Ephesians 3:1-21
3 Because of this one, me Paul, wey be prisoner because of Christ Jesus for una wey be people of the nations—
2 if true-true, una don hear about the work wey God give me to help una gain from the special favor,
3 say e make me know the holy secret wey e show me, just as I don first write small about-am to una.
4 So when una read this one, una go know how I understand the holy secret about Christ.
5 God no make the men for the other generations wey don pass to know this secret, just as e don use im spirit to make im holy apostles and prophets to know-am now.
6 The secret na say, make people of the nations wey don be one with Christ Jesus and through the good news, get* wetin we get and dey part of the body like us and share with us for the promise.
7 I become servant of this secret because of the free gift of the special favor of God wey e give me through im power.
8 Me wey no reach the smallest person among all the holy ones, God give me this special favor, so that I go preach the good news to people of the nations about the better-better things wey no get equal about Christ,
9 and make I help everybody to see how God wey make everything de arrange* the holy secret wey be hide for inside God long-long time ago.
10 This one happen so that now, through the congregation, the governments and the authorities for the heaven go fit know the sense wey God show for plenty different ways.
11 This one agree with the everlasting thing wey God get for mind to do wey e don form and wey connect with Christ, our Lord Jesus,
12 and because of-am we dey free to talk and dey free to pray with full trust through the faith wey we get for-am.
13 So I de tell una say make una no tire because of the things wey I de suffer for una, because this one go bring honor to una.
14 Because of this one, I kneel down for the Papa,
15 the Person wey all the family for heaven and for earth get their name from.
16 I pray say because of im plenty honor, make e use the power of im spirit to make the person wey una be inside to really dey strong,
17 and because of una faith make Christ live for una heart with love. Make una root dey strong and stand well ontop the foundation,
18 so that with all the holy ones, una go fit really understand well, how wide and long and high and deep the truth be,
19 and make una know the love wey Christ get, wey pass anything wey person fit know by far, so that una go fit really get everything wey God de give complete.
20 Now God, because of im power wey de work inside us, fit do more by far pass all the things wey we de ask for or de think about.
21 And make e get the honor through the congregation and through Christ Jesus go reach people for all generation forever and ever. Amen.
