1. Why plenty people today no trust Bible?

 PLENTY people today de fear to trust other people. Them no dey sure if people wey them respect, like science people, business people or people for politics really care about them. Another thing be say, they no really de respect leaders for religion wey claim say they be Christians. So, e no surprise us say plenty people no trust Bible wey be the book wey this leaders claim say them de follow.

2. As e dey for Psalm 119:160, wetin we fit dey sure of?

² All servants of Jehovah believe with all their heart say Jehovah na “the God of truth” and say na better thing e get for mind for us. (Ps. 31:5; Isa. 48:17) We know say we fit trust wetin we read for Bible and say, “everything wey [God] talk na true.” (Read Psalm 119:160.) One professor wey de talk about Bible talk say: “Everything wey God talk na true. All of them go happen as e talk-am. So, servants of God fit trust wetin e talk because they trust the God wey talk-am.” We really agree with wetin this professor talk.

3. Wetin we go talk about for this article?

³ How we fit help other people fit trust Bible just as we trust-am? Make we talk about three point wey go help us see why we fit trust Bible. We go learn say the message for Bible never change, how wetin Bible talk say go happen, de happen, and how the advice for Bible de change people life.

4. Why some people fit de think say the message for Bible don change?

⁴ Jehovah God use about 40 men wey de worship-am well,  write Bible. The truth be say, the one wey this men use their hand write no dey again. But before the original ones spoil, other people don make plenty copy of them. The ones wey we get now na the copy wey them make from the first copy them. This one fit make some people de ask say, ‘The message for Bible never change or na still the same message wey God use about 40 men write, we still de read?’ Wetin fit help you dey sure say the message for Bible never change?

5. Wetin show say the people wey copy the part of Bible wey them use Hebrew language write, dey careful? (Check picture for front cover.)

⁵ Jehovah really want protect e message, so e tell e people make they copy-am out. E command the kings for Israel make they copy the Law for theirself and choose the Levites to de teach e people the Law. (Deut. 17:18; 31:24-26; Neh. 8:7) After Babylon people carry Jew people go Babylon, some group of people wey really sabi copy book start to make plenty different-different copy of the part wey them use Hebrew language write. (Ezra 7:6, ftns.) This people really dey careful as them de copy-am. After some time, they start to count the words and the letters to dey sure say everything wey them copy correct. Because this people no perfect, them still make small-small mistake for the thing wey them copy. But as e be say them make plenty copy of the part wey them use Hebrew language write, e dey easy to see the mistakes wey them make. How?

6. How some professor know where mistake dey for the Bible wey people copy?

⁶ Some professor for this our time don really know how to find the mistakes wey some people make when them de copy Bible. For example: Think-am say them tell 100 people make they copy one page of one book with their hand. One of them make mistake for the one wey e copy. One way to find the mistake na to compare wetin e copy with the ones wey the other people copy. For the same way, some professor wey de put eye for Bible matter for this our time fit check and compare the different-different copy wey them use hand copy to see where mistake dey or the things wey one or some of the people wey copy Bible miss.

7. Wetin show say people wey copy Bible no change the message?

⁷ The people wey copy Bible do their best to make sure say the message no change. Make we see one example wey explain-am. The complete copy of the part of Bible wey them use Hebrew language write wey old pass, don dey since 1008 or 1009 C.E. Them de call-am Leningrad Codex. For this our time, they don see other different-different ones wey they use hand copy, but wey no complete. And them even old pass Leningrad Codex with about 1000 years. As e be say them copy the Leningrad Codex from the copy wey them make from this old copy, some people fit think say wetin dey inside Leningrad Codex go different from wetin dey this old copy. This one na because e don pass 1000 years wey them copy from this old copy before them later get Leningrad Codex. But when some professor compare this old copy with Leningrad Codex, they see say the message no change, na only the way them arrange some word change small.

8. When one professor compare the part of Bible wey them use Greek language write and other book wey them write around that time, wetin e talk?

