“Han bata pa ako, kada adlaw ginkakastigo ako ngan ginyayaknan hin nakakasakit han akon magurang nga bugto nga lalaki. Han nag-asawa na ako, gin-abuso liwat ako han akon ugangan nga babaye. Hiya ngan an akon ugangan nga lalaki uripon an pagtratar ha akon. Naghunahuna ako nga magpakamatay.”​—Madhu, a India.

 “Komon ha bug-os nga kalibotan an madarahog nga pagtratar ha mga babaye,” siring han World Health Organization. Ginbabanabana hito nga haros usa ha kada tulo nga babaye an nakaeksperyensya hin pisikal o seksuwal nga pag-abuso.

 Kon nahitabo na ito ha imo, bangin umabat ka nga diin ka man kumadto, bangin may magyakan ha imo hin nakakasakit o makaeksperyensya ka hin pisikal o seksuwal nga pag-abuso. Tungod han sugad nga madarahog nga pagtratar ngan pagmaltrato ha imo kay babaye ka, bangin abaton mo nga an kadam-an nga tawo naghuhunahuna nga ‘Diri importante an mga babaye.’ Pero importante gud ba ha Dios an mga babaye?

 Teksto: “Ginlarang . . . hira [han Dios] nga lalaki ngan babaye.”​—Genesis 1:27.

 Karuyag sidngon: Ginlarang han Dios an mga lalaki ngan mga babaye. Para ha iya, pariho hira angay respetuhon. Dugang pa, ginlalaoman niya nga ‘hihigugmaon [han bana] an iya asawa sugad han iya paghigugma ha iya kalugaringon,’ diri kay papakurian ngan kukontrolon hiya, labi na pinaagi hin nakakasakit nga mga pulong o hin kamadarahog. (Efeso 5:33; Colosas 3:19) Klaro nga importante ha Dios an pagin talwas han mga babaye.

 “Han bata pa ako, seksuwal nga gin-abuso ako han akon mga paryente. Han 17 anyos ako, an akon agaron nagtarhog nga iya ako tatanggalon ha trabaho kon diri ako makikig-sex ha iya. Sugad nga adulto, ginminos ako han akon bana, mga kag-anak, ngan mga amyaw. Pero ha urhi, nahibaro ako mahitungod kan Jehova, b an Maglalarang. May respeto hiya ha mga babaye. Nagpasarig ini ha akon nga hinigugma niya ako ngan para ha iya, importante ako.”​—Maria, Argentina.

 Teksto: “May sangkay nga mas maunungon pa kay hin bugto.”​—Proberbios 18:24.

 Karuyag sidngon: An tinuod nga sangkay mabulig ha imo. Kon posible, isumat an imo inaabat ha usa nga sangkay nga imo gintataporan.

 “Ha sulod hin 20 ka tuig, waray ako ginsumatan nga seksuwal nga ginmolestya ako. Sugad nga resulta, nagin masurub-on ako, sobra nga nabaraka, ngan nadepres. Pero han iginsumat ko na an akon eksperyensya ha usa nga sangkay nga andam mamati, nag-opay gud an akon pag-abat.”​—Elif, Türkiye.

 Teksto: “[Ipasa ha Dios] an ngatanan niyo nga kabaraka, kay nagtatagad hiya ha iyo.”​—1 Pedro 5:7.

 Karuyag sidngon: Kon nag-aampo ka, namamati gud an Dios. (Salmo 55:22; 65:2) Tungod kay nagtatagad, o nahigugma, hiya ha imo, mabubuligan ka niya nga masabtan nga presyoso ka gud.

 “An paghibaro mahitungod kan Jehova nakabulig basi hinay-hinay nga mawara an akon duro nga kasakit ha emosyon. Yana naisusumat ko na ha Dios an ngatanan ko nga inaabat pinaagi ha pag-ampo. Pariho hiya hin sangkay nga nakakasabot gud han akon inaabat.”​—Ana, Belize.

 Teksto: “Magpapadapat [hi Jehova] hin hustisya ha mga waray tatay ngan ha mga tinalumpigos, basi an mortal nga tawo ha tuna diri na maghadlok ha ira.”​—Salmo 10:​17, 18.

 Karuyag sidngon: Diri na mag-iiha, wawad-on han Dios an ngatanan nga kawaray-hustisya, upod na an maraot gud ngan madarahog nga pagtratar ha mga babaye.

 “Para ha akon, sugad hin tambal nga nakakawara hin kasakit an paghibaro nga hirani na wad-on ni Jehova an pagmaltrato ha adulto ngan bata nga mga babaye. Tungod hito, nagin murayaw an akon hunahuna.”​—Roberta, Mexico.

 Basi mahibaro hin dugang kon paonan-o an Biblia naghahatag hin paglaom, kon kay ano nga makakasarig ka ha mga saad hito, ngan kon paonan-o an mga Saksi ni Jehova yana naghahatag hin bulig tikang ha Biblia, paghangyo hin libre nga pagbisita.

 I-download an bersyon hini nga artikulo nga puydi i-print.