Ha pagtikang han 2023, kita ngatanan naglalaom nga may maopay nga mahitatabo ha aton ngan ha aton pamilya. Kay ano nga makakalaom kita hito?

 An Biblia nag-uunabi hin maopay nga sumat nga an aton mga problema nga gin-aatubang yana temporaryo la ngan hirani na mawara. Ngani, an Biblia “iginsurat ha pagtutdo ha aton, basi pinaagi . . . han pagliaw tikang ha Kasuratan magkaada kita paglaom.”—Roma 15:4.

•   Basi mahibaro hin dugang mahitungod han mga saad han Biblia, basaha an artikulo nga “Makakaasa Ka sa Isang Magandang Kinabukasan.”

 An paglaom nga tikang ha Biblia maipapariho ha “angkla para ha aton kinabuhi.” (Hebreo 6:19, footnote) Ito nga paglaom magpaparig-on ha aton. Makakabulig ito ha aton nga makaya an mga problema yana, magkaada hin positibo nga disposisyon, ngan mabilngan an tinuod nga kalipay. Pananglitan:

•   Hibaroi kon paonan-o an paglaom nga tikang ha Biblia nakabulig ha usa nga lalaki nga parahubog. Kitaa an video nga Ginsumhan Na Gud Ako han Akon Kinabuhi.

•   Hibaroi kon paonan-o an paglaom nga tikang ha Biblia makakabulig ha aton kon mamatayan kita hin hinigugma. Kitaa an video nga Pagliaw Para ha mga Namatayan.

 Damu nga tawo an naglalaom nga may maopay nga mahitatabo ha ira, pero diri hira sigurado kon mahitatabo gud ito. Naiiba gud an mga saad han Biblia. Kay ano? Kay an mga saad han Biblia tikang kan Jehova nga Dios a mismo, “nga diri makakagbuwa.” (Tito 1:2) Hi Jehova la an may gahum ha pagtuman han ngatanan nga iya saad; mabubuhat niya “an ngatanan nga karuyag niya buhaton.”—Salmo 135:5, 6.

 Kinasingkasing nga gin-iimbitar namon kamo nga magpahimulos tikang ha masasarigan nga paglaom nga mababasa ha Biblia. Mapaparig-on mo an imo pagsarig hito pinaagi ha ‘pag-usisa hin maopay ha Kasuratan.’ (Buhat 17:11) Puydi nimo ini testingan pinaagi han amon gintatanyag nga libre nga pag-aram ha Biblia nga may magturutdo. Tikangi an 2023 nga puno hin paglaom!