⁸ Christians for apostles time follow the example of the people wey copy the part of Bible wey them use Hebrew language write. Them take time, sofri make plenty copy of the other 27 books of the Bible, wey them use  Greek language write. Na this plenty copy wey them make they use for congregation meeting and when them de preach. After one professor compare the part of Bible wey them use Greek language write with other book wey them write around that same time, e talk say: “For this our time, na the part of Bible wey them use Greek language write plenty pass . . . and e be like say the Bible still complete pass the other book them.” The book wey them de call, Anatomy of the New Testament talk say: “When we read the part of Bible wey them use Greek language write and them translate-am well, we dey sure say wetin we read for the Bible na the same message wey God use e servants write.”

9. With wetin Isaiah 40:8 talk, wetin we dey sure of about the message for Bible?

⁹ For plenty-plenty years, many people wey de copy Bible don sofri work hard to copy the Bible make mistake no enter. Na this one make us get correct Bible today. b We dey sure say na Jehovah do-am make e Word dey till this time and make the message no change. (Read Isaiah 40:8.) But, some people fit de talk say, because the message for Bible no change no mean say Bible na from God. So make we see some reasons why we believe say Bible na really from God.

10. Which example show say wetin dey 2 Peter 1:21 na true (Check the picture.)

¹⁰ Plenty things wey Bible talk happen the way e talk-am. Bible don talk plenty of them many-many years before them happen. The things wey don happen before-before show say wetin Bible talk de happen as e talk-am. This one no surprise us because we know say na Jehovah use e spirit tell e servants to write wetin go happen for Bible. (Read 2 Peter 1:21.) Think about wetin Bible talk when e say them go win and take over Babylon. Between the year 778 and 732 B.C.E., Jehovah move prophet Isaiah to talk about how them go win and take over Babylon wey  be World Power that time. E even talk say na Cyrus go win Babylon, and e talk how e go happen. (Isa. 44:27–45:2) Isaiah still talk say as time de go, Babylon go destroy reach ground and nobody go stay for there again. (Isa. 13:19, 20) Na wetin happen be that. The Medes and Persians win and take over Babylon for the year 539 B.C.E. Now Babylon wey get power well-well that time, don destroy reach ground.—Watch the video Bible Talk Say They Go Win Babylon for War, wey dey Enjoy Life Now and Forever! book, lesson 03 point 5, for jw.org and JW Library®.

11. Explain how wetin Daniel 2:41-43 talk de happen for this our time.

¹¹ Wetin Bible talk say go happen, don happen before and e still de happen for this our time. For example, think about how wetin prophet Daniel talk about Anglo-American World Power, de happen for this our time. (Read Daniel 2:41-43.) Wetin Daniel talk be say the Anglo-American World Power “go strong for one way,” like iron and “still weak for another way” just like clay. And we don see-am say na so e happen. Britain and America don show say them be like iron wey really strong as na them do the main work wey help them and other country wey support them, win World War I and II. And them continue to show say they get strong power to fight war. But the people wey them de rule don make their power weak like clay. How? Them de use different-different group wey them form, fight for their right, and protest against their government. One man wey really sabi politics matter talk say: “For the whole world, no country wey de follow democracy today wey their government no de agree with theirself reach the way e be for United States.” Britain na part of the Anglo-American World Power. But for some years now, e people no de gree with their government about the kind friendship wey their government de make with other country them for European Union. The way the people wey them de rule no de gree with their government don make Anglo-American World Power no fit really stand their ground for some matter.

12. As plenty things wey Bible talk don happen, how this one de help us?

¹² Our trust say God go do wetin e promise de strong more-more because plenty things wey Bible talk say go happen, don already happen. We de feel the same way like the person wey write Psalm 119, when e talk say: “E de hungry me to see the time wey you go save me, because na your word de give me hope.” (Ps. 119:81) Jehovah really love us, na e make e use Bible give us “hope and correct future.” (Jer. 29:11) Na only wetin Jehovah promise fit give us hope say our future go better, no body fit do this one. Make we continue to use all our heart study wetin Bible talk say go happen. This one go make our trust for Bible de strong more-more.

