Karuyag gud han Nagmamando nga Lawas nga gamiton an mga donasyon ha pagtagana hin mga pasilidad nga mabulig ha aton nga matuman an buruhaton nga pagsangyaw han Ginhadian. Pananglitan, han 2023 nga tuig han pag-alagad, an mga korporasyon nga ginagamit han mga branch office han mga Saksi ni Jehova naggasto hin sobra 500 milyon ka dolyar basi pumalit, magtukod, mag-renovate, ngan magmintinar hin mga Kingdom Hall ngan Assembly Hall ha bug-os nga kalibotan. a Ini nga kantidad diri pa upod ha gin-gasto han mga kongregasyon ha bug-os nga kalibotan ha pag-ataman han ira mga Kingdom Hall.

 Dugang pa, an mga donasyon ginagamit liwat ha pagtukod ngan pag-ataman han mga pasilidad han branch, nga nabulig basi organisaron ngan suportaran an pagsangyaw nga buruhaton ha bug-os nga kalibotan. Ginpasimple naton an mga buruhaton ha mga branch basi magamit naton an mga pundo ha pagsuporta han pagpanukod ngan pag-renovate han mga Kingdom Hall ngan Assembly Hall. Pero daku la gihap nga kantidad an ginkikinahanglan ha pag-ayad, pag-renovate, o pagbalhin han mga pasilidad han branch. Kay ano nga importante ini nga mga proyekto? Paonan-o ginsusuportaran han mga branch an importante nga buruhaton ha mga teritoryo nga sakop hito? Kitaon ta.

 Damu nga branch office an sobra 30 or 40 ka tuig na an kaihaon! Hi Nicholas, tikang ha Worldwide Design/Construction Department, nagsiring: “Bisan an bilding nga maopay an pagkamintinar nadadaan ngan nagkakaada dagku nga problema paglabay han panahon. An pag-renovate nabulig basi mag-iha an kinabuhi han usa nga bilding para padayon ito nga magamit.”

 An mga pasilidad han Bethel dapat liwat ipahiuyon basi padayon nga makasuporta ha mga panginahanglan han organisasyon. Ha bug-os nga kalibotan, nagdamu na gud an mga magwarali tikang han panahon nga gintukod an damu han mga branch office. Basi masuportaran ini nga pag-uswag, nagkinahanglan kita hin mas damu nga boluntaryo nga magtatrabaho dinhi hini nga mga opisina. Sugad nga resulta, an mga pasilidad nga sakto an kadaku hadto diri na gud igo yana para ha mga boluntaryo!

 Usa pa nga ginkukonsiderar amo an safety. Samtang mas nagtitikahirani kita ha kataposan hini nga sistema, mas nagtitikadamu an mga kalamidad nga nagbubutang han aton kinabuhi ha peligro. (Lucas 21:11) An paggamit han pinakabag-o nga mga pamaagi ha pag-renovate nakakabulig nga magin mas safe an mga pasilidad para ha mga nagtatrabaho didto. Tungod liwat hini, mahimo magin mas masayon para ha kabugtoan nga gamiton an mga pasilidad ha pag-organisar han panhatag hin relief ngan ha padayon nga pagsuporta ha buruhaton ha teritoryo nga sakop han branch katapos han usa nga kalamidad.

 Ha paggiya han Nagmamando nga Lawas, damu nga pagpanukod an ginhimo ha 43 nga pasilidad han branch han 2023 nga tuig han pag-alagad. Karuyag sidngon nga may pagpanukod nga ginhihimo ha haros katunga han ngatanan nga pasilidad han Bethel ha bug-os nga kalibotan. Pansina an pipira nga ehemplo nga nagpapakita han pagkaimportante hini nga buruhaton.

 Angola. Hi Matt, nga membro han Branch Committee ha Angola, nagsiring: “Pribilehiyo namon nga makita nga an tagna ha Hagai 2:7 natutuman ha espesyal nga paagi. Ha sulod la hin napulo ka tuig, nagkaada 60 porsyento nga pag-uswag ha kadamu han magwarali! Basi masuportaran hira, kinahanglan magtriple an kadamu han pamilya han Bethel. Pero tungod kay limitado la an kadaku han aton mga pasilidad, gutiay la an matatawag para magtrabaho dinhi. Nagresulta ini ha sobra nga pagtrabaho ngan agsob nga pag-overtime han damu nga Bethelite.”

 May mga brother nga gintokahan ha pag-usisa kon paonan-o mapapadaku an pasilidad han branch. Ha siyahan, nahunahuna nira nga an madali ngan praktikal nga solusyon amo an pag-renovate han bilding han branch. Pero katapos mag-research hin maopay, nasantop nira nga an pag-renovate diri amo an pinakamaopay nga paagi ha paggamit han mga donasyon. Lugod, iginrekomendar nira nga paliton ngan i-renovate an kahirani nga bilding. “Han siyahan nga iginpresenta ha Branch Committee an opsyon ha pagpalit ngan pag-renovate hin bilding nga natukod na, nabaraka kami nga diri ito magigin maopay nga pasilidad kon ikompara ha usa nga gintukod namon mismo,” siring ni Matt. “Pero yana, nakikita namon nga ito nga bilding angayan gud ha amon panginahanglan. Ginbendisyonan ni Jehova ini nga desisyon.”

