1-2. Alamb ende nol panal nepim dal, yero nal enda?

 KONGAR 5 wopunom, alamb namba 1 millien se minro pum, nol pa Johova Witnis ende meim. Nol panjip ga puli, komna Kristen kunum Timoti bol wal min wom mal, “ngal kerei wei” monjup kunum yuwei duwom er kanjip. (2 Tim. 3:​14, 15) Pende alamb dongal molo Johova ye nalmal duwom er kanjip, ala pende tuwa wei se duwom er kanjip. Kunum apal pende wopunom, amb ende kongar 97 molo, Johova Witnis ga bol Baibel yuwei duwom er nol pam!

² Nim Baibel yu duwom enen mo, danem manem Witnis ende molo ersi min tunjup pamdal, nol panal ne buro pisen mo? Nol pandal wal kawei! Nol panal nepin dal yero, yane wusngam a nenem Johova bol yu dongal nindel. Yu duwom pi enamen bar, nenem Got ngo yu dongal nindel panimen mem neori kera. Ala nim pakerondo, nalende nol panal nepisel bar kisal nagoral mal kanjel eri, erkun endel kunum nol panal ne kapisel.

YANE WUSNGAM A GOT BOL YU DONGAL NINDEL PANIMEN E NAWAL?

 3. Alamb pende yane wusngam a yu dongal ne, enjep enjep Johova ngonjup mal, yubol ende Baibel a panda bolto.

³ Baibel a yubol pende meim kanmen, yane wusngam a yu dongal ne enjep Johova ngomon paninjip, memka pange kongan ka enam ne embe enjip. Israil ga ye dulom pel yane wusngam a Johova bol yu dongal ninjip. Ba ga pende, yane wusngam a yu dongal kawei jel mal ne Johova ngojup. Ende Aron, pengkon kauwum bar medel “oli mambla kanto pakim talang er pam”—Gol pakim e, olom Johova bol yu dongal kawei jel mal ne, Israil ga—ai pris molo kongan kawei erim tanim. (Wkp. 8:9)  Ala Nasarait ga pra, yane wusngam a Johova bol yu dongal kawei jel mal ninjip eri. Yu “Nasarait,” panimen e Ibru yu ende naszir,’ pane pambar sinjip, mem embe, “Oiro Sijel Kenjip Ga,” mo “Yane Wusngam a Got Bol Yu Dongal Ninjip Ga.” Nasarait ga, Mosis Lo pambar wal pende nanam pane yu boll mokjup, karkar enam pam.—Nam. 6:​2-8.

 4. (a) Nim Johova bol yane wusngam a yu dongal ne nol pain, nalmem kerma ende pande embe enen? (b) Nenem kapisen wal “nanal padon” nal nepil don? (Piksa pra kane.)

⁴ Nim yane wusngam a yu dongal ne Johova ngonon, nenem kapisen wal sikele, wal kerma paim nomolpa enen bar Got kapisem wal mongse ere, Jises Krais disaipol ende moral padon. Yane wusngam a yu dongal ne Johova ngo Kristen morol kunum, nawal pende endel? Jises embe nim: “Ye ende na karkar enal nepim dal, olom kapisem wal bulngo sikele, ond kun aiyem kausi, na kunum kunum karkar enda.” (Mat. 16:24) Grik yu a “nenem kapisen wal bulngo sikerel” paninjip e, “Got kapisem wal mongse endel ne pilninjip.” Nenem Johova ngo nol pain pile, wal ende eri Johova kanapisa panda wal porpor bulngo sikerel. (2 Kor. 5:​14, 15) Ende embe mal, “mambnem kes enamen ne kumbol a pismen penem a wei paim,” ende pasdia esim mambnem. (Gal. 5:​19-21; 1 Kor. 6:18) Nim nomolpa enen bar yu embe karkar endel bar pesil panda mo? Nim Johova kanka kane lo aiyem meim, pakeronda nepin dal, pisel napanda. (Sng. 119:97; Ais. 48:​17, 18) Pilgi ding angjen ende kangem Nikolas embe nim, “Johova lo kem paim ye ende karpos gar gul tuwalto molo, olom kapisem wal koltungdo nanem mo, tu laion ende ain gul tuwalto molo wo nim tononda kaple nanem bol ding mal panim.”

