Ginrirespeto han mga Saksi ni Jehova an mga gobyerno ngan an mga simbolo han ira nasud. Ginkakarawat namon nga bangin magdesisyon an iba nga manumpa hin pagkamaunungon ha nasud, sumaludo ha bandera, o magkanta han national anthem.

 Pero nagdidesisyon an mga Saksi ni Jehova nga diri makigbahin ha sugad nga mga seremonya kay natoo kami nga diri ito uyon ha mga katutdoan han Biblia. Mapasalamaton kami kon ginrirespeto han iba an amon gintotoohan sugad la nga ginrirespeto namon an ira gintotoohan.

Hini nga artikulo

•  Ano an igintututdo han Biblia mahitungod hini?

•  Ano man kon igin-oobligar han balaud an pakigbahin hini nga mga seremonya?

•  May gindadapigan ba an mga Saksi ni Jehova ha mga isyu ha sosiedad o ha politika?

 Ini an duha nga importante nga katutdoan ha Biblia nga nakakaimpluwensya ha amon desisyon:

•   An Dios gud la an dapat namon singbahon. An Biblia nasiring: “Hi Jehova nga imo Dios an kinahanglan mo singbahon, ngan hiya gud la an kinahanglan mo tagan hin sagrado nga pag-alagad.” (Lucas 4:8) An mga panumpa hin pagkamaunungon ha nasud ngan an mga national anthem kasagaran na nga may mga pulong nga nagsasaad nga hihigugmaon han usa nga tawo an iya nasud labaw ha ngatanan. Salit para ha mga Saksi ni Jehova, sayop an pakigbahin ha sugad nga mga seremonya.

   Inaabat liwat han mga Saksi ni Jehova nga an pagsaludo ha bandera usa nga buhat han pagsingba, o idolatriya, nga igindidiri han Biblia. (1 Corinto 10:14) Ginkakarawat han pipira nga historyador nga an mga bandera han nasud matatawag nga mga simbolo han relihiyon. Ini an ginsurat han historyador nga hi Carlton J. H. Hayes: “An nasyonalismo sugad hin relihiyon nga an nangunguna nga simbolo ngan ginsisingba amo an bandera.” a Mahitungod ha siyahan nga mga Kristiano, an awtor nga hi Daniel P. Mannix nagsiring: “An mga Kristiano nagdumiri . . . paghalad ha espiritu nga nagbabantay ha emperador [han Roma]—puropariho yana ha pagdumiri ha pagsaludo ha bandera.” b

  Bisan kon an mga Saksi ni Jehova diri nasaludo ha bandera, diri liwat namon ito ginhuhugawan, ginsusunog, o ginhihimoan hin anoman nga butang nga nagpapakita hin kawaray-respeto hito o ha iba pa nga simbolo han nasud.

•   Parapriho an ngatanan nga tawo ha panhunahuna han Dios. (Buhat 10:34, 35) An Biblia nasiring nga “tikang ha usa nga tawo ginhimo [han Dios] an tagsa nga nasud han mga tawo.” (Buhat 17:26) Tungod hini, natoo an mga Saksi ni Jehova nga sayop an pagtratar ha usa nga lahi o nasyonalidad nga baga hin mas maopay ito kay ha iba. Ginrirespeto namon an ngatanan nga tawo, anoman an ira gintikangan o diin man hira naukoy.—1 Pedro 2:17.

 An mga Saksi ni Jehova diri nakontra ha gobyerno. Natoo kami nga an mga gobyerno bahin han “kahikayan han Dios” nga iya gintutugotan nga umeksister. (Roma 13:1-7) Natoo liwat kami nga an mga Kristiano dapat sumugot ha mga awtoridad han gobyerno.—Lucas 20:25.

 Pero ano man kon an mga balaud han gobyerno may iginpapabuhat nga igindidiri han Dios? Ha pipira nga kahimtang, puydi magpasa hin legal nga dokumento nga naghahangyo ha gobyerno nga i-adjust an mga balaud. c Kon diri ito puydi mabag-o, matinalahuron nga ginpipili han mga Saksi ni Jehova nga ‘sugton an Dios sugad nga magmarando imbes nga an mga tawo.’—Buhat 5:29.

 Waray. An mga Saksi ni Jehova waray gindadapigan ha mga isyu ha sosiedad ngan ha politika. Kon nalikay kami ha pagpanumpa hin pagkamaunungon ha nasud, pagsaludo ha bandera, o pagkanta han national anthem, diri ito tungod kay mga aktibista kami. Lugod, ginsusunod namon an amon mga gintotoohan nga nakabase ha Biblia may kalabotan hito nga mga seremonya.