Kon may pag-atake hin terorista, bangin natural la nga magpakiana ka ha imo kalugaringon: ‘Nakikita ba ito han Dios? Kay ano nga nahitatabo ini nga mga butang? Matatapos pa ba an terorismo a? Paonan-o ko maiilob ini nga kahadlok nga akon inaabat?’ Ginbabaton han Biblia ini nga mga pakiana.

 Nangangalas an Dios ha kamadarahog ngan terorismo. (Salmo 11:5; Proberbios 6:16, 17) Ngan hi Jesus nga representante han Dios, nagsaway han iya mga disipulo han nagin madarahog hira. (Mateo 26:50-52) Bisan kon an pipira nasiring nga nagbubuhat hira hin kamadarahog para ha ngaran han Dios, waray niya hira tagi hin awtoridad ha pagbuhat hito. Ngani, diri hiya namamati han ira mga pag-ampo.—Isaias 1:15.

 Napaid an Dios ha ngatanan nga nag-aantos, upod na adton naapektohan han mga pag-atake hin terorista. (Salmo 31:7; 1 Pedro 5:7) Iginpapakita liwat han Biblia nga magios an Dios basi tapuson an kamadarahog.—Isaias 60:18.

 Iginsusumat han Biblia an tinuod nga hinungdan han terorismo: “Ginmamandoan han tawo an iya igkasi-tawo ha iya ikakadaot.” (Eclesiastes 8:9) Ha bug-os nga kasaysayan, an mga tawo nga may gahum naggamit hin terorismo basi raugdaugon an iba. Tungod hito, gumamit liwat an iba hin terorismo basi bumulos.—Eclesiastes 7:7.

 Nagsasaad an Dios nga iya wawad-on an kahadlok ngan kamadarahog ngan iya hihimoon nga murayaw an tuna. (Isaias 32:18; Micas 4:3, 4) Iya:

•   Wawad-on an hinungdan han terorismo. An mga gobyerno han tawo sasaliwnan han bug-os-kalibotan nga gobyerno han Dios. An Magmarando hini nga gobyerno, hi Jesu-Kristo, magigin patas ha ngatanan, ngan iya wawad-on an panraugdaog ngan kamadarahog. (Salmo 72:2, 14) Hito nga panahon, waray na mga terorista. An mga tawo ‘magmamalipayon hinduro tungod han hura nga kamurayawan.’—Salmo 37:10, 11.

•   Wawad-on an ngatanan nga epekto han terorismo. Tatambalon han Dios an mga epekto han terorismo, kadaot man ito ha pisikal o emosyon. (Isaias 65:17; Pahayag 21:3, 4) Nagsaad pa ngani hiya nga babanhawon an mga patay ngan maukoy hira ha murayaw nga tuna.—Juan 5:28, 29.

 An Biblia naghahatag ha aton hin mag-opay nga rason nga tumoo nga ha diri na maiha magios an Dios. Pero bangin mahunahuna mo, ‘Kay ano nga waray pa man taposa han Dios an terorismo?’ Basi mahibaroan an baton, kitaa an video nga Kay Ano nga Gintutugotan han Dios an Pag-antos?