Sean Gladwell/Moment via Getty Images
PADAYON NGA MAGBANTAY!
An Gastos han mga Gobyerno ha Bug-os nga Kalibotan Para ha Militar Sobra Na $2 Trilyon—Ano an Ginsisiring han Biblia?
An gastos han mga gobyerno ha bug-os nga kalibotan para ha militar umabot na hin 2.24 trilyon ka dolyar (U.S.) han 2022, nga amo an pinakahitaas nga rekord. Resulta ito labi na han pag-atake han Russia ha Ukraine. Usa nga report nga iginrelis han Stockholm International Peace Research Institute (SIPRI) han Abril 2023, an nasiring nga han 2022:
An gastos han Europe para ha militar “naghitaas hin 13 porsyento hito nga tuig, nga amo an pinakadaku nga paghitaas han tinuig nga paggasto han mga gobyerno ha Europe tikang han 1991.”
“An gastos han Russia naghitaas hin mga 9.2 porsyento salit tikang ha ikalima, nagin ikatulo na hira yana nga pinakadaku an gastos ha bug-os nga kalibotan.”
An United States an pinakadaku la gihapon an gastos ha militar, “tungod kay ira an 39 porsyento han gastos para ha militar han bug-os nga kalibotan.”
“An padayon nga paghitaas han gastos para ha militar ha bug-os nga kalibotan ha naglabay nga mga tuig tigaman nga nagkikinabuhi na kita ha kalibotan nga waray kasigurohan,” siring ni Dr. Nan Tian, usa han mga nagsurat han report han SIPRI.
An Biblia nagtagna nga magtitikadamu an mga problema han pinakagamhanan nga mga gobyerno ha usa kag usa ngan nagsusumat ito ha aton kon ano la an makakaghatag hin tinuod nga kamurayawan.
Igintagna an pagtikadamu han mga girra
Gintatawag han Biblia an aton panahon yana nga an “panahon han kataposan.”—Daniel 8:19.
An libro han Daniel nagtagna nga hito nga panahon, an gamhanan nga mga gobyerno makikigkompetensya ha usa kag usa. Ini nga mga gobyerno “makikigdusoay,” o makikig-away ha usa kag usa basi magin pinakagamhanan. Sugad nga bahin hito nga pakig-away, magasto hira hin daku nga “mga bahandi,” o kwarta.—Daniel 11:40, 42, 43.
Basi mahibaro hin dugang parte hini nga makapainteres nga tagna, kitaa an video nga Natuman nga Tagna—Daniel Kapitulo 11.
Kon paonan-o magkakaada tinuod nga kamurayawan
An Biblia nagsiring nga liliwanan han Dios an mga gobyerno han tawo. “Mag-iestablisar [Hiya] hin ginhadian nga diri gud mabubungkag. Ngan ini nga ginhadian diri ipapasa ha iba nga katawohan. Dudugmukon ngan bubungkagon hini ito ngatanan nga ginhadian, ngan ini gud la an magpapadayon ha kadayonan.”—Daniel 2:44.
Diri na mag-iiha, hihimoon ni Jehova a nga Dios an diri mahihimo han tawo—an paghatag hin tinuod ngan permanente nga kamurayawan. Paonan-o? Bubungkagon han iya langitnon nga gobyerno an ngatanan nga armas ngan tatapuson an ngatanan kamadarahog.—Salmo 46:8, 9.
Basi mahibaro hin dugang ha kon ano bubuhaton han Ginhadian han Dios, basaha an artikulo nga “Ha Pagmando han Ginhadian han Dios an ‘Kamurayawan Magigin Hura.’”
a Jehova an personal nga ngaran han Dios.—Salmo 83:18.