 An branch ha Angola posible gud magkinahanglan hin dugang pa nga lugar ha tiarabot. Pero an bag-o nga bilding, pati na an modular housing ha sulod han Bethel ngan ginrirentahan nga mga apartment ha gawas, naghatag ha branch office han lugar nga ginkikinahanglan basi padayon nga masuportaran an daku gud nga pag-uswag ha teritoryo nga sakop hito.

 Japan. An nangunguna nga mga bilding han branch gintukod haros 40 ka tuig na an naglabay ngan an kadam-an hito waray pa gud umagi hin daku nga pag-renovate. Damu na an ginhimo basi mamintinar an pasilidad, pero bisan pa hinin maduruto nga pag-ataman, an mga bilding mas maiha na gud nga nagamit kay ha orihinal nga pagkadisenyo hito. Tungod hini, nagpapadayon yana an daku nga proyekto han pag-renovate.

 An pagkinabuhi ha Bethel nagbag-o liwat ha paglabay han mga tuig. Antes han 2015, an pamahaw, paniudto, ngan pangiklop igin-aandam para ha pamilya han Bethel. Salit damu nga kwarto ha Bethel ha Japan an ginhimoan hin kurokusina. Yana, an mga Bethelite na an nag-aandam han kadam-an han ira pagkaon. Han gin-renovate an mga kwarto ha Bethel, ginhimoan ito hin mas maopay nga kusina, salit mas masayon na para ha mga Bethelite nga magluto hin pagkaon. Hi Kumiko, usa nga sister nga nag-aalagad ha branch ha Japan, nagsiring, “Tungod hini nga kusina, inaabat ko nga baga hin aada la ako ha balay, ngan nabulig ito ha akon nga bug-os nga masuportaran an bag-o nga mga kahikayan ha Bethel.”

 An trabaho nga ginbubuhat ha branch ha Japan importante gud ha bug-os-kalibotan nga buruhaton. (Mateo 28:19, 20) An Japan usa han duha la nga branch nga nag-iimprinta han bug-os nga Biblia. Salit usa nga bahin han nagpapadayon nga proyekto han pagpanukod amo an pag-install hin equipment para ha pag-trim ngan pagkolekta hin tapotapo basi magin safe an tanan nga nagtatrabaho ha Printery. An pagpalit ngan pag-install hini nga equipment nagkakantidad hin haros usa ka milyon ka dolyar, pero nasisiguro hito nga an branch makakapadayon ha pag-imprinta ngan pagpadara hin espirituwal nga pagkaon.

 Ginprayoridad nga maipadayon an pag-imprinta han Biblia ha panahon han pagpanukod. Hi Trey, nga membro han Branch Committee ha Japan, nagsiring: “Ha panahon han pagpanukod, an aton organisasyon nagrirelis hin mas damu nga hubad han Biblia, ngan ha bug-os nga kalibotan mas nagtitikadamu an nagkikinahanglan hin Biblia. An pag-eskedyol han pag-install hin bag-o nga equipment ngan pagpublikar hin mga literatura nagkinahanglan hin maopay nga kooperasyon han damu nga departamento ngan han kontraktor.” Bisan pa hinin makuri nga mga sitwasyon, haros 220,000 nga Biblia an naimprinta kada bulan butnga han Marso ngan Agosto 2023—han ginbubuhat an pinakadaku nga bahin han proyekto nga pagpanukod ha Printery. Natapos ini ngatanan nga buruhaton nga waray madugangi an gasto para hini nga proyekto.

 An pagtipid hin koryente usa pa nga importante nga bahin han proyekto nga pag-renovate. Mag-i-install hin bag-o nga mga solar panel, nga makakatipid hin mga $120,000 nga gasto para ha koryente kada tuig. Mag-i-install hin mga bintana nga may tulo ka layer nga salamin, salit mas maiibanan pa an konsumo hin koryente, nga makakatipid hin mga $10,000 kada tuig. Bisan kon makakadugang ini ha gasto han proyekto nga pag-renovate, ginbabanabana nga makakatipid ini hin sobra 3.5 milyon ka dolyar ha panahon nga gagamiton an mga panel ngan bintana. Makakaiban liwat ini ha magigin epekto han mga bilding ha palibot.

 Inin duha nga proyekto han mga branch nagpapakita kon ano kadamu nga trabaho an ginkikinahanglan basi masiguro nga an aton mga pasilidad han Bethel makakasuporta ha panginahanglan han mga teritoryo nga sakop hito. Pero diri pa tapos an trabaho. “Damu na an nahimo, pero mas damu pa gud an kinahanglan buhaton,” siring ni Aaron, tikang ha Worldwide Design/Construction Department. Paonan-o ini mahihimo? Nagpadayon hiya: “Labot la ha damu nga donasyon nga nabulig basi pundohan inin importante nga mga proyekto, gin-aapresyar liwat namon an pagin andam han ngatanan nga nagboluntaryo ha naglabay ngan han mga naghihimo hin pagbag-o ha ira kinabuhi basi makaboluntaryo ha tiarabot. An pisikal ngan pinansyal nga suporta han aton kabugtoan daku gud nga pamatuod han bendisyon ni Jehova.”—Salmo 110:3.

 An ngatanan naton nga pagpanukod ngan pag-renovate ginsusuportaran han boluntaryo nga mga donasyon, nga damu hito an ginhihimo gamit an donate.dan124.com. Salamat gud han iyo padayon nga pagkamahinatagon.