Revelation 11:1-19
11 Them come give me one stick wey be like rod* as e de talk say: “Stand up make you measure the holy place* of God for the temple, and the altar and the people wey de worship for there.
2 But leave the compound wey surround the holy place of the temple, make you no measure-am, because them don give-am to the nations, and them go match the holy city with their legs for 42 months.
3 I go make my two witness talk God message for 1,260 days and them go wear sackcloth.”
4 Na them the two olive trees and the two lampstands represent, and them stand for front of the Lord of the earth.
5 If anybody want do them bad thing, fire go come from their mouth and burn their enemies. If anybody want do them bad thing, na so them must kill-am.
6 Them get power to lock the sky,* make rain no fall for the time wey them go talk God message, and them get power to turn the water them to blood and to make different-different bad things happen for the earth, no matter how many times wey them want.
7 After them don talk their message finish, the big wicked animal wey come out from the abyss* go fight war with them, win them, and kill them.
8 And their dead body go dey for the main street of the great city wey Sodʹom and Egypt represent, the place wey them still kill their Lord for pole.
9 And people wey get different-different skin color, wey come from different-different tribes, wey de speak different-different language,* and wey come from different-different nations go look their dead body for three and half days, and them no go gree make them carry their dead body put for grave.
10 And the people wey de live for the earth go happy no be small because of them, and them go celebrate, and them go carry gift go give each other, because this two prophets cause trouble for the people wey de live for the earth.
11 After the three and half days, spirit of life wey come from God enter them, them come stand up, fear come catch the people wey see them no be small.
12 And them hear one loud voice from heaven wey tell them say: “Make una come up, come here.” Them come enter the cloud go heaven and their enemies see them.*
13 For that very time, ground come shake open well-well, and one part out of ten parts of the city fall, the ground wey shake open kill 7,000 people, the rest of the people come fear well-well and them honor God wey dey heaven.
14 The second trouble don pass. See! The third trouble de come quick-quick.
15 The seventh angel blow im trumpet. And I hear loud voice them wey de talk for heaven say: “The kingdom of the world don be the Kingdom of our Lord and of im Christ, and e go rule as king forever and ever.”
16 And the 24 elders wey sitdown for their thrones for front of God kneel down, put their face for ground and worship God,
17 de talk say: “We thank you, Jehovah God, the Almighty, the one wey dey and wey be dey, because you don use your plenty power and start to rule as king.
18 But the nations come vex well-well, you self come vex for them no be small, and the time wey you fix come reach wey them go take judge dead people and wey them go take pay your slaves the prophets, and the holy ones, and people wey de fear your name, the small ones and the big ones, and to destroy the people wey de spoil* the earth.”
19 Them come open the holy place of the temple of God wey dey heaven, I come see the ark of im agreement for the holy place of im temple. Then thunder come de strike with thunder light and ground shake open, and ice block fall well-well like rain, and I still hear different-different voice.
Footnotes
^ Or “rod wey them de take measure things.”
^ This one na, the part of the temple wey the Holy and the Most Holy rooms dey.
^ Or “heaven.”
^ Check the part, Meaning of Words.
^ Or “wey come from different-different tongue.”
^ Or “and their enemies de look them.”
^ Or “destroy.”
