John 18:1-40
-
Judas sell Jesus give im enemies (1-9)
-
Peter use sword cut person (10, 11)
-
Them carry Jesus go Annas place (12-14)
-
First time wey Peter deny Jesus (15-18)
-
Jesus dey front of Annas (19-24)
-
Second and third time wey Peter deny Jesus (25-27)
-
Jesus dey front of Pilate (28-40)
-
“My Kingdom no be part of this world” (36)
-
18 After Jesus don talk this things, e come cross the Kidʹron Valley with im disciples go where one garden dey, them come enter-am.
2 Now Judas, wey be the person wey sell-am give im enemies know the place too, because Jesus don go there many times with im disciples.
3 So Judas bring the group of soldiers and officers of the chief priests and of the Pharisee people, and them come with torch, lamps, and things wey them de take fight.
4 Then as Jesus know everything wey go soon happen to-am, e come out from among the disciples and ask the people say: “Who una de find?”
5 Them answer-am say: “Na Jesus wey come from Naz·a·reth.” E come tell them say: “Na me.” That time, Judas, wey sell-am give them stand with the people too.
6 But when Jesus tell them say, “Na me,” them shift go back and fall for ground.
7 So e ask them again: “Who una de find?” Them talk say: “Na Jesus wey come from Naz·a·reth.”
8 Jesus come answer them say: “I don tell una say na me. So if na me una de find, make una allow this men go.”
9 This one na to make wetin Jesus be don talk happen, say: “Out of all the people wey you give me, no one don lost.”
10 Then Simon Peter wey get sword pull-am out and use-am cut the right ear of the slave of the high priest comot. The name of the slave na Malchus.
11 But Jesus tell Peter say: “Put the sword inside im cover back. I no suppose drink the cup wey my Papa don give me?”
12 Then the soldiers and the army commander and the officers of Jew people catch* Jesus and tie-am.
13 Them first carry-am go meet Anʹnas, because na the papa of Caʹia·phas wife e be, and na Caʹia·phas be high priest that year.
14 The truth be say na Caʹia·phas advice the Jew people say e better for them make one person die for all the people.
15 Now Simon Peter with one other disciple, be de follow Jesus. The high priest know that disciple, and e follow Jesus enter the compound of the high priest.
16 But Peter be de stand outside for front of the door.* So the other disciple wey the high priest know, come go out go talk to the person wey de guard the door and carry Peter enter.
17 The girl wey be servant wey de guard the door come tell Peter say: “You no be one of this man disciples too, abi you be one of them?” E talk say: “I no be one of them.”
18 That time, the slaves and the officers be stand round one charcoal fire wey them make, because cold dey and them de use-am warm theirself. Peter too stand with them de warm imself.
19 So the chief priest come de ask Jesus questions about im disciples and about the things wey e de teach.
20 Jesus come answer-am say: “Na for front of everybody I don talk to the world. I de always teach people for synagogue and for temple, where all the Jew people de gather, and I no hide talk anything.
21 Why you come de ask me questions? Ask the people wey hear wetin I tell them. See! Them know wetin I talk.”
22 When e talk this one, one of the officers wey stand for there come slap Jesus for face and talk say: “Na chief priest you de answer like that?”
23 Jesus come answer-am say: “If I talk anything wey no correct, tell me wetin no correct wey I talk. But if wetin I talk correct, why you slap me?”
24 Then Anʹnas talk say make them carry-am go meet Caʹia·phas wey be high priest, and them still tie-am that time.
25 Now Simon Peter stand for there de warm imself. Then, them tell-am say: “You no be one of im disciples too, abi you be one of them?” But Peter deny-am, e talk say: “I no be one of them.”
26 One of the slaves of the high priest, wey be family person of the man wey Peter cut im ear comot, come talk say: “I see you when you dey with-am for the garden, abi I no see you?”
27 But Peter deny-am again, and at once, cock come crow.
28 Them come carry Jesus from Caʹia·phas place go the place wey the governor de stay, and this time na early morning. But them no enter where the governor de stay so that them no go dirty theirself, and so that them go fit chop the Passover.
29 So Pilate come out come meet them and ask them say: “Which bad thing una de talk say this man do?”
30 Them come answer-am say: “If to say this man no do any bad thing,* we for no carry-am come give you.
31 Pilate come tell them say: “Make una carry-am go, go use una law judge-am.” The Jew people come talk say: “We no get right to kill anybody.”
32 This one happen so that wetin Jesus talk to show the kind way wey e go die, go happen.
33 So Pilate enter im house* again, e call Jesus and ask-am say: “Na you be King of Jew people?”
34 Then Jesus ask-am say: “Na from your own mind you de ask this question abi na other people tell you about me?”
35 Pilate come tell-am say: “I no be Jew person, abi I be Jew person? Na your own country people and the chief priests carry you give me. Wetin you do?”
36 Jesus come answer-am say: “My Kingdom no be part of this world. If to say my Kingdom na part of this world, the people wey de follow me for fight so that them no go carry me give Jew people. But as e be, my Kingdom no come from this world.”
37 Pilate come ask-am say: “So you be king?” Jesus come answer say: “Na you yourself de talk say I be king. Na because of this one them born me and na because of this one I come the world so that I go tell people about the truth. Everybody wey dey for the side of the truth de listen to my voice.”
38 Pilate come ask-am say: “Wetin be truth?”
After e ask this one, e come go meet the Jew people for outside again and tell them say: “I no see any bad thing wey e do.
39 Apart from that one, una get one tradition say for every Passover, make I de release somebody give una. So una want make I release the King of Jew people give una?”
40 Them come shout again say: “No release this man, release Bar·abʹbas!” This Bar·abʹbas na criminal.
Footnotes
^ Or “arrest.”
^ Or “for where them take de enter.”
^ Or “no be bad person.”
^ Or “the place wey governor de stay.”
