Han Domingo han gab-i, Pebrero 24, 1924, an bag-o nga estasyon han radyo han mga Estudyante han Biblia, a an WBBR, nagtikang pagbrodkast ha siyahan nga higayon. Pariho daw la ha ano an ira siyahan nga pagbrodkast? Hin-o an nakapamati hito? Ngan paonan-o an mga Saksi ni Jehova padayon nga naggamit han pinakabag-o nga teknolohiya basi maipasamwak an “maopay nga sumat han Ginhadian . . . ha bug-os nga inuukyan nga tuna”?—Mateo 24:14.

 An siyahan nga pagbrodkast nagtikang ha alas 8:30 han kulop, ngan katapos hin duha ka oras, nahuman ito. Ginhimo an programa ha usa nga bag-o nga gintukod nga estudyo ha Staten Island, New York. An lead sound engineer nga hi Brother Ralph Leffler, nagsiring nga “eksayted ngan ginkukulba” an ngatanan nga nakadto ha estudyo. “May-ada ba mamati ha amon?” nahunahuna niya. “Gin-on ko an power, ngan gintikangan namon an programa, nga naglalaom nga magigin okey an ngatanan.”

 Hi Brother Victor Schmidt, an announcer hiton makasaysayan nga pagbrodkast, amo an manager han estasyon. Gintikangan niya an programa pinaagi ha pagpakilala han pipira nga musikero ngan singer, nga hira ngatanan mga Estudyante han Biblia. Siyahan, usa nga brother an nag-piano hin classic nga musika. Katapos, hi Cora Wellman nagkanta han “The Ninety and Nine,” nga basado han parabola ni Jesus ha nawara nga karnero. (Lucas 15:4-7) Ngan sumunod an iba pa nga performance, upod na hi Frederick W. Franz, nga nagkanta han “The Penitent,” usa nga kanta nga nagsusumat han istorya han nawara, o makaragon nga anak.—Lucas 15:11-25.

 Hi Joseph F. Rutherford, nga amo an nangunguna ha mga Estudyante han Biblia hito nga panahon, nagpresenta hin pahayag basi idedikar an estasyon nga “para ha mga buruhaton han ginhadian han Mesias.” Hiya nagsiring: “Tungod kay gintugotan han Ginoo nga maimbento an radyo hini nga panahon, sigurado nga kaburut-on Niya nga gamiton ito ha pagtutdo ha mga tawo mahitungod ha katumanan han Iya mga tagna.”

 Damu an nakapamati ha northeastern United States hiton siyahan nga pagbrodkast. Sobra 320 ka kilometro an kahirayo, may usa nga mamarati ha Morrisville, Vermont, an nagsiring: “Nalilipay ako nga isumat ha iyo nga klaro ko nga napamatian an pagbrodkast. . . . An boses ni Brother Rutherford klaro gud. . . . Nabatian ko an tanan nga iya ginsiring.” Bisan pa ngani an usa nga mamarati ha Monticello, Florida, nakapamati han programa! Nagin malampuson gud an bag-o nga estasyon han radyo, ngan damu nga tawo an nagpadara hin surat basi magpasalamat.

 An estasyon nagpadayon ha pagbrodkast han mensahe han Ginhadian ha sulod hin 33 ka tuig, b labi na ha mga lugar ha northeastern United States. Pero usahay, an WBBR nakonektar ha iba nga mga estasyon, salit minilyon nga mamarati an naaabot ha United States, Canada, ngan bisan ha mas hirayo pa. Ngani, an 1975 Yearbook of Jehovah’s Witnesses nagsiring: “Han 1933, an tuig nga an estasyon nakagbrodkast ha pinakadamu nga tawo, 408 nga estasyon an gin-gamit han pagbrodkast han mensahe ha unom nga kontinente, ngan 23,783 nga iba-iba nga pahayag nga basado ha Biblia an iginbrodkast . . . Hito nga panahon, durungan nga iginpi-play an mga pagbrodkast han Watch Tower ha damu nga iba-iba nga estasyon han radyo. An mga tawo ha bisan diin nga namamati ha radyo mahimo makapamati han mga pulong han kamatuoran nga nagdadayaw ha Dios.”

