An mga tawo ha bug-os nga kalibotan nag-aantos hin duro nga kapaso han panahon ngan grabe nga mga kalamidad kay ha kakan-o pa man. Pansina an masunod nga mga report:

•   “Ini an pinakamapaso nga Hunyo nga nairekord tikang han iginrekord an mga temperatura ha bug-os nga kalibotan, 174 ka tuig na an naglabay.”—National Oceanic and Atmospheric Administration, U.S. Department of Commerce, Hulyo 13, 2023.

•   “An Italy, Spain, France, Germany ngan Poland nakakaeksperyensya hin duro nga heatwave nga an temperatura ginlalaoman nga maabot hin 48°C [118°F] ha mga isla han Sicily ngan Sardinia – posible an pinakamapaso nga temperatura nga mairirekord ha Europe.”—European Space Agency, Hulyo 13, 2023.

•   “Samtang an planeta nagtitikapaso, ginlalaoman ta nga makakaeksperyensya kita hin mas agsob ngan mas grabe nga pag-inuran nga magriresulta hin mas dagku nga baha.”—Stefan Uhlenbrook, direktor ha hydrology, water ngan cryosphere ha World Meteorological Organization, Hulyo 17, 2023.

 Nababaraka ka ba tungod hinin nagtitikadamu nga report han grabe nga klima? Pansina an ginsisiring han Biblia mahitungod hinin importante nga topiko.

 Oo. An mga heat wave ha bug-os nga kalibotan ngan iba pa nga grabe nga kalamidad haom ha igintagna han Biblia nga mahitatabo ha aton panahon. Pananglitan, nagtagna hi Jesus nga makakakita kita hin “makaharadlok nga mga kiritaon,” o “magpakalilisang, ngan dagku nga mga tigaman.” (Lucas 21:11; An Baraan nga Kasuratan) Tungod han nagtitikahitaas nga temperatura ha kalibotan, damu an nahahadlok nga maabot an panahon nga diri na mauukyan an tuna.

 Diri. Ginlarang han Dios an tuna basi magin permanente naton nga urukyan; diri hiya matugot nga bungkagon ito han tawo. (Salmo 115:16; Eclesiastes 1:4) Ngani, nagsaad hiya nga iya ‘bubungkagon an mga nagbubungkag han tuna.’—Pahayag 11:18.

 Iginpapakita han Biblia nga kaya han Dios ngan puprotektaran niya an tuna tikang ha mga kalamidad.

•   “Ginpapakalma [han Dios] an subasko; an mga balud ha dagat nahilom.” (Salmo 107:29) May gahum an Dios nga kontrolon an natural nga mga pwersa. Kaya niya wad-on an mga kalamidad nga hinungdan han pag-antos han mga tawo.

•   “Imo gin-aataman an tuna, ginhihimo ito nga mabungahon gud ngan matambok hinduro.” (Salmo 65:9) Tungod han bendisyon han Dios, an tuna magigin paraiso.

 Basi mahibaro hin dugang mahitungod ha saad han Biblia nga ibabalik an maopay nga palibot, kitaa an artikulo nga “Sino ang Magliligtas sa Lupa?”