Pansina an masunod nga mga ginsiring parte ha prominente nga mga lider han relihiyon ngan ha girra ha Ukraine:

•   “An lider han Russian Orthodox Church, hi Patriarch Kirill, waray bisan ano nga ginsiring kontra ha pag-atake han Russia. . . . An padayon nga pagpasarang han iya relihiyon hin buwa nga mga istorya parte ha Ukraine ginagamit ni Putin basi depensahan an ira pakiggirra.”—EUobserver, Marso 7, 2022.

•   “Hi Patriarch Kirill . . . marig-on nga nagdepensa han pag-atake han iya nasud ha Ukraine pinaagi ha pagsiring nga ini nga girra bahin han pakig-away kontra ha sala.”—AP News, Marso 8, 2022.

•   “Han Lunes, an lider han Ukrainian Orthodox Church, hi Metropolitan Epiphanius I han Kyiv, nagbendisyon ha iya katawohan ‘basi makig-away ha mga taga-Russia nga inatake’ . . . Nagsiring liwat [hiya] nga diri sala an pagpatay ha mga sundalo han Russia.”—Jerusalem Post, Marso 16, 2022.

•   “Nasuporta kami [an Ukrainian Council of Churches and Religious Organizations (UCCRO)] ha pwersa militar han Ukraine ngan ha ngatanan nga nagdidepensa ha amon nasud, ginbibendisyonan namon an ira pagdepensa ha Ukraine ha kaaway, ngan igin-aampo namon hira.”—Pahayag han UCCRO a, Pebrero 24, 2022.

 Ano ha imo paghunahuna? An mga relihiyon ba nga nag-aangkon nga nasunod kan Jesu-Kristo dapat mag-aghat ha ira mga membro nga makiggirra? Ano an ginsisiring han Biblia?

An kasaysayan han relihiyon ha girra

 Iginpapakita han kasaysayan nga agsob konsinteron, depensahan, o iaghat pa ngani han relihiyon an girra samtang nagpapakuno-kuno nga nangangalimbasog nga magkaada kamurayawan. Damu ka dekada na nga iginbubuhayhag han mga Saksi ni Jehova ito nga pagkahipokrito han relihiyon. Kitaa an pipira nga ehemplo nga gin-unabi ha amon mga publikasyon.

•   Iginpapakita han artikulo nga “Ang mga Krusada—Isang ‘Kalunus-lunos na Ilusyon’” nga an relihiyon nga Romano Katoliko may baratunon ha pagpamatay hin damu nga tawo ha ngaran han Dios ngan han Kristo.

•   Iginhuhulagway han artikulo nga “Ang Iglesya Katolika sa Aprika” an usa nga ehemplo diin waray pugngi han relihiyon an girra han mga tribo, o an pagpoo pa ngani hin lahi.

•   Iginsasaysay han mga artikulo nga “Masisisi ba ang Relihiyon?,” “Ang Bahagi ng Relihiyon sa mga Digmaan ng Tao,” ngan “Ang Relihiyon ay Pumapanig” kon paonan-o ginsuportahan han Katoliko, Orthodox, ngan Protestante nga mga klero an magkaaway nga partido ha damu nga girra.

Dapat ba suportahan han Kristiano nga mga relihiyon an girra?

 An igintutdo ni Jesus: “Higugmaa an imo igkasi-tawo sugad ha imo kalugaringon.” (Mateo 22:39) “Padayon nga higugmaa an iyo mga kaaway.”—Mateo 5:44-47.

 An ginsiring ni Jesus: “An akon Ginhadian diri bahin hini nga kalibotan. Kon an akon ginhadian bahin hini nga kalibotan, nakig-away unta an akon mga sumurunod basi diri ako maitubyan.” (Juan 18:36) “An ngatanan nga nagamit han espada mamamatay pinaagi han espada.”—Mateo 26:47-52.

 Hunahunaa: Kon diri ngani dapat makig-away an mga Kristiano basi protektaran hi Jesus, dapat ba hira makig-away tungod han iba pa nga rason? Basaha an artikulo nga “Dapat Bang Sumali sa Digmaan ang mga Kristiyano?” basi makita kon paonan-o matinumanon nga ginsunod han siyahan nga mga Kristiano an ehemplo ngan mga katutdoan ni Jesus.

Ano an mahitatabo ha mga relihiyon nga nag-aaghat hin pakiggirra?

 Igintututdo han Biblia nga diri ginkakarawat han Dios an mga relihiyon nga nag-aangkon nga nagrirepresentar kan Jesus pero diri nasunod ha iya mga katutdoan.—Mateo 7:21-23; Tito 1:16.

•   Iginpapakita han libro han Pahayag nga para ha Dios, may baratunon an sugad nga mga relihiyon ha kamatayon “han ngatanan nga ginpatay ha tuna.” (Pahayag 18:21, 24) Basi mahibaroan kon kay ano, basaha an artikulo nga “Ano ang Babilonyang Dakila?”

•   Iginpakita ni Jesus nga an ngatanan nga relihiyon nga diri ginkakarawat han Dios bubungkagon tungod ha ira magraot nga buhat, sugad la nga an dunot nga kahoy nga namumunga hin dunot nga bunga “ginpupulod ngan iginlalabog ha kalayo.” (Mateo 7:15-20) Basaha an artikulo nga “Hirani Na an Kataposan han Palso nga Relihiyon!” basi mahibaroan kon paonan-o ini mahitatabo.

Ginkuhaan han mga piktyur, tikang ha wala tipatoo: Photo by Sefa Karacan/Anadolu Agency/Getty Images; Maxym Marusenko/NurPhoto via Getty Images