Matthew 25:1-46
25 “Then the Kingdom wey dey heaven be like ten virgins wey carry their lamp comot to go meet the man wey de marry.
2 Five of them foolish, but the other five get sense.
3 This na because, the foolish ones no carry extra oil,* na only their lamp them carry,
4 but the ones wey get sense carry extra oil for container and their lamp.
5 As the man wey de marry no quick come, sleep come begin catch them, and them come sleep go.
6 But for midnight, them come hear loud voice wey de talk say: ‘The man wey de marry don come! Make una go out go meet-am.’
7 Then all the virgins wake up and start to arrange their lamps.
8 Then the foolish ones tell the ones wey get sense say, ‘Make una give us some of una oil, because our lamps go soon quench.’
9 So the ones wey get sense come talk say: ‘E fit be say wetin we get no go reach us and una, so e go better say make una go meet the people wey de sell-am and buy some for unaself.’
10 As them de comot go buy-am, the man wey de marry come come, and the virgins wey don ready follow-am enter the place wey them de do the marriage party, and them lock the door.
11 After, the other virgins still come, and them talk say, ‘Oga, Oga, open door for us!’
12 E come answer them say, ‘I de tell una true say, I no know una.’
13 “So make una continue to de watch, because una no know the day or the hour.
14 “Because e just be like one man wey want travel go another country, wey come call im slaves, and put the things wey e get for their hand.
15 E give one five talents,* e give another one, two talents, and e still give another one, one talent. E give all of them as their power reach and e travel go another country.
16 The one wey collect five talents no waste time, e go use the five talents do business and e gain another five talents.
17 Na so too the one wey collect two talents gain another two.
18 But the slave wey collect only one talent, go dig ground and hide im oga money* for there.
19 “After long time, the oga of the slaves come to check wetin the slaves don use im money do.
20 So the one wey collect five talents come, and bring another five talents join, and talk say, ‘Oga, na five talents you give me, see, I don gain another five talents.’
21 Im oga come tell-am say: ‘You do well, you be better slave wey them fit trust. You show say them fit trust you for small things, I go put plenty things for your hand wey you go care for. Come de happy with your oga.’
22 Then the one wey collect two talents come, and talk say, ‘Oga, na two talents you give me. See, I don gain another two talents.’
23 Im oga come tell-am say: ‘You do well, you be better slave wey them fit trust. You show say them fit trust you for small things, I go put plenty things for your hand wey you go care for. Come de happy with your oga.’
24 “Last-last, the slave wey collect one talent come, and talk say: ‘Oga, I know say you be hard man, wey de harvest for where e no plant, and wey de gather wheat wey other people don blow im chaff comot.
25 So fear catch me, I come go hide your talent for ground. See, na wetin you give me be this.’
26 Im oga come tell-am say: ‘You this wicked and lazy slave, so you de talk say I de harvest for where I no plant and de gather wheat wey other people don blow chaff comot, abi?
27 So, why you no put my money* for bank, so that as I come back, I go collect-am back with interest?
28 “‘So make una collect the talent from-am, and give-am to the slave wey get ten talents.
29 Because anybody wey get, them go give-am more and e go get plenty, but the person wey no get, even the one wey e get, them go collect-am from-am.
30 Make una throw the useless slave for outside wey darkness dey. Na there e go dey, de cry and de grind im teeth.’
31 “When the Son of man go come with im glory, and all the angels dey with-am, e go sitdown for im wonderful throne.
32 All the nations go gather for im front, and e go separate people, one from the other, just as shepherd de separate sheep from goat.
33 And e go put the sheep for im right hand side, but the goats go dey for im left hand side.
34 “Then the King go tell the people wey dey im right hand side say: ‘Make una come, una wey my Papa don bless, make una inherit the Kingdom wey them don prepare for una from when the world start.
35 Because when I de hungry, una give me something to chop. When my throat dry, una give me something to drink. When I be stranger, una welcome me;
36 when I dey naked,* una give me cloth to wear, when I sick, una take care of me, and when I dey prison, una come visit me.
37 Then the righteous people go tell-am say: ‘Lord, which time we see say you de hungry and give you food, or say your throat dry and give you something to drink?
38 Which time we see say you be stranger and welcome you well, or say you naked and give you cloth?
39 Which time we see say you de sick or say you dey prison and visit you?
40 Then the King go answer them say, ‘True-true, I de tell una say, as e be say una do-am for even the one wey small pass among this my brothers, na me una do-am for.’
41 “Then e go tell the ones wey dey im left hand side say: ‘Una wey them don curse, make una comot from my side go enter the fire wey de burn forever, wey them don prepare for the Devil and im angels.
42 Because when I de hungry, una no give me anything to chop, and when my throat dry, una no give me anything to drink.
43 When I be stranger, una no welcome me, when I dey naked, una no give me cloth, when I sick and dey for prison, una no help me.’
44 Then, them too go talk say: ‘Lord, which time we see say you de hungry or your throat dry or you be stranger or you naked or sick or dey for prison, and we no help you?’
45 Then e go answer them say: ‘True-true, I de tell una say, since una no do-am for one of this small ones, una no do-am for me.’
46 This people go die, and them no go ever get life again,* but the righteous people go get life wey no go end.”
Footnotes
^ This one na, wetin them de use that time like kerosene for lamp, and them de get-am from olive fruit.
^ One Greek talent na 20.4 kg (654 ounces).
^ For Greek na, “silver.”
^ For Greek na, “silver.”
^ Or “when I no wear better cloth.”
^ For Greek na, “Them go cut this people comot forever,” just as them de cut branch comot from tree.
