No human being don ever see God face-to-face. (Exodus 33:20; John 1:18; 1 John 4:12) Bible talk say “God na Spirit,” and we no fit see-am with our naked eye.​—John 4:24; 1 Timothy 1:⁠17.

 But, angels fit see God face-to-face because them be spirit too. (Matthew 18:10) Another thing be say, some human being wey die go resurrect with spirit body and live for heaven and na that time them fit see God.​—Philippians 3:​20, 21; 1 John 3:⁠2.

 Many times, when Bible de use the word “see,” e de use-am to describe how to understand something clear. (Isaiah 6:10; Jeremiah 5:21; John 9:​39-41) For the same way, e dey possible for person to see God with im “heart” when e get faith for God, know God, and value the fine-fine character wey God get. (Ephesians 1:18) Bible talk about some things wey person fit do to get this kind faith.

•   Learn about God fine-fine character like im love, open hand, the kind sense wey e get, and im power from the things wey e don make. (Romans 1:20) After God remind faithful Job of the things wey e don make, Job come de feel like say e don see God with im own eye.​—Job 42:⁠5.

•   You fit know God as you de study Bible. Bible tell us say: “If you search for [God], e go allow you make you know-am.”​—1 Chronicles 28:9; Psalm 119:2; John 17:⁠3.

•   Learn about God from the life of Jesus. Since Jesus de show the kind fine-fine character wey im papa Jehovah God get, Jesus fit talk say: “Anybody wey don see me don see the Papa too.”​—John 14:⁠9.

•   Live your life the way God want, and you go see how God go help you. Jesus talk say: “People wey their heart pure go happy, because them go see God.” As we don talk before, some people wey do wetin God want go resurrect go heaven and them go “see God” for there. ​—Matthew 5:8; Psalm 11:⁠7.

 For some story for Bible wey be like say Bible talk say human being see God face-to-face, things wey them write before and after the story de show say God use angel talk to them or appear to them for vision.

 Angels.

For Bible time, God send im angels to represent-am and this angels appear to human being to give them message from God. (Psalm 103:20) For example, one time, God talk to Moses from bush wey de burn, and Bible talk say: “Moses cover im face, because e de fear to look the true God.” (Exodus 3:​4, 6) No be say Moses see God face-to-face, because the things wey them write before and after this one show say na “Jehovah angel” Moses see.​—Exodus 3:⁠2.

 Na so e still be, when Bible talk say God “talk to Moses face-to-face,” e mean say God follow Moses talk as im tight friend. (Exodus 4:​10, 11; 33:11) Moses no see God face, but “God use angels give” Moses the message wey e receive. (Galatians 3:19; Acts 7:53) Even with this one, Moses faith for God really strong sotey Bible talk say Moses “see the Person wey eye no fit see.”​—Hebrews 11:⁠27.

 For the same way, God still use angels talk with Abraham the way e talk with Moses. The truth be say, if person just read Bible and no really put mind for wetin e read, the person fit de feel say Abraham see God face-to-face. (Genesis 18:​1, 33) But, things wey them write before and after the story of the “three men” wey come meet Abraham, show say them be angels wey God send. Abraham accept them as people wey de represent God and talk to them as if na Jehovah e de talk to.​—Genesis 18:​2, 3, 22, 32; 19:⁠1.

 Visions.

God don still appear to people through visions for past. For example, when Bible talk say Moses and other Israel people “see the God of Israel,” them really “see the true God for vision.” (Exodus 24:​9-11) For the same way, sometimes, Bible de talk say prophets “see Jehovah.” (Isaiah 6:1; Daniel 7:9; Amos 9:⁠1) For this kind situation, things wey them write before and after each story, de show say na vision of God them see no be say them see God face-to-face.​—Isaiah 1:1; Daniel 7:2; Amos 1:⁠1.