Ha masunod nga pipira ka semana, magkakaada mga eleksyon ha iba-iba nga nasud ha bug-os nga kalibotan. An mga tawo naghihimo hin importante nga mga desisyon kon hin-o nga mga lider an ira pipilion.

 Ano an ginsisiring han Biblia?

 Iginsusumat han Biblia an usa nga limitasyon han ngatanan nga lider nga tawo.

•   “Ayaw pagsarig ha mga prinsipe ngan ha anak han tawo, nga diri makakahatag hin katalwasan. An iya gininhawa nagawas, nabalik hiya ha tuna; hito mismo nga adlaw an iya mga panhunahuna nawawara.”—Salmo 146:3, 4, footnote.

 Bisan an pinakamaabilidad nga mga lider mamamatay pag-abot han panahon. Dugang pa, diri hira makakagarantiya nga ipapadayon han mga masaliwan ha ira an bisan ano han ira ginhimo nga maopay.—Eclesiastes 2:18, 19.

 Ha tinuod la, iginpapakita han Biblia nga an mga tawo waray gud disenyoha nga mandoan an ira kalugaringon.

•   “Diri para ha tawo bisan an paggiya han iya pitad.”—Jeremias 10:23.

 May-ada ba bisan hin-o nga puydi magin maopay nga lider yana?

 Iginsasaysay han Biblia nga an Dios nagpili hin maabilidad gud ngan masasarigan nga lider: hi Jesu-Kristo. (Salmo 2:6) Hi Jesus an Hadi han Ginhadian han Dios, usa nga gobyerno nga nagmamando tikang ha langit.—Mateo 6:10.

 Pipilion mo ba nga karawaton an pagkalider ni Jesus? Iginpapakita han Biblia kon kay ano nga importante ini nga pakiana:

•   “Pasidunggi an anak [hi Jesu-Kristo], kay kon diri, masisina an Dios ngan mamamatay kamo dida ha dalan, kay an Iya kasina madagmit maglarab. Malipayon an ngatanan nga naayop ha Iya.”—Salmo 2:12.

 Yana na an panahon ha pagdesisyon. Iginpapakita han mga tagna ha Biblia nga hi Jesus nagtikang pagmando han tuig 1914 ngan hirani na saliwnan han Ginhadian han Dios an ngatanan nga gobyerno han tawo.—Daniel 2:44.

 Basi mahibaro hin dugang kon paonan-o mo masusuportaran an pagkalider ni Jesus, basaha an artikulo nga “Suportari Yana an Ginhadian han Dios!”