Luke 23:1-56
23 So all the plenty people stand up and carry-am go meet Pilate.
2 Then them start to accuse-am de talk say: “We see say this man de turn our people against government, de talk say make them no pay tax to Caesar and e de talk say e be Christ wey be king.”
3 Pilate come ask-am say: “Na you be King of Jew people?” E come answer-am say: “Na you yourself de talk-am.”
4 Then Pilate tell the chief priests and the plenty people say: “I no see any bad thing wey this man do o.”
5 But them no gree, them come de talk say: “E de cause trouble among the people as e de teach for the whole Ju·de′a and na Gal′i·lee e start, come reach even here.”
6 When Pilate hear this one, e come ask whether na Gal′i·lee the man come from.
7 After e don find out say the man come from the area wey Herod de rule, e come say make them carry-am go meet Herod, wey be dey Jerusalem that time too.
8 When Herod see Jesus, e happy no be small, because e don tey wey e de hungry-am to see Jesus, because e don hear plenty things about-am and e de expect to see some miracles wey Jesus go do.
9 So e start to ask Jesus questions for long time, but Jesus no answer-am.
10 But the chief priests and the scribes* just de stand up de accuse-am up and down and them de vex.
11 Then Herod and im soldiers come de treat-am anyhow, and to use-am do yeye, e come wear one cloth wey fine well-well for Jesus body and talk say make them carry-am go give Pilate back.
12 For that very day, Herod and Pilate start to be friend, because na enemy them be before that time.
13 Then Pilate call the chief priests, the rulers, and the people together,
14 and tell them say: “Una carry this man come meet me say e de make people turn against government. Now see! I don ask-am questions for una front, but I no see anything wey show say this man do any of the things wey una de talk say e do.
15 Even Herod self no see anything, because e say make them bring-am back to us, and see! the man no do anything wey reach to kill-am.
16 So I go punish-am and release-am.”
17 *——
18 But all the plenty people shout say: “Kill this man,* and release Bar·ab′bas give us!”
19 (This man be don dey prison because e make people fight against government for the city and because say e kill person.)
20 But Pilate come talk to the people again because e want release Jesus.
21 Then them start to shout, de talk say: “Go kill-am for pole! Go kill-am for pole!”
22 For the third time, e come tell them say: “Why? Which bad thing this man do? I no see anything wey e do wey suppose reach to kill-am. So I go punish-am and release-am.”
23 As e talk this one, them come de shout more-more say make them kill-am,* sotey Pilate come gree.
24 So Pilate decide say make them do wetin the people want.
25 E release the man wey them say make e release, wey them be put for prison because say e make people fight against government and because say e kill person, but e carry Jesus give them say make them go do-am as them like.
26 Now as them de carry-am go, them come hold one man wey im name na Simon, wey come from Cy·re′ne. That time, e de come from outside the city, them come carry the torture pole* put ontop-am say make e carry-am follow Jesus.
27 Plenty-plenty people be de follow-am and some of them na women wey de really feel bad, de cry and de nack theirself because of-am.
28 Jesus come turn, face the women and talk say: “Daughters of Jerusalem, make una stop to cry for me, instead make una cry for unaself and una children.
29 Because see! time de come when people go talk say, ‘Women wey no fit born, and the belle wey no born pikin, and the breasts wey pikin no suck, go happy!’
30 Then, them go start to tell the mountains say, ‘Make una cover us!’ and them go tell the hills say, ‘Make una hide us!’
31 If them do this things when the tree dey fresh, wetin go happen when e don die?”
32 Them still carry two criminals de follow-am wey them want kill too.
33 And when them reach the place wey them de call Skull, them come nail-am for pole for there, with the two criminals, one dey for im right side and the other one dey for im left side.
34 But Jesus be de talk say: “Papa, forgive them because them no know wetin them de do.” Another thing be say, them cast lots take share im cloths.
35 And the people just stand de look, but the rulers de use-am do yeye, de talk say: “E save other people, make e save imself if na im be the Christ wey God send, the One Wey E Choose.”
36 Even the soldiers use-am do yeye, them carry sour wine go give-am,
37 and them de talk say: “If na you be the King of Jew people, save yourself.”
38 Them still write something and hang-am ontop the pole wey them nail-am put, say: “This na the King of Jew people.”
39 Then one of the criminals wey them hang for there too start to tell-am bad things. E talk say: “Na you be the Christ, no be so? Save yourself and save us too!”
40 But the other one come correct-am and tell-am say: “You no de fear God at all, now wey you don receive the same punishment with this man?
41 As for us, them suppose really punish us, because na the punishment wey we suppose receive for the things wey we do be this, but this man no do any bad thing.”
42 Then e talk say: “Jesus, remember me when you don enter your Kingdom.”
43 Jesus come tell-am say: “True-true, I de tell you today say, you go dey with me for Paradise.”
44 Well, by this time, na around the sixth hour,* but darkness cover the whole land until the ninth hour,*
45 because the sun stop to shine; then the curtain wey dey the temple* tear for middle, from top go reach down.
46 Jesus come talk with loud voice say: “Papa, I put my spirit for your hand.” After e talk this one, e come die.*
47 As the army officer see wetin happen, e start to praise God, de talk say: “True-true, this man na righteous man.”
48 And when all the plenty people wey gather for there to look wetin de happen see all this things wey happen, them come go back to their house de nack their chest.
49 And all the people wey know-am be stand for far place. The women wey follow-am come from Gal′i·lee be dey there too, and them see this things.
50 And see! e get one man wey im name na Joseph, wey be one of the people for the Council, and na good man wey de do wetin correct for God eye,
51 (This man no vote to support their plan and wetin them do.) Na Ar·i·ma·the′a e come from, wey be Ju·de′a people city, and e be de wait for the Kingdom of God.
52 This man go meet Pilate and talk say make them give-am Jesus body.
53 E bring the body down and use fine linen cloth wrap-am, and e carry-am put for grave* wey them dig inside rock, wey them never bury anybody inside before.
54 Now that day na Preparation day, and small time, the Sabbath day go start.
55 But the women wey follow-am come from Gal′i·lee, go too. Them look the grave* and see how them keep im body,
56 and them go back go prepare things wey get better-better scent with perfume oil them, but them still rest for the Sabbath day as the law talk.
Footnotes
^ Check the part, Meaning of Words.
^ This verse no dey for the first-first manuscripts, so e be like say e no be part of God Word.
^ For Greek na, “carry this one go.”
^ Or “kill-am for pole.”
^ Check the part, Meaning of Words.
^ This one na, around 12 o’clock for afternoon.
^ This one na, around 3 o’clock for afternoon.
^ This one na, the curtain wey separate the most holy place from the holy place.
^ Or “breathe im last breath.”
^ For Greek na, “grave of remembrance.”
^ For Greek na, “grave of remembrance.”