 Han an mga Estudyante han Biblia nagtikang paggamit han WBBR, may-ada pa la aberids nga 1,064 nga magwarali han Ginhadian ha United States. An mga pagbrodkast nakabulig hinin gutiay nga grupo nga maabot han maopay nga sumat an mas damu nga tawo. Pero han 1957, may-ada na magwarali han Ginhadian ha United States ha aberids nga 187,762 ngan 653,273 ha bug-os nga kalibotan. Labot pa hito, tungod han training nga igintagana ha mga katirok ha kongregasyon, adton madasigon nga kabugtoan nagigin mas epektibo ha pagsangyaw ha balay-balay ngan ha iba pa nga paagi han ministeryo.

 An sugad nga positibo nga mga pagbag-o nagpagios ha mga brother nga nangunguna nga usisahon an mga kapulsanan han pagbrodkast ha radyo kon ikompara ha pagsangyaw ha balay-balay. Ano an resulta? Nagdesisyon hira nga ibaligya an WBBR, an amo la nga estasyon nga gintatag-iya ngan gin-o-operate han Watchtower Society. An estasyon naibaligya han Abril 15, 1957. Ha adlaw antes hito, ha panahon han espesyal nga kataposan nga pagbrodkast, hi Nathan H. Knorr ginpakianhan kon kay ano nga iginbabaligya an estasyon. Hiya nagsaysay nga an pagtikadamu han mga Saksi ni Jehova yana, tungod ito han pagsangyaw ha balay-balay. “Damu an nabuligan na gud han mga pagbrodkast han WBBR,” siring niya, ngan hiya nagdugang: “Pero pariho la an kadamu han pag-uswag han mga Saksi ni Jehova ha mga lugar nga nakakabati ngan diri nakakabati han WBBR.” Salit an mga brother nakasiring nga mas damu an nahihimo ha pagsangyaw ha balay-balay kay han radyo. Pero diri ito an kataposan han pagbrodkast. Paglabay hin mga dekada, gin-gamit ito utro pero ha iba na nga paagi.

 Han Oktubre 6, 2014, may usa nga eksayting gud nga pag-uswag ha organisasyon ni Jehova—gintikangan an estasyon ha TV pinaagi han Internet nga gintatawag nga JW Broadcasting. An mga Saksi ni Jehova ngan an iba pa, nagkikita ngan namamati han binulan nga pagbrodkast pinaagi hin Web browser, JW Library app, mga streaming device, o satellite receiver. c Pero ha pipira nga bahin han kalibotan, an katawohan ni Jehova nagamit la gihapon hin radyo ngan TV para han ira pagsangyaw nga buruhaton. Ano an karuyag sidngon hito?

 Hinin bag-o la nga mga tuig, naggamit an organisasyon ni Jehova hin radyo ngan TV pinaagi han diri Saksi nga mga kompanya ha pagbrodkast han sinemana nga mga katirok han kongregasyon ngan pati liwat han mga kombensyon ha mga lugar nga maluya an Internet. Naabot liwat hini nga mga pagbrodkast an damu nga diri Saksi, upod na an damu nga interesado. Pananglitan, ha kabutngaan han 2021 ngan 2022, an mga manager han estasyon han radyo nagsiring ha branch office han mga Saksi ni Jehova ha East Africa nga damu nga diri Saksi an nagpahayag han ira pagpasalamat ha aton mga katirok. Damu nga mamarati ha Kenya, South Sudan, ngan Tanzania an naghangyo pa ngani nga magpa-Bible study.

 Pero an nangunguna nga paagi han pagsangyaw han mga Saksi ni Jehova amo an pagsangyaw ha balay-balay, paggamit hin mga cart, ngan jw.org nga website basi ipasamwak an mensahe han Ginhadian ha bug-os nga kalibotan. Pinaagi han aton website masayon nga nababasa han mga interesado an aton Biblia pati liwat an mga literatura nga basado ha Biblia ha sobra 1,080 nga linggwahe—an ngatanan waray bayad. Mahimo liwat hira mahibaro han mga baton han mga pakiana ha Biblia ngan kon diin ngan san-o hira puydi umatender ha Kristiano nga mga katirok. Sugad nga resulta hini nga mga butang, mas masayon na yana para ha mga tawo nga mahibaroan an maopay nga sumat han Ginhadian han Dios kay ha kakan-o pa man! Ha pagkatinuod, iginsasangyaw na ito “ha bug-os nga inuukyan nga tuna,” sugad la han igintagna han Biblia.—Mateo 24:14.