 5. (a) Nim nalmal ere Jehova konganem ye moral padon? (b) Yane wusngam a Johova bol yu dongal don na nol pain, nalmal jeljel paimbel? (Piksa pra kane.)

⁵ Johova konganem alamb moral padon? Nim yane wusngam a yu dongal ne Johova ngo, olom mongse lotu erngo nenem kapisen wal  sikele olom kapisem wal mongse enal panin. Weieri, nim Johova bol yu dongal nin kunum kunum olom kanka kane, “nim kumbol palngo kolmem palngo, bunuman palngo ala dongal palngo Got kanka kanal panin.” (Mak 12:30) Nim yane wusngam a yu dongal ne Johova ngon alamb poro pilkane nanjip, nenem na Johova bol mongse. Ba, nol pain kunum taninde nim Johova bol yu dongal nin alamb poro pilkane esim. Nim yane wusngam a Johova bol yu dongal kerma ende don, embe pile don yu kunum kunum karkar endel, ala Johova nim embe endel nepisem eri.—Ekl. 5:​4, 5.

NALENDE YANE WUSNGAM A JOHOVA BOL YU DONGAL NE NOL PANDEL?

 6. Nawal erkelde alamb Johova bol yu dongal ne nol paim?

⁶ Mem kerma ende pande nim yane wusngam a Johova bol yu dongal don, olom kanka kanen. Nim kumbol a wal pisen bar mongse erkelde olom kanka na kanen ma. Johova “murmulom dongal” mo oli spirit nim pakerondo—olom bol “sape dulto si,” mibulto wal pende enal padom pilkane enen erkelde olom kankawei kanen. (Kol. 1:9) Nim Baibel yu duwom er kanen erkelde pilgi wei don, (1) Johova weieri meim, (2) Baibel olom murmulom dongal bu ngongo Yu wom bonjup, ala (3) olom okanaiseisen wusngam a olom enal kapisem wal neori kerem.

 7. Kenem nawal pende yero ere, bulto yane wusngam a Got bol yu dongal ninamen?

⁷ Alamb Johova bol yane wusangam a yu dongal nim, Got Yuwom kerma pende Baibel a meim duwom ere kanpol tom, ala nomolpa esim bar olom lo kem meim karkar esim. Enjep duwom er kane pilgi ninjip wal ombol wei ere, kolapis kerem kunum ne alamb ende ngonam ne esim. (Mat. 28:​19, 20) Johova kanka kanim  mem wose kerma punom kunum, kumbol pelngo olom mongse lotu erngonam esim. Nim pra embe enen mo? Nim bunuman embe mal ambin dal, yane wusungam a Johova bol yu dongal ne nol pain erkeli, Baibel tisa nim yu duwom erngom alamb mo, danem manem kanka kanam ne nanen, mo senonon ga mambnem esim mal erkelne kakanam ne nanen eri.

 8. Kapile sangiyo don mem nalmal erkelde, Johova bol yane wusngam a yu dongal ne nol pandel? (Buk Song 116:​12-14)

⁸ Johova nim bol wal porpor erim bar buro pisel erkelde, yane wusngam a olom bol yu dongal ne nol panal nepisel. (Buk Song 116:​12-14 gere.) Baibel Johova, Wal Ngonom ye padom kun paim nalenem, “wal kaka na wal kawei pase ngimba punom porpor min epen wonom.” (Jems 1:17) Ala wal ka kerma wei ende ngom e, olom Ngangem Jises kem wo golo kenem topro siyem kem. Wal kawei ngom nim buro pile! Olom golo kenem topro siyem kem erkelde, Johova bol senon semand wei punamen kaple enem. Embe erim bar, kolapis kerem kenem kol aimanj mem weieri sinamen. (1 Jon 4:​9, 10, 19) Nim yane wusngam a Johova bol yu dongal ne nol pain e, Johova kanka mem kerma tane, wal ka pende pra ngom bar nim sangiyo don mem tadon. (Lo 16:17; 2 Kor. 5:15) Ala buk Kunum Kunum Kaeri Pilmorol! lesen 46, point 4 sangiyo nindel mal neori kerem, ala tri-mint vidio ende kangem, Nim Wal Kawei Kannon Got Ngondol, pane paim kanjel eri.

YANE WUSNGAM A JOHOVA BOL YU DONGAL NE NOL PANAL NE ERKUN ENEN MO?

