Igintagna han Biblia nga “an usa nga nasud makikig-away ha lain nga nasud” ngan magkakaada mga kalamidad ha “ikatarapos han sistema han mga butang.” (Mateo 24:3, 7) Nakita naton nga natuman ini nga tagna han 2023 nga tuig han pag-alagad. a Pero bisan pa han mga girra ngan mga kalamidad ha haros 100 nga katunaan, ginsubad han mga Saksi ni Jehova an gugma ni Jehova. Paonan-o?

 Han 2023 nga tuig han pag-alagad, an aton kabugtoan naapektohan han sobra 200 nga natural o hinimo han tawo nga mga kalamidad. Ha kabug-osan, an legal nga mga korporasyon nga ginagamit han mga Saksi ni Jehova naggasto hin sobra napulo ka milyon ka dolyar b tikang ha mga kwarta nga igindonar ha worldwide work basi magtagana hin disaster relief. Labot la ini han personal nga kwarta nga gin-gamit han damu nga kabugtoan ha ira pagbulig hadton nanginginahanglan ha ira lugar. Pansina kon paonan-o gin-gamit an imo donasyon ha pagbulig ha mga biktima han duha la han damu nga kalamidad nga nakaapekto ha aton kabugtoan.

 May mga lugar ha Nigeria nga kasagaran na nga ginbabaha kon tag-uran. Pero an mga baha han Oktubre 2022 an pinakagrabe nga naeksperyensyahan han nasud ha sulod hin napulo ka tuig. Sobra 676,000 ka ektarya han uma an nadaot, ngan sobra duha ka milyon ka tawo an nag-ebakwit. An sanga nga opisina ha Nigeria nagtoka dayon hin mga Disaster Relief Committee basi mag-organisar hin pagtagana hin mga relief ngan maghatag hin espirituwal nga bulig.

•   7,505 nga magwarali an nag-ebakwit

•   860 nga balay an naguba o nabungkag

•   90 nga Kingdom Hall ngan usa nga Assembly Hall an ginbahaan

 Sobra $250,000 an gin-gasto ha disaster relief, upod hini an:

•   Mga pagkaon sugad han bugas, beans, ngan noodles

•   Mga gamit ha balay sugad han mga kama ngan moskitero

•   Pag-ayad o pagtukod utro han naguba nga mga balay

 Paonan-o ginsiguro han kabugtoan nga an mga donasyon gin-gamit ha maaramon nga paagi? Usa nga paagi amo an pag-usisa hin maopay han tagsa nga bilding basi mahibaroan kon puydi pa ba ito maayad. Kon kinahanglan tukuron ito utro, nagamit hira hin simple nga disenyo nga komon hito nga lugar.

 Mapasalamaton gud an kabugtoan nga nakakarawat hin bulig. Usa nga sister an nagsiring: “Daku gud an epekto han baha ha amon kinabuhi tungod kay nadaot an ngatanan namon nga uma ngan nawad-an kami hin balay. Nalipay kami han an kabugtoan inabot hito mismo nga adlaw basi buligan kami ngan taganahan hin talwas nga mauukyan. Nalipay liwat kami han nakakarawat kami hin mga pagkaon tikang ha sanga nga opisina. Nabantad gud an amon kasingkasing kay nakita mismo namon an katumanan han Juan 13:34, 35 ha amon kinabuhi. . . . May-ada gud tinuod nga gugma. Ako ngan an bug-os ko nga pamilya kinasingkasing nga nagpapasalamat ha kabugtoan kay binulig hira ha amon ha panahon nga ginkikinahanglan namon ito.”

 An iba ha komunidad nakapansin han aton relief work. Ini an siring han usa nga lider han komunidad ha Sabagreia, Bayelsa State: “Damu an organisasyon ngan singbahan ha kalibotan, pero an mga Saksi ni Jehova la an nagbuhat hin sugad hini. . . . [An iyo] organisasyon usa han pinakamaopay ha kalibotan.”

 Han Pebrero 2023, sobra 400 nga sunog an nagin hinungdan han daku nga kadaot ha Chile. Sobra 430,000 ka ektarya han katunaan, upod na an pipira nga importante nga imprastraktura ha Chile, an nabungkag. Mga 8,000 ka tawo an nag-ebakwit. Nag-organisar dayon an sanga nga opisina hin relief work.

•   222 nga magwarali an kinahanglan mag-ebakwit

•   20 nga balay an nabungkag

 Sobra $200,000 an gin-gasto ha disaster relief, upod hini an:

•   Pagkaon ngan tubig

•   Gasolina, mga gamit ha panlimpyo, ngan mga medisina

•   Pagtukod utro han naguba nga mga balay

 Usa nga pamilya an diri makatoo han nakita nira nga an ngatanan nira nga panag-iya nabungkag, upod na an ira balay ngan negosyo. Nawad-an hira hin pakabuhi. Han siyahan nga pipira ka adlaw, nasubo gud an pamilya han nakita nira nga bakante na an lote diin nahimumutang hadto an ira balay. Pero samtang gintutukod utro an ira balay, nagtikaopay an ira pag-abat. An gugma ngan pagpalangga nga ginpakita ha ira han mga boluntaryo nakabulig ha ira nga makaya an ira kahimtang. Tungod kay an pamilya nabantad gud hini nga eksperyensya, inapi hira ha pagboluntaryo ngan binulig ha pagtukod utro han balay han usa nga bugto.

 Damu han aton kabugtoan an naimpres tungod han relief work. Usa nga brother an nagsiring: “Maopay gud an kahikayan ni Jehova ha pagkaada hin mga Disaster Relief Committee. Kinabuwasan katapos han trahedya, adto dayon hira kon diin ito nahitabo ngan nagtatagana hin nangunguna nga mga panginahanglan. Makaparig-on nga mabasa an parte ha mga disaster relief nga ginbubuhat ha iba nga mga bahin han kalibotan. Pero iba gud kon ikaw mismo an nakakaeksperyensya hini. Mas naaapresyar mo an organisasyon; an paagi han kabugtoan ha pagsubad han mga kalidad ni Jehova; ngan an ira pangalimbasog nga magkaada kami han amon mga ginkikinahanglan ha materyal, espirituwal, ngan emosyonal. Nakita mismo namon an gugma ni Jehova.”

 Samtang nagtitikahirani an kataposan hini nga sistema, padayon naton nga makikita an pagtikadamu han mga kalamidad. (Lucas 21:10, 11) Bisan pa hini, pinaagi han Kristiano nga kongregasyon, nakikita liwat naton nga an aton mahigugmaon nga Hadi, hi Kristo Jesus, kaupod naton “ha ngatanan nga adlaw tubtob ha ikatarapos han sistema han mga butang.” (Mateo 28:20) An iyo hura nga donasyon ha worldwide work, gamit an donate.dan124.com ngan an iba pa nga paagi, upod an iyo paggahin hin panahon ngan kusog, nagpapakita han iyo suporta ha Ginhadian ngan ha mahigugmaon nga Hadi hito. Salamat han iyo padayon nga pagin mahinatagon.