“Nagdaku ako ha uma,” siring ni Agostinho, nga taga-Brazil. “Pobre gud kami. Kinahanglan ko umundang pag-eskwela basi magtrabaho ngan makabulig ha amon pamilya.” Hi Agostinho nahibaro la pagbasa ngan pagsurat han 33 anyos na hiya. Hiya nagsiring: “Yana nga maaram na ako magbasa ngan magsurat, mas nagkaada na ako hin kompyansa ha kalugaringon.”

 Hi Agostinho usa han sobra 250,000 nga tawo nga natutdoan han mga Saksi ni Jehova ha pagbasa ngan pagsurat ha naglabay nga 70 ka tuig. Kay ano nga ginhihimo han mga Saksi ni Jehova an sugad nga mga klase? Paonan-o nagpapahimulos an ira mga natututdoan?

 Han 1935, an mga Saksi ni Jehova nagsasangyaw na ha 115 nga nasud. Basi masangyawan an mga tawo nga iba-iba an linggwahe, ginpapatokar han mga misyonero an mga rekording han ginhubad nga mga pahayag tikang ha Biblia, ngan usahay nagtatanyag hira hin mga literatura ha lokal nga mga linggwahe. Bisan kon damu an interesado ha Biblia, an iba ha ira nakukurian mahibaro tungod kay diri hira maaram magbasa ngan magsurat.

 Tungod kay diri kaya basahon han mga tawo an Biblia, nakukurian hira kon paonan-o iaaplikar an mga prinsipyo ha Biblia. (Josue 1:8; Salmo 1:2, 3) Nakukurian liwat hira pagtuman han ira mga responsabilidad sugad nga Kristiano. Pananglitan, kon an mga kag-anak diri maaram magbasa, makukurian hira ha pagtutdo ha ira mga anak. (Deuteronomio 6:6, 7) Ngan an bag-o nga mga Saksi nga diri maaram magbasa malilimitahan an ira abilidad ha paggamit han Biblia kon nagtututdo hira ha iba.

 Han dekada han 1940 ngan 1950, hira Nathan H. Knorr ngan Milton G. Henschel, nga kaapi hadton nangunguna ha mga Saksi ni Jehova, nagbiyahe ngadto ha iba-iba nga nasud basi bumulig pag-organisar han pagsangyaw nga buruhaton. Ha mga nasud nga damu an diri maaram magbasa ngan magsurat, gin-aghat nira an mga sanga nga opisina didto nga magkaada mga klase ha mga kongregasyon basi magtutdo ha pagbasa ngan pagsurat.

 An mga sanga nga opisina naghatag hin mga instruksyon ha mga kongregasyon kon paonan-o hihimoon ito nga mga klase. Ha iba nga mga nasud, an mga gobyerno may mga programa na ha pagtutdo nga magagamit han mga Saksi. Pananglitan, ha Brazil, an sanga nga opisina nakakarawat hin mga gamit ngan mga libro tikang ha gobyerno ngan ginpadara ito ha mga kongregasyon. Ha iba nga mga nasud, an mga Saksi kinahanglan maghimo hin kalugaringon nga programa ha pagtutdo.

 Puydi umiskwela hini nga mga klase an mga lalaki ngan mga babaye, bata ngan lagas. Katuyoan hini nga an mga estudyante tutdoan ha pagbasa han ira kalugaringon nga linggwahe. Salit an usa nga kongregasyon posible nga nagtututdo hin pipira nga linggwahe.

 Paonan-o nagpapahimulos an mga tawo hini nga programa ha pagtutdo ha pagbasa ngan pagsurat? Usa nga Saksi ha Mexico an nagsiring: “Naiintindihan ko na yana an kahulogan han Biblia, salit nababantad hito an akon kasingkasing. Tungod kay maaram na ako magbasa, diri na ako nag-aalang pakiistorya ha akon mga amyaw, ngan mas damu na an akon nasasangyawan han mensahe han Biblia.”

 An kapulsanan hini nga programa diri la kay nabubuligan hito an mga tawo nga maintindihan an Biblia. Hi Isaac nga taga-Burundi nagsiring: “Tungod kay maaram na ako magbasa ngan magsurat, nakabulig ini ha akon nga mahibaro hin mga skill ha konstruksyon. Ito na an akon nagin trabaho, ngan yana nagsu-supervise na ako hin dagku nga mga proyekto ha konstruksyon.”

 Hi Jesusa nga taga-Peru, 49 anyos na han ineskwela hiya hini nga programa. “Sugad nga asawa,” siring niya, “kinahanglan ko kitaon an mga presyo ngan mga ngaran han mga paninda ha merkado. Hadto, nakukurian ako hito. Tungod hini nga programa, mas may kompyansa na ako kon namamalit para ha akon pamilya.”

 Ha naglabay nga mga tuig, gindayaw han mga opisyal han iba-iba nga nasud an mga Saksi ni Jehova tungod han ira ginbubuhat nga pagpanutdo ha pagbasa ngan pagsurat. Yana, ginbubuhat la gihapon ito han mga Saksi ni Jehova, gamit an mga programa ngan mga garamiton nga mas ginpapaopay pa gud samtang nalabay an mga tuig. Naghimo liwat hira ngan nag-imprinta hin haros 224 milyon nga brosyur ha 720 nga linggwahe basi buligan an mga tawo nga mahibaro pagbasa o basi buligan adton limitado an edukasyon. a