Na dana Unatet Seis Keneda sem bar elda ende mom. Embe pile, wakan dingding ne, na ambana bol Sande sukul puyala nine erim, bulto 11:00  lotu enjip bar tuwal pupo enjil. Ala ponimbar kil Manjel bol Johova Witnis ga, Kingdom Gara Make pam bar pupo enjil. Ele punjil bar lotu tal e, nalmal jeljel enjip kanpol tonjil.

Na mana Baibel yu duwom er pilgi kolnga sim mal, kanan seno molmolo enjip yeamb ral, Bob na Mariyen Asen ne ngom, enjel pra Baibel yu wei sinjil. Kongar 1958 kunum, kibung Intanesnel ende kangem Diwain Wil Nu Yok Citi tuwalto pam bar, adam ambiyem tal e, na ne simbilnge enjel ngangjel talende bol kin kibung e, kunum 8-poro pam bar punjin. Yipe na pilkane erind pemili e, na ne si kibung punjip pesil panda pam. Ba, na make e, pund bar pake kerma wei sind.

Na ngal mond kunum, kin pam ende sem bar monjin, embe pile, na tu kong na ka astonal ka pinj. Na bunuman dongal pam tu kong dokta moral ne pinj. Na bunuman embe pam mana pilkane ere, ne kongrikeisen elda ngom. Ala elda yu kawei ne na dongal ngom, kenem “kunum pornim” bar meimen panim. Embe pile, nim kongar pende kele unewesti pu sukul nindal, Johova bol kamen mem to kes moksa panim. (2 Tim. 3:1) Embe nim na pakerongo, sukul kerma unewesti napunal ne pinj.

Ba ai sukul porninda kunum, bulto nawal enal ne bunuman puli kend. Na wakan dingding ne wakan kunum Baibel yu neori kend ba, kongan e, erind bar kanapinj. Ala painia enal kaple nanem ne pinj. Na embe pil mond kunum, na dana yu wei napim na olom angam bol kulu, Toronto tuwalto injurens kampani kawei ende sem bar, ku kongan-kunum kunum endel paninjil. Na apana kampani e, tuwalto kongan kerma ere mom eri. Embe pile, na kongan e, enal panim.

 Na ku kongan erind bar kongan pornim kunum, anj dunglom pende kele erind, ala kunum puli mala bunuman karkar enjip alamb bol taprond eri. Embe erind, er kelnge kunum puli Baibel yu neori nakend, ala kongrikeisen make napund eri. Yero na kopna Witnis-namom bol pa monjil, ba, olom gom kunum bulto dumam ende kansi moral pam.

Kongar 1958 kunum, kibung intanesnel pam bar, Asen pemili adam ambiyem tal na ne sipjil, na dana mana mal monjil. Na wo enjel bol morol pane wiro, ala pakerombolngo pilgi wal er wo se dongal pund. Kongar 1960 kunum, enjel ngangjel Jon bol kil aima nol panjil. Jon kongan painia pulnombol erim, embe erim bar na Baibel yu neori kunum puli kend. Ala kongrikeisena pilgi ding angjen man pilkane ere, kongan ende ngonjip e, Kristen Laip na Wok Autim Tok kongan kantawol endel panijip.

Kongar 1966 kunum kil Randi Beke bol, bolsinjil, olom kongan painia kumbol wei ngo erim. Ala se pablisa tambem erim bar pu kongan enda ka pim eri. Kin seket tawol ye kil er monjil mal kane, yu ne dongal ngo, elep pu Orillia kongrikeisen kulu Ontariyo tuwalto sem bar, kongan ere pakeronambel panim. Embe pile, kil bono gane kono si sepjil.

Kil se Orillia punjil kanan napungo, kil Randi bol kongan painia ai enjil. Olom kongan enda kawei pim bunuman na pra sind eri! Na kongan painia kumbol wei ngo erind kunum, na Baibel konganem ka ernge alamb yuwei sinjip bar, nanam kawei pinj. Wal kawei ende min wom, adam ambiyem tal ende, kulu Orillia monjil pakerombolngo, nomolpa enjil bar wal er kun ere, mambnem kol si, Johova konganem enjil.

Kulu Toronto Betel kanamen ne punjil kunum, na kanj Arnol Mek Namara kanj, olom Betel kongan pengem erim. Kil ki si elep kongan painia salim enambel ne pisbel ma nim? Na wamnam yu pundom ne kapisbel panind! “Kulu jeljel ende punambel kaple eri, ba, Kuibek ma panind!” Nalerim, Keneda tuwalto kulu ele monjip alamb,  Inglis-nijip na Perens yu nijip alamb kumbol ding nameim, ombun pende min wonom paninjip bar na punal kanapinj. Ala kunum ele kulu Kuibek monjip alamb gapman bol oprange enjep se jel pu independ moramen paninjip.

Angjen Arnol na nengo embe nim, “yipe kunum kin painia salim kulu Kuibek mongse kesmen panim.” Na ala wanmam kaple kil punambel panind. Na yero pilkane Randi kulu ele pu kongan ende kapim. Bulto na kanj kil kulu ele punambel panijil e, yu kawei ninjil pam!

