kataposan nga igintagna amo an waray kapariho nga buruhaton nga mahitatabo: “Inin maopay nga sumat han Ginhadian isasangyaw ha bug-os nga inuukyan nga tuna sugad nga pamatuod ha ngatanan nga nasud, ngan sunod hito an kataposan maabot.” (Mateo 24:14) Ini nga pagsangyaw naiiba gud ha pangumbirte nga ginbubuhat han kadam-an nga relihiyon ha sulod hin mga siglo na. Durante ha kataposan nga mga adlaw, usa nga espisipiko nga mensahe an papabug-atan, “inin maopay nga sumat han Ginhadian.” May kilala ka ba nga relihiyon nga nagpapabug-at hini nga mensahe? Ngan kon may-ada man nagsasangyaw hini, ginbubuhat la ba nira ito ha iyo lugar, o iginpapasamwak nira ito ha “bug-os nga inuukyan nga tuna sugad nga pamatuod ha ngatanan nga nasud”?

An Web site nga www.dan124.com nakapokus hinin “maopay nga sumat han Ginhadian.” Makikita dida hito nga site an mga literatura nga nagsasaysay hito nga mensahe ha sobra 700 nga yinaknan. May-ada ka ba hinbabaroan nga iba pa nga pamaagi basi maisangyaw an maopay nga sumat han Ginhadian ha bug-os nga kalibotan? Antes pa magkaada Internet, kilala na an mga Saksi ni Jehova ha ira pangalimbasog nga maipasamwak an maopay nga sumat han Ginhadian han Dios. Tikang pa han 1939, makikita ha kobre han tagsa nga gowa han An Barantayan nga magasin an mga pulong nga “Nagsasamwak han Ginhadian ni Jehova.” Usa nga libro mahitungod ha mga relihiyon an nagsiring nga an pagsangyaw nga buruhaton han mga Saksi ni Jehova “haros waray kapariho may kalabotan ha kadasig ngan ha lukop han nasasangyawan.” Ginpapabug-atan hini nga pagsangyaw an maopay nga sumat nga diri na gud mag-iiha “an kataposan maabot” pinaagi han Ginhadian han Dios.

Nakikita mo ba nga an upat nga nagpapahamangno nga tigaman nga mababasa ha Biblia nga ginhisgotan hini nga artikulo natutuman na ha aton panahon? Ha sulod hin sobra usa ka gatos ka tuig, ini nga magasin naghahatag hin mga impormasyon mahitungod han mga panhitabo ha kalibotan basi buligan an mga magbarasa nga masiguro nga hirani na kita ha kataposan.  Syempre, nariwa hini an pipira nga maruhaduhaon, nasiring hira nga ini nga mga impormasyon ngan mga estadistika personal nga opinyon la ngan puydi bag-uhon. Nasiring liwat hira nga samtang nag-uuswag an komunikasyon ha bug-os nga kalibotan, baga hin nagtitikaraot la an kahimtang ha kalibotan. Bisan pa hito, padayon nga nagtitikadamu an ebidensya nga nagkikinabuhi na kita ha kataposan han waray kapariho nga peryodo ha kasaysayan han tawo.

May mga eksperto nga nasiring nga nagtitikahirani kita ha dagku nga mga pagbag-o hini nga kalibotan. Pananglitan han 2014, an Science and Security Board han Bulletin of the Atomic Scientists nagpahamangno ha United Nations Security Council mahitungod han dagku nga mga tarhog ha kinabuhi han tawo. Ito nagsiring: “An maopay nga pag-usisa hini nga mga tarhog nag-aaghat ha aton nga maghunahuna nga aada pa gihapon an peligro nga mapoo an katawohan pinaagi han teknolohiya.” Damu an mas nagigin kombinsido nga aanhi na kita ha pinakaimportante nga peryodo han kasaysayan han kalibotan. An mga nagpupublikar hini nga magasin ngan an damu nga nagbabasa hini kombinsido nga inin waray kapariho nga peryodo han panahon amo gud an kataposan nga mga adlaw ngan hirani na an kataposan han kalibotan. Kondi imbes nga mahadlok ha tidaraon, mahimo ka malipay ha magigin resulta hito. Kay ano? Tungod kay mahimo ka matalwas!