13. As e dey for Psalm 119:66, 138, wetin be another reason why we fit trust Bible?

¹³ Another reason why we fit trust Bible na because e de make people life better. (Read Psalm 119:66, 138.) Plenty husband and wife wey want divorce before, don de enjoy their marriage now because them follow advice from Bible. And their children de happy as their papa and mama love them now, de care for them and de use Bible train them.—Eph. 5:22-29.

14. Give example wey show say Bible de make people life better.

¹⁴ Even when person wey be criminal start to study Bible and follow Bible advice, Bible go  change e life. Make we talk about how advice from Bible change the life of one man for prison, wey e name na Jack. c Jack na dangerous prisoner wey court don judge and talk say them go kill am. But one day, when them de study Bible with one of the prisoners, Jack join them for the study. The brother wey de teach the prisoner really show them love. This one touch Jack mind, so e agree to study Bible. As e de do wetin e de learn, e start to behave well and do good to people. As time de go, e become unbaptize publisher and later, e baptize. E use all e mind preach to other people for the prison, and help about four people learn the truth. Before the day wey them go kill-am reach, Jack don become better person. One of Jack lawyer talk say: “Jack wey I know 20 years ago, don really change. The things wey Jehovah Witness People teach-am, don change e life.” Even though say them kill Jack just as the court don judge-am, e example show say we fit trust Bible, and say Bible get power to make people life better.—Isa. 11:6-9.

15. As Jehovah people de follow advice from Bible, how e make them different from the people of this world? (Check the picture.)

¹⁵ Jehovah people de do things together in peace because them de follow wetin Bible de teach. (John 13:35; 1 Cor. 1:10) The way we de do things together in peace dey easy for people to see, as people for this world no de do things with one mind. This na because the side wey them support for politics, their culture, or the position wey them get for their area, don divide them. When one young man wey e name na Jean see the kind peace and one mind wey Jehovah people de enjoy, e really surprise-am. Na one Africa country e come from. E join army when war start for e country, but later, e run go one country wey near e country. Na there e meet Jehovah Witness People. E talk say: “I learn say people wey dey true religion no de join politics but them de do things together with one mind and them love  each other. I don use my life fight for my country. But as I don learn the truth from Bible, I don decide to use my life serve Jehovah.” Jean change finish! Now e no de fight and kill people from other tribe again, but e de teach people the truth from Bible wey de help them do things together in peace and with one mind. The truth be say, as the advice for Bible de help people from different-different tribe and culture change their life, e give us strong reason to fit trust Bible.

16. Why e really dey important make we make our trust for Bible strong?

¹⁶ As this world de bad more-more, things wey go de happen go test if we really trust wetin Bible talk. Some people fit try to make us doubt say wetin Bible talk na true or doubt say na Jehovah appoint the faithful and discreet slave to de care for e people for this our time. But if we dey sure say everything wey Bible talk na true, we go fit fight anything wey want make our faith weak. This one go help us make up our mind ‘to obey God laws every time, and obey-am finish.’ (Ps. 119:112) We no go shame to teach people wetin Bible talk and help them to fit follow-am. (Ps. 119:46) And e go still help us fit endure any condition and still de happy, no matter how e bad reach even though say na people de suffer us because we de worship Jehovah.—Col. 1:11; Ps. 119:143, 157.

17. Wetin our yeartext for this year go always help us remember?

¹⁷ We de really happy say Jehovah don make us know the truth! This truth de give us peace of mind and help us make we no de fear. E still de teach us the correct way to live our life for this wicked world wey plenty people don confuse. E don give us hope say our life go better when God Kingdom start to rule this earth. Na our prayer say make our yeartext for 2023 help us get strong believe say everything wey Bible talk na true!—Ps. 119:160.