“Ginhihinulat Ko an Iyo Tawag”
Siyahan nga natestingan ni Ed ngan han iya asawa nga hi Jennie an phone witnessing han 2010. a “Diri ko gud ito karuyag,” siring ni Jennie. “Ginsidngan ko an akon bana, ‘Diri ko na gud ito bubuhaton utro!’” Ito liwat an inabat ni Ed. Hiya nagsiring, “Diri ko karuyag makakarawat hin mga tawag tikang ha mga parabaligya, salit diri ko maimadyin an akon kalugaringon nga mag-phone witnessing.”
Pero nagtikang an COVID-19 nga pandemya, ngan an mga Saksi ni Jehova waray na magbalay-balay. Kondi sugad nga pagsugot han sugo ni Jesus nga isangyaw an maopay nga sumat, nagpadayon hira ha ira ministeryo, kasagaran pinaagi hin letter writing ngan phone witnessing. (Mateo 24:14; 28:19, 20) Ha pariho nga paagi, an Kristiano nga mga katirok, upod na an katirok para ha pagsangyaw, ginbubuhat pinaagi ha videoconference. Ha usa hito nga mga katirok, nagkaada hi Ed kaisog nga testingan utro an phone witnessing. Ano an iya inabat han matikang na hiya ha pagtawag? Hiya nagsiring, “Ginkulba gud ako salit nag-ampo ako para hin bulig! Katapos, tumawag na ako. Ngan dida ko nakilala hi Tyrone.” b
Hi Tyrone ngan an iya asawa nga hi Edith naukoy ha hirayo nga bahin han Kentucky, U.S.A. Ha edad nga 83, diri na nakakakita hin maopay hi Tyrone. Bisan pa hito, ginkarawat niya an tanyag ni Ed nga mag-aram han Biblia. Ginbabasa niya an ira gin-aadman pinaagi hin magnifying glass ngan regular na hiya nga nag-aaram ha Biblia kaupod hi Ed pinaagi ha tawag.
Paglabay hin usa ka bulan, hira Tyrone ngan Edith nagtikang pag-atender ha mga katirok han lokal nga kongregasyon. Pero tungod kay waray hira Internet, gintatawagan hira para mabatian an mga katirok. Ano an nakabulig kan Edith nga magin interesado ha kamatuoran?
Samtang nag-aaram kaupod hi Tyrone, nababatian nira Ed ngan Jennie hi Edith nga nabulig kan Tyrone ha pagbaton ngan ha pamiling hin mga teksto ha ira Biblia. Pero diri hiya interesado nga mag-aram. “Masurub-on hinduro an iya boses,” siring ni Jennie, “pero diri kami maaram ni Ed kon kay ano.”
Hira Ed ngan Jennie nga nagpu-phone witnessing
Usa ka adlaw, inabat ni Jennie nga kinahanglan niya makiistorya kan Edith. Salit han inabat niya nga ito na an maopay nga panahon para makiistorya, naghangyo hiya kan Ed nga hiya an magyakan. Nagsiring hiya, “Tyrone, nababatian ko an boses han imo asawa. Karuyag ko unta hiya pabasahon hin teksto o aroon an iya komento.”
Umundang anay hin madaliay hi Edith. Katapos, ha malumanay nga boses, nagsiring hiya, “Karuyag ko gud makiistorya ha imo. Saksi ni Jehova ako. Kwarenta ka tuig na ako nga diri aktibo.”
Diri makatoo hi Jennie. “Bugto ko ikaw!” siring niya, ngan nagtikang hira nga duha magtangis.
Waray pag-iha katapos hito, gintagan ni Ed hi Edith hin kopya han brosyur nga Balik kan Jehova. Ha sumunod nga mga semana, napansin nira Ed ngan Jennie an maopay nga pagbag-o kan Edith. Siring ni Ed, “Ha siyahan, masurub-on hinduro an iya boses. Yana, naaabat na ha iya boses nga malipayon hiya.” Hi Edith nagtikang nga magin duok kan Jehova ngan bumalik utro sugad nga malipayon nga parasangyaw han maopay nga sumat. An iya bana nabawtismohan sugad nga usa han mga Saksi ni Jehova han Hulyo 2022.
Kon ginhihinumdom ni Ed an iya inaabat hadto ha pag-phone witnessing, nahinunumdoman liwat niya an iya pakiistorya hadto kan Tyrone. Katapos basahon ni Ed an Juan 6:44 kan Tyrone ngan isaysay nga iginpapahirani ni Jehova an mga tawo ha kamatuoran, umuyon hiya, ngan nagsiring: “Ginhihinulat ko an iyo tawag.” Nalipay liwat hi Jennie nga hiya ngan an iya bana nagkaada kaisog nga makigbahin ha phone witnessing. Siring niya, “Ginbibendisyonan ni Jehova an sugad nga pangalimbasog.”