Gerim Ga Ki Aijep
“Nim Kangem Kuru Senda” pane, Jun 2020 Wastaua yubol tonom bar Johova kangem na olom kongan pengem enda ne kenem pilgi nimen mem nalmal tadom?
Yu duwom ele er kanjin, enjol walem min epen meim na ya mala alamb porpor meim, enjep bol yu kerma ende min wom e,: er kerambe Johova kangem kuru senda. Johova kongan pengem erim bar yu kerma min wom tadom—olom kongan pengem kunum kunum kawei wei enem—embe enem bar er kelde olom kangem kuru seim. Ala wal kerma wei paim, Johova kangem er kerambe kuru senda, alamb enjep enjep mambnem enam bar taninda.
Nalende kenem yu kerma e, min wom bar yipe pilkane ere, Johova kangem er kelpe kuru senda wal kerma paim? Embe enamen mem talende paim omukro kanamen.
Satan, Gaden Iden tuwalto Got kin opyem ere, kangem ka to kes mokul wom pi wonom