Ginbanabana nga mga lima ka bilyon nga tawo an magkikita ha mga atleta tikang ha 206 nga nasud nga nagpartisipar ha 2024 Summer Olympics. Hi Thomas Bach nga presidente han International Olympic Committee nagsiring: “Kita ngatanan kaapi hini nga event nga nakakahatag hin pagkaurosa ha bug-os nga kalibotan.” Ngan nagsiring pa hiya: “Pabilhan ta ini nga ideya nga iginpapakita han Olympics nga dapat an ngatanan nga tawo magkinabuhi nga murayaw ngan nagkakaurosa bisan kon iba-iba an aton gintikangan.”

 Kaya ba makab-ot han Olympics ito nga tumong? Magkakaada gud ba kita tinuod nga kamurayawan ngan pagkaurosa?

 An Olympics yana nga tuig diri la kay basta parte ha sports. Napabug-atan liwat hito an mga isyu ha komunidad ngan ha politika nga nagriresulta han pagkabahin-bahin han mga tawo. Upod na an mga isyu ha human rights, diskriminasyon ha iba nga lahi ngan relihiyon, ngan parte ha pagin diri patas.

 An mga sport nga international sugad han Olympics naghahatag hin kaliawan. Pero makikita liwat dida an mga kinaiya ngan buhat nga nagriresulta hin pagkabahin-bahin imbes nga magin mamurayawon ngan magkaurosa.

 Maiha na nga iginsumat han Biblia an mga kinaiya nga magpapakuri ha mga tawo nga magkaurosa yana. (2 Timoteo 3:1-5) Basi mahibaro pa hin dugang parte hini nga tagna han Biblia, basaha an artikulo nga “Inihula Ba ng Bibliya na Magiging Ganito ang Ugali ng mga Tao sa Ngayon?”

 Mababasa ha Biblia an tinuod nga paglaom para hin kamurayawan ngan pagkaurosa ha bug-os nga kalibotan. Iginsasaad hito nga magkakaurosa an ngatanan nga tawo ha tuna pinaagi hin langitnon nga gobyerno nga gintatawag nga “Ginhadian han Dios.”—Lucas 4:43; Mateo 6:10.

 Hi Jesu-Kristo nga Hadi hito nga Ginhadian an maghahatag hin kamurayawan ha bug-os nga kalibotan. An Biblia nasiring:

•   “An magtadong mag-uuswag, ngan an kamurayawan magigin hura.”—Salmo 72:7.

•   “Iya tatalwason an pobre nga nangangaraba para hin bulig . . . Iya tatalwason hira tikang ha panalumpigos ngan kamadarahog.”—Salmo 72:12, 14.

 Minilyon nga tawo yana ha 239 nga nasud an nagkakaurosa tungod han katutdoan ni Jesus. Sugad nga mga Kristiano, nahibaro an mga Saksi ni Jehova ha bug-os nga kalibotan nga magin mamurayawon. Basi hibaroan kon kay ano, basaha an isyu han magasin nga An Barantayan nga may ulohan nga “Kon Paonan-o Matatapos an Kangalas.”