Everybody get name. So, e no go make sense say God get name too? E dey important for friends to get name and to de call each other by their name. No be so our friendship with God suppose be too?

 For Bible, God talk say: “I be Jehovah. Na my name be that.” (Isaiah 42:⁠8) Na true say God get many titles like “the Almighty God,” “The Lord Wey High Pass,” and “the Person Wey Make Us,” e tell us make we de call-am by im own name. This one na big honor for us.​—Genesis 17:1; Acts 4:24; 1 Peter 4:⁠19.

 Many Bible translation use God name for Exodus 6:⁠3. That place talk say: “I de show myself to Abraham, Isaac, and Jacob as God Almighty, but I no make them know me with my name, Jehovah.”

 Jehovah na the name wey Pidgin de call God and people don de call-am like this for many-many years. Even though say many experts for Bible matter de like to use the spelling “Yahweh,” na Jehovah be the name wey plenty people know pass. Na Hebrew language them use write the first part of the Bible no be English and them de read that language from right to left. For that language, na four consonants them use write the name of God יהוה. This four Hebrew letters na YHWH for English and them de call this four Hebrew letters, the Tetragrammaton.