 9. Nalende nim yane wusngam a, Johova bol yu dongal ne nol paiya ne nipnape ninam kun napaim?

⁹ Nim Johova bol yane wusngam a yu dongal ne, nol panal ne erkun er namei nepisel. Kunum pende ne nim nomolpa enen bar wal pende ere, Johova lo karkar ka endel mo, kunum pende wopundo pilgi er dongal wei endel. (Kol. 2:​6, 7) Yu duwom esim ga porpor, Johova ding mal kanka nakanim, ala ngang ambel gal walem kongar ding mal molo, Johova bol yane wusngam yu dongal ne nol napaim. Embe pile, nenem pilgi wal er wose dongal pundol panda mal endel, alamb ende bol omuk narondol.—Gal. 6:​4, 5.

10. Nim yane wusngam a Johova bol yu dongal ne, nol panal ne erkun er namon dal, nalendel? (Boks a yu pengem, “ Ga Pende Yuwei a er Simin Tunjup pane paim kanjel.”)

¹⁰ Yane wusngam a Johova bol yu dongal ne nol panal ne erkun narin dal, mak pakil enen wal anjngo er simin wo nol panal ne endel. Yane ne Johova ngo ki si, nim pakerondo mak pakil enal nepisen wal er kaple endel. (Fili. 2:13; 3:16) Nim weieri pilgi nindel, olom nim yane don pile pundom ngonda.—1 Jon 5:14.

NALENDE GA PENDE KAMKAM JOHOVA BOL YU DONGAL NE NOL NAPAIM

11. Johova nalmal kenem pakerondo, olom bol anjngo pilgi ninamen?

¹¹ Alamb pende yane wusngam a Johova bol yu dongal ne nol panam ne erkun esim, ba kamkam embe nasim. Enjep embe nepisa pisim, ‘Nol pa sikeral kunum sin kerma ende ene to ori kerambe pe nepisa pisim?’ Nim bunuman embe mal ambin dal pilgi nindel, Johova nim wal porpor ngo pakerondo, kenem “Johova alambem wei mal kol wanamen, ala wal porpor enam erkeramb [olom] kapisa.” (Kol. 1:10) Olom enem dongal ngondo mambnem dulto karkar enam. Olom yero ga pende pakerongo mambnem dulto karkar enjip. (1 Kor. 10:13) Kenem pra mambnem dulto karkar enamen kun paim nalenem, kongrikeisen Kristen tuwalto mambnem dulto karkar nare, sin enjip ga to ori kenjip. Johova wal puli ngo pakerondo alambem man pilgi a dongal moram ne enem.

12. Kenem nalmal ere sin kerma ende enamen panda bar, tuwal napunamen?

¹² Alamb porpor sin nganj paim pile, erkelde  wal napaim mal esim. (Jems 1:14) Embe pile, nim sin endel bunuman ende min wonda kunum, nenem nalmal endel—tanindel. Yu weieri ninamen, nomolpa enen bar nal mambnem karkar endel nenem bol seim. Alamb pende pisim, kenem kenem bunuman pande wal enamen nepismen, kantawol enamen kaple nanem nepisim, ba e bunuman dulto ma, nim bunuman kes min wonda tomene kerel kaple enem. Ala wal ende erkelde nim mambnem kes endel pamdal, tuirondol kaple enem eri. Embe enal ne pindal, yane kunum kunum nindel, enge er pakle Got Yuwom Baibel a meim duwom kawei endel, Kristen make paim bar kunum kunum pundol, ala pilgi paim bar yu neori kel alamb ende ngondol. Wal embe mal kunum kunum erin dal, nim dongal ngondo nol panal ne yane wusngam a, Johova bol yu dongal nin karkar ka endel. Ala nim aur naninda, Johova pakerondo wal embe endel.—Gal. 5:16.

