NGANG AMBEL GAL ENAM WAL
9: Nim Kangem Nalmal Paim
NALNE PILDOM
Nim kangem nalmal ambren, wal kerma pa kangnem wei na nalmal mein ngonam. E pilgi don wal na mambnem enen bar, nim nal alamb wei—mein neori kerem.
NALENDE WAL KERMA PAIM
Nim nal kangem paim pilkane erin dal, tapronon ga nim pilgi erkes moksam ne enam akilgi nindel.
“Alamb puli stetu ende stua gar kerambe meim mal embe meim. Konkongol enjep nakesim; alamb ende kele kerambe meim.”—Andrian.
“Mambnem dulto enal amin napanda kunum, nalmal enal mal duwom erkanj. Na senond ga mambnem enam bar na, nam mambnem enal bar enjep nalne pisam, taninda enjep tapka ga mo ma pilkane enal pam.”—Kotni.
BAIBEL KOLTA YU: “Yipe alamb meim mambnem esim mal enem karkar naenam. Ma. Enem bunum kol sinambe, mambnem enam wose jelmal punda.”—Rom 12:2.
ENDEL WAL
Nim yipe alamb nalmal mein pilkane endel. Ala mi bulto endel kaple enem, kaple naenem, mo enal ne bu dongal paim wal erkun ere nalmal morol mal kanjel. Wusngam ka ende karkar ere embe endel, ki meim pundom ngondol.
Endel kaple enem wal: Na nawal ende enal sape paim? Nal manbnem pende erkun enal? (Pende embe mal: Na wal anj dunglom kun erind mo? kumbolna kantawol erind mo? kongan ombol er erind mo? mambnem ka erind mo?) Na nawal ka pende erind?
WUSNGAM PENDE: Nenem mambnem ka pende enen pilkane endel kaple naenem mo? Nim danem manem mo senon ga ki si, na mambnem ka pende ene nim kanen neori kela nindel. Nal ende embe nindel?
BAIBEL KOLTA YU: “Alamb ding dingne enjep kongan esim mal omukronam. Embe enam bar, enjep enjep wal esim bar kapisam, ala alamb ende wal esim bol omuk naronam.”—Galesia 6:4.
Endel kaple naenem wal: Na nal mambnem pende erind ombol ere erkun enal? Nawal pende mine wonom erkelde, na mambnem napaim mal enal ne erind? Nawal pende erind bar nanam kumbol kantawol kawei enal?
BAIBEL KOLTA YU: “‘Kenem alla nganja napaim paninjin dal,’ kenem kenem yu gend nengomon.”—1 Jon 1:8.
Enal ne bu dongal paim wal: Na nal lo dulto karkar erind, nalende embe erind? Na Got bol pilgi nind mo? Nawal pende mine wom erkelde olom wei meim ne pilgi nind? Nal mambnem pende kun napaim nepis, nal ende embe pis? Mi bulto nawal mine wonda ne pilgi ne, kui erind?
BAIBEL KOLTA YU: “Bunuman ka konganem endel nim kantawol enda, ala wal omuk karondol bar nim gul ersi tuwal kera.”—Provep 2:11.