Kin Perens yu duwom enjin wakan 5-poro wopungo bulto, kil Randi bol sembilnge, bolsinjil yeamb tal ende sembilnge se kulu Rimoski punjin. E, kulu ende kangem Monril sem bar 540 kilomita yemro sem. Ala kin duwom enambel wal puli kes mom eri, nalerim, kongrikeisen maka na alamb pisam yu mulom ende neori kend bar, kenem kibung yipe enamen bar “Ostria alamb” puli wonam paninal ne alla ernge, “Ostris alamb” puli wonam panind.

Kulu Rimoski, kin 4-poro semnge ala amb komjil walem 4-poro kongan kumbol wei ngojip semnge, ala pemili ende kangem Ubadius yeamb tal semnge, ambjel tal pra sembilnge kongan ai enjin. Ubadius pemili gar kerma ende kulo 7-poro sem rent ere, kil painia ku pakerongo panam panijip. Kin gar e, Wait Auis panijin nalerim, kala kuru pam. Alamb 12 mo 14 ele papa enjin. Kil Randi bol painia salim monjil pile, komb kinimba, tangling, na ponimbar seori pu kongan ere ere enjil. Kil puli panijil bar kil, kawei pinjil nalerim, kil Baibel yu neori kenjil bar tapro ai wanamen ga monjip eri—komb bi kes erim kunum pra.

Painia kulu ele monjip kin tap kawei tonjin pile, pemili ding mal monjin. Ala kunum pende ne kin anjaro dop gal pakle, sipok ere molo “wal mijem dopkip gal” nono enjin. Mo mokun kanem kanem galmnge donom jeljel pange nono enjin. Angjen ende tambal musik to kanim sape pam, embe pile, Sare kunum emilpal kil golang kele denis ere ere enjin.

Ala kulu Rimoski kongan er wanjin bar mongom karom! Kongar 5-tuwalto yu duwom er ngojin ga pende, pilgi wal er semin wo dongal molo nol panijip, ala kongrikeisena pablisa namba semin 35 pum.

Kil Kulu Kuibek punjil kunum, Baibel yu neori kerambel mal duwom kawei enjil. Kil Baibel yu neori kenjil bar na nganj wal Johova ngo pakerom pilkane enjil. Ala Perens yu-ninjip alamb monjip kanka kanjil, enjep yu aijep na mambnem aijep pra—e, er kelnge kil alamb pende kulu aijep na mambnem aijep kanka kanjil eri.—2 Kor. 6:13.

Kil pilpol naro monjil kunum, brens opis kil ki si se tawun Trakadai punambel paninjip, e, kulu Nu Beiswik sem bar yemro is sem. Embe ninjip bar, kil ombun pende pam nalerim, gar ende panambel bar na pepe pi mand sanim erind. Ala sukul ende sem bar na pat-taim kongan enal panind sukul bot kaple paninjip. Ala ombun pende pam e, Baibel yu duwom er ngonjil ga pende pi mand pablisa kolnga min wonjip, ala kongrikeisen Kingdom Gar tause tuwal kun wonjin eri.

Kil se kulu Trakadai punambel paim bar wakan kunum pel kele yane ninjil. Kulu e, Rimoksi bol ding mal nasem. Ba, kil pilkane enjil Johova kil kulu ele punambel ne pim pile, punambel pam. Olom kin bol ombun dingding pam pakerom mal pilkane enjil. ( Mal. 3:10) Kunum kunum Randi, Johova bol pilgi nim mem dongal pam, olom  olom-ne napim kongan ere alamb ende pakeronal ne pim, bunuman dongal pam pile, kil se kulu ende ende punambel onom pam.

Kil kongrikesen kolnga punjil bar, elda ding eri mom kangem Robet Ros. Olom ambiyem Linda bol painia kongan er monjil. Ala ngal komna kanjil kunum kongan anjngo er morambel paninjil. Enjel ngangjen kerei kantawol enjel kunum yu ka ne, kil Randi bol pakero dongal ngonjil. Enjel mambnem ka ere kil wiro si gara kenjil, ala Baibel yu kumbol wei ngo neori kenjil eri.

Kil kulu Trakadai kongan painia enjil kongar tal wopungo, nakanjil wal ende min wongo malmal enjil—kil seket tawol kongan enambel panijip. Kil kongar 7-poro Inglis seket sem bar kongan enjil, bulto se Kuibek pu Perens seket sem bar kongan enambel panijip. Ala angjen Leonce Crepeault, kulu Kuibek distrik opasia mom, na make pam bar yu nind kumum bulto, wo na bol yu nine erim. Ba olom ki embe si se erim, “Enjep yu nalmal ninambe ga pil karkar ere wal enam?” a Yu e, nanam pakerongo yu ni ne onom-mal pande ga pilsi karkar enam ne pinj.