13. Josep nal mambnem ka ende kenem karkar enamen tanim?

¹³ Nim yane wusngam a Johova bol yu dongal ne nol pandel, ba bulto wal ende minwo nim pilgi erkanal ne enda kunum, nalmal endel yero-pilkane erin dal, olom bol anjngo kamorol. Baibel kenem taninde kenem pilkane esmen, sin nganj a pam ga pende, embe er Johova kin ka monjup eri. Ende Josep, Potipa ambiyem, erkelde olom bol wurding panda ne erim. Ba Josep nawal enda pilkane erim, bunuman tal napam. Baibel dom, olom Potipa ambiyem nim bar “mapane,” embe nim: “Nalende na mambnem keswei ere, Got dungol a sin enal?” (Stt. 39:​8-10) Penem a wei pande kenem pilkane esmen, amb e yu embe mal ne Josep erkanal ne enda kunum, olom nal mambnem karkar enda yero pilkane erim. Yero pilkane erim erkelnge, ombun minwo olom erkanal erim kunum, akilgi ne tuirom.

14. Wal ende min wo kenem pilgi erkanal ne enda kunum, nalmal tuironamen?

¹⁴ Josep erim mambnem nim nalmal karkar endel? Wal ende min wo nim erkanal ne enda kunum, nal endel mal yero pilkane er morol. Johova kanapisem wal ende minwo nim erkanal ne enda, wamnam tuirondol mal pilkane ere, ala wal e buro napisel eri. (Sng. 97:10; 119:165) Embe erin dal, wal ende minwo nim erkanal ne enda tuiro, sin nandel. Wal ende min wo nim erkanal ne enda, nalmal endel yero pilkane enen.

15. Alamb ende “ombol wei ere Johova kurnom,” nalmal taninda? (Hibru 11:6)

¹⁵ Nim yuwei kansin pile, Johova konganem kumbol wei ngo enal nepisel. Ba wal pende erkelde, nim yane wusngam a Johova bol yu  dongal ne nol panal kaple nanem nepisel. Embe pamdal, Depit mambnem ende erim nim karkar endel. Johova ki si embe nindel: “O Got, na omukro bunuman kumbol a seim pilkane endel. Na omukro, nawal pile bunuman puli kere pilkane endel. Na omuk manero kane, bunuman kes ende na kumbol a paninda, ala na pakero sipi kolnga aimanj aimanj sinal wusngam karkar enal.” (Sng. 139:​23, 24) Alamb ende ombol wei ere Johova “kurum alamb, enjep topum ka ngonom.” Nim mak pakil ombol ere pu, yane wusngam a Johova bol yu dongal ne nol panal ne enen, yu nimen mal karkar enen Johova pilkane enem.—Hibru 11:6 gere.

ANJNGO JOHOVA BOL SEMAND PUNDOL

16-17. Danjep manjep yuwei a molo, ersi mintum ngal nalmal ere se Johova bol mand punam? (Jon 6:44)

¹⁶ Jises nim, Johova erkelde alamb wo na disaipol meim panim. (Jon 6:44 gere.) Pilkane endel e wal kawei ende, nim bol pra minwom. Johova kanim alamb dingding ne kumbol kasem alamb, si olom bol mand tunom. Situwal tunom alamb, “alamb dulom kawei mal kanem.” (Lo 7:6; ftn.) Nim bol wal embe min wonom eri.

¹⁷ Nim ngang ambel gal ende mondal, danem manem yuwei a ersim min tunda tunjup, nim embe nepisel dana mana Johova lotu erngom bar na se olom bol mand pund, nanam simand nakerem nepisel. Nim bunuman embe mal sindal, Baibel embe dom: “Nim se Got bol mand pundal, olom se nim bol mand wonda.” (Jems 4:8; 1 Sto. 28:9) Nim ombol ere se Johova bol mand punal ne erin dal, olom pra se nim bol mand wonda eri. Johova kenem alamb talap ende meim bar, tuwal ei mal meimen ne nakanim. Olom kenem—dingding ne si olom bol mand kerem, danjep manjep yuwei ersi min tunjup ga pra. Ga embe mal se Johova bol mand punam ne enjip dal, olom Jems 4:8 yu dom karkar ere se enjep bol mand wonda eri.—2 Tesalonaika 2:13 omukro kane.

18. Yu duwom bulto enamen bar nawal omukro kanamen? (Buk Song 40:8)

¹⁸ Nim yane wusngam Johova bol yu dongal ne nol pandal, Jises erim mambnem karkar enen. Olom Dam wal enda ne ki sim kapile karkar erim. (Buk Song 40:8 gere; Hib. 10:7.) Yu duwom bulto enamen bar, nawal nim pakerondo nol pasikerel kunum bulto, Johova konganem anjngo endel mal kanamen.