Nim bunuman tal napanda, nim Baibel yu kerma duwom erkan wal e, ala buro pilyem kerel bar erkelnde, nim Jova kanka kanen mambnem e dongal wei panda. Jova kanka kanen mambnem e, kunum kunum erkelni dongal panda. (1 Pita 2:2) Nim kunum kunum kolnga morol nepin dal, nim Baibel yu duwom endel, embe erin dal Got kin semand wei pundol.​—Jon 17:3; Jut 21 gerdel.

Nim Got yu duwom ere kanpol tondal, e erkelnde nim pilgi dongal panda. Nim pilgi ainem pakero kelnde Got kapisa wal endel. (Hibru 11:1, 6) Pilgi e pakero kelnde nim mambnem kes bulngo sikerel, ala molpa endel bar wal pal endel woka punda.​—Aposel 3:19 gerdel.

Nim sape sinen wal alamb ende nengonal ne pisel e, wal olom enda—kenem porpor yu kawei ne alamb ngonamen ka pismen. Nim Baibel yu duwom enen mambnem wak naron dal, pakero kelnde nim Baibel kin konganem kawei endel mal kane, ala Jova kin pilgi don yu kawei ne alamb ende ngondol.​—Rom 10:13-15 gerdel.

Alamb puli yero wei Baibel yu kawei pulnom bol neori kesim e, maiyam ding na senonjip alamb nengom. Nim nal yu alamb bol nindel e pilpol to nindel. Kenem lotu alamb meim bar Got yuwom sip ninamen ne, enem yu mambanem gend nim pa nanimen, kenem Got wal kaka enda mal ne ngonamen. Ala pile, nim mambnem enen e alamb dungola wal kerma wei pa yu don e ngonom.​—2 Timoti 2:24, 25 gerdel.

Got Yuwom duwom endel bar pakero kelnde nim pilgi se kerma punda. Bulto, yane wusngam a nim Jova bol seno olom  bol semand pundol. Embe endel bar nim nenem Jova ngo, olom pemili meim bar se tuwal pundol.​—2 Korin 6:18 gerdel.

Nim Baibel yu duwom enen wak naron dal, nim pilgi wose kerma pu dongal panda. (Hirbu 5:13, 14) Jova Witnis ga ende moram nim ki si, enjep buk Tok Baibel I Skulim Yumi Long En si, nim Baibel yu duwom erngonam. Nim Got Yuwom kunum puli kel duwom erkan dal, nim nomolpa endel bar wose kawei punda.​—Song 1:1-3; 73:27, 28 gerdel.

Yu kawei Jova kin wonom nalerim olom ka pisim Got. Nim olom bol molse mand pundol e, olom alambem man makerom bar pundol. (Hibru 10:24, 25) Nim ombol ere Jova kapisa ne enen wal anjngo ermon dal, nim kol mem wei sinal ne enen e – wei si kunum kunum kolnga morol. Nim Got bol molse mand punal ne enen e, weieri wal kawei ende nim enen.​—1 Timoti 1:11; 6:19 gerdel.