Kongar 1978 kunum, Intanesnel Kibung ende kangem “Wiktories Peit” kulu Montril pam punjil bar, na kongan ende si erind e, auro wei nadom. Na Mokun Er Kun enjip bar kongan erind. Wusngam kolnga ende karkar ere, mokun er kun enamen panijip, ala alamb 80,000 porpor wonam pam. Wal porpor kolnga eri enamen pam, konganem wal kol mom, mokun nalmal er kun enamen, na nal wusngam karkar enamen e, pra. Kil piris kerma 20-poro mom, kar kerma trala keltu mokjip, pende kongan kanajip eri. Make e, pulnombora kil de one kil steduim tuwal pu er kun enamen kaple nalerim, spot ga steduim konganem er pungo tamantuwal pum. Ala kin apena nonam wal gal pungo tange anj min wom! Kin kongan ombolombol enjin bar, dongal poro wei nim, ba, na wal puli duwom erind. Ala na bunuman dongal pange wolinta kongan ding enjin ga, kongan ombol enjip bar weieri pilngond. Ala kin senojin mem er dongal wei enjin pawom pi wonom. Komna kulu Kuibek kibung pam bar, kongan omblombol embe enjin anjngo pilmeimen, 1940 wo 1960 tuwalto alamb to er kes ere ere enjip!  

 Kulu Montril kibung kerma pam bar mol ngimba kele, kongan tawol enjin ga, bol wal puli duwom erind. Kongar ende kibung pam bar Depit Splein yipe Gapening Bodi meim angjen kantawol erim. Ala kibung ende bulto paim bar, olom erim kongan na era ninjip, na erind bar Depit na pake kaweirom.

Kil Randi bol seket tawol kongar 36-poro kapile er wanjil pornim kunum. Kongar 2011, Kongrikeisen Elda Sukul pam bar na tisa mola nijip. Kongar tal tuwalto kil pu dumam 75 jeljel pu pa kongan e, enjil, mem ka pange embe enjil. Wakan ding ne pornim kunum, elda kapile sangiyo nijip nalerim, Gapening Bodi angjen man enjep pilgi wal wei pilngojip.

Bulto, SKE Sukul pam bar na tisa mond. Sukul wonjip ga wimuk wei ne tomene kem nalerim, kongan puli mom, kunum dingding ne anj dunglom 7-auwa poro kele sukul ninjip: emilpal 3-auwa kele omwok enjip, ala wankan ne tuwalto aisaimen 4 mo 5 si enjip eri. Kil tisa ende bol enjep nengo Johova narom dal, enem wal porpor e, enam kaple nanda panijil. Sukul wonjip ga wal ende kanmalmal enjip na aurninda kaple nanem. E, embe Johova enjep pakerongo enam kaple nanem ne pinjip wal, wal er kaple enjip bar enjep kapinjip.

Na mana alamb kanka kanim mem er kelnge Baibel yu duwom erngom ga, pilgi wal er semin wo dongal monjip. Ala dana pakerongo yuwei se tuwal wom eri. Mana gom kunum talende wopungo bulto, dana wal ende er kelnge kil malmal enjin e, alamb poro pisam yu, Kingdom Gara make pam bar wo pim. Embe erim kunum pulnombol kongar 26 tuwalto make kunum kunum wo molmolo erim. Na Dana nol napaim ba, elda walem na nengojip wakan dingding ne make paim bar, olom yero wei wowo erim paninjip.

Na ambana man bol mambnem ka enamen mal, na mana ta kawei nengom. Na ambana talende porpor andajep man bol kumbol wei ngo Johova konganem esim. Ambana tal brens opis kongan esbel—ende Potugal meim ende Aiti meim.

Kil yipe Randi bol painia salim kongan kulu Ontaria tuwalto Amilton er meibel. Kil seket tawol kongan er wanjil kunum, pilgi ding angjen ambajen man pende Baibel yu duwom er ngojip alamb na yem wo kanya nijip alamb mokjip bar kapile wan kankane enjin. Ba, yipe kenjel Baibel yu duwom er ngombol ga pilgi a wal er semin wo dongal meim bar kapisbel. Yipe kongrikeisen kol meibel bar pilgi angjen ambajen bol seno meimen, ala Johova kunum kes na ka seim kunum, enjep nalmal pakeronom mal kanbel kunum kil pra dongal simbel eri.

Kil kongan er wanjil kunum, ga puli mambnem ka tanijip mal pilyem kel pisbel. Ala kil pra “enjep pilngojil mem pra taninjil eri,” yu ne dongal ngobo Johovo konganem kumbol wei ngo enam ne enjil. (2 Kor. 7:6, 7) Pemili ende monjip pilgi ding ambajen, ende ngangem ambel tal bol, enjep poro painia-kongan enjip. Na ambajen adam ki si nim kongan painia enal ne pilpil erin ma nind? Olom yu ne yem kele embe nim, na painia talende pakero meim panim. Na olom ki ende embe ngondo, “Johova enjep pake naronom, nim pake kaweirono ma nind?” Na yu ne olom dongal ngo, ga painia ere, kapisim mal nim pra pisel eri panind. Oll 6 bulto olom kongan painia pulnombol erim.

Kil Randi bol “alamb mibulto wonam” “Johova kongan ka” erim mal anjngo neori kerambel. Ala kil pilgi nimbel enjep Johova konganem enam kil ka pisbel bol ding mal pisam eri.—Sng. 71:17, 18.