Nagtitikawara na an maopay nga panggawi. Gin-guguliatan han mga pasyente an mga doktor; gin-iisgan han mga kustomer han restawran an mga waiter; gin-aatake han reklamador nga mga pasahero an mga flight attendant; gin-iinsulto, gintatarhog, ngan gin-aatake han rebelyoso nga estudyante nga kabataan an mga titser; ngan an pipira nga politiko nagbubuhat hin eskandaloso nga mga butang samtang an iba ha ira nangangalimbasog nga pamatud-an nga maopay an ira panggawi.

 An Biblia masasarigan nga giya kon ano gud an maopay nga panggawi. Nagsasaysay liwat ito kon kay ano nga nagtitikawara na an maopay nga panggawi yana.

 An pagtikawara han maopay nga panggawi—an maopay, uyon ha moral, ngan kinakarawat nga pamatasan—nakikita na gud ha bug-os nga kalibotan.

•   Sumala ha bag-o nga surbey han Gallup, natoo an mga Amerikano nga an mga tawo ha United States may-ada mas hamubo nga prinsipyo ha moral yana kay han naglabay nga 22 ka tuig.

•   Ha usa pa nga surbey ha sobra 32,000 nga tawo ha 28 nga nasud, 65 porsyento an nagsiring nga an pagtikawara han maopay nga panggawi han mga tawo yana amo an pinakagrabe nga ira naobserbaran.

 Igintagna han Biblia an panggawi nga aton nakikita yana.

•   “Magmamakuri an panahon ha kataposan nga mga adlaw. Magigin halot ngan hakog an mga tawo, hambog ngan parayawan; magmamayubiton hira ngan masupakon han ira mga kag-anak, diri mapinasalamaton, . . . mag-isog, ngan magpintas.”—2 Timoteo 3:1-3, Maupay nga Sumat.

 Para ha dugang nga impormasyon kon paonan-o natutuman ini nga tagna, basaha an artikulo nga “Inihula Ba ng Bibliya na Magiging Ganito ang Ugali ng mga Tao sa Ngayon?”

 Ha kalibotan nga nagtitikawara an maopay nga panggawi, minilyon an nahibaro nga an Biblia an pinakamaopay nga giya basi magkaada maopay nga pamatasan. An mga sagdon hito ha moral ‘pirme masasarigan, yana ngan ha kadayonan.’ (Salmo 111:8) Ini an pipira nga ehemplo:

•   An ginsisiring han Biblia: “An ngatanan nga karuyag niyo buhaton ha iyo han mga tawo, kinahanglan buhaton liwat niyo ha ira.”—Mateo 7:12.

   Karuyag sidngon: Dapat naton trataron an iba hin buotan ngan may respeto, sugad han karuyag naton nga pagtratar ha aton.

•   An ginsisiring han Biblia: “Yana nga ginbayaan na niyo an panlimbong, an tagsa ha iyo magyakan hin kamatuoran ha iya igkasi-tawo.”—Efeso 4:25.

   Karuyag sidngon: Dapat kita magin tangkod ha ngatanan nga aton ginyayakan ngan ginbubuhat.

 Para hin dugang nga impormasyon hini nga topiko, alayon basaha an:

•   Isyu han An Barantayan nga may ulohan nga “Tama Ngan Sayop—Giya nga Imo Masasarigan.”

•   Artikulo nga “Pagin Makinarawaton—Kon Paonan-o Makakabulig an Biblia.”