Kinahanglan naton ngatanan an limpyo nga tubig basi mabuhi. Pero “tungod han nagtitikahitaas nga panginahanglan hin tubig ha bug-os nga kalibotan,” nagpahamangno an UN Secretary-General nga hi António Guterres, “nga naatubang kita hin seryoso nga krisis ha tubig.” Binilyon nga tawo ha bug-os nga kalibotan an nakukurian na nga magkaada malimpyo nga tubig nga maiinom.

 Magkakaada pa ba kita igo nga tubig para ha ngatanan? O pirme ba kita magkakaada mga krisis ha tubig? Ano an ginsisiring han Biblia?

Kon ano an iginsasaad han Biblia mahitungod ha suplay han tubig

 An Biblia nagsusumat nga maabot an panahon nga diri na magkukulang hin tubig. Ngani, magkakaada hura nga tubig nga limpyo.

 “An katubigan mabugwak ha kamingawan, ngan magkakaada mga sapa ha disyerto nga kapatagan. An tuna nga nauga ha kapaso magigin tubigon nga lugar nga puno hin tangbo, ngan an mamara nga tuna magkakaada hin mga burabod han tubig.”—Isaias 35:6, 7.

 Kay ano nga makakasarig kita hito nga saad han Biblia? Pansina kon ano an ginsisiring han Biblia mahitungod ha usa nga detalye han pagkadisenyo han aton planeta.

Kon ano an ginsisiring han Biblia mahitungod ha tuna ngan ha sikolo han tubig

 “[An Dios] waray maglarang [han tuna] nga waray la katuyoan, kondi nagporma hito basi ukyan.”—Isaias 45:18.

 “Ginkakabig [han Dios] tipaigbaw an mga turo han tubig; an alisngaw nabubug-os basi magin uran; katapos, iginbububo ini han mga dampog; nagpapauran ito ngada ha katawohan.”—Job 36:27, 28.

 “Magpapauran ako ha iyo ha husto nga panahon, ngan an tuna maghahatag han produkto hito, ngan mamumunga an mga kahoy ha tuna.”—Levitico 26:4.

 Nagsaad an Dios ha kadaan nga Israel, usa nga nasud han mga parag-uma, nga iya hira bibendisyonan hin mabungahon nga ani pinaagi ha paghatag ha ira hin regular nga suplay han tubig. Maaram hiya nga basi makapamunga an mga tanom nagkikinahanglan ito hin napapanahon nga uran.

 Kon ano an ginbuhat han Dios ha kadaan nga Israel iya liwat ito bubuhaton ha bug-os nga tuna ha diri na maiha. (Isaias 30:23) Pero ha pagkayana, ha damu nga bahin han kalibotan, nagtitikaduro an mga krisis ha tubig, ngan an kakulang hin uran usa la nga hinungdan han problema. Ano pa an ginsisiring han Biblia mahitungod ha solusyon ha mga problema ha tubig yana?

Kon paonan-o matatapos an krisis ha tubig

 Iginsusumat han Biblia nga susulbaron han Dios pinaagi han iya Ginhadian an mga problema nga nakakaapekto ha aton planeta, upod na an krisis ha tubig yana. (Mateo 6:9, 10) An Ginhadian han Dios usa nga langitnon nga gobyerno nga magmamando ha tuna. (Daniel 2:44; Pahayag 11:15) Dugang pa, bubuhaton han Ginhadian han Dios an mga butang nga diri kaya buhaton han gobyerno han tawo—wawad-on hito an mga hinungdan han mga problema ha tubig.

 Problema: An climate change nakakadugang nga magin diri gud balanse an sikolo han tubig. An epekto nag-uupod hin duro nga mga huraw, sugad man hin dagku nga baha, tungod man ito han magkusog nga mga uran o paghitaas han lebel han dagat.

 Solusyon: Aayuson han Ginhadian han Dios an ngatanan nga naguba ha aton palibot basi an aton planeta makarekober. Nagsaad an Dios: “Kitaa! Ginhihimo ko nga bag-o an ngatanan nga butang.” (Pahayag 21:5) An mamara nga mga tuna magkakaada hura nga tubig, magkakaada buhi nga mga linarang bisan ha mga lugar nga diri yana nauukyan. (Isaias 41:17-20) An Ginhadian han Dios ha pagmando ni Jesu-Kristo, magkukontrol liwat han natural nga mga pwersa han tuna.

 Problema: An mga tawo nga diri naghuhunahuna ha magigin resulta han ira mga ginbubuhat ngan hakog, naghuhugaw ha mga salog, linaw o danaw, ngan ha mga tubig nga natitirok ha ilarom han tuna, nga nakakadugang ha kakulangan han limpyo nga tubig.

 Solusyon: Lilimpyohan han Dios an bug-os nga tuna ngan aayuson an mga salog, linaw, dagat, ngan tuna. Magigin paraiso an tuna. Ha siday nga paagi, an Biblia nagsiring: “An kamingawan ngan an uga nga tuna magrarayhak, ngan an disyerto nga kapatagan magkakalipay ngan mamumukad pariho han tanom nga safron.”—Isaias 35:1.

 Problema: Diri tama an paggamit han tawo ha suplay han tubig, salit sugad nga resulta mas damu an nakakarag kay han nasaliwan nga tubig.

 Solusyon: Papahinaboon han Ginhadian an kaburut-on han Dios—diri han makikalugaringon nga mga tawo—nga “matuman . . . dinhi ha tuna.” (Mateo 6:9, 10) Ihahatag han Ginhadian han Dios ha mga tawo nga sakop hito an pinakamaopay gud nga edukasyon. “An tuna mapupuno gud han kahibaro mahitungod kan Jehova,” siring han Isaias 11:9. a Tungod han mas hitaas nga kahibaro, upod an hilarom nga gugma ha Dios ngan ha ngatanan niya nga linarang, perpekto nga aatamanon han mga tawo an aton mahusay nga planeta ngan an natural nga mga bahandi hito.

•    Basi mahibaro hin dugang mahitungod han pagbubuhaton han Ginhadian han Dios, kitaa an artikulo nga “Ano an Bubuhaton han Ginhadian han Dios?”

•    Kitaa an libro ha Biblia nga Isaias, ha kapitulo 35, basi mabasa mo mismo kon paonan-o magigin paraiso an tuna.

•    Kitaa an video nga Kay Ano nga Ginlarang han Dios an Tuna? basi mas mahibaro ha katuyoan han Dios ha tuna ngan ha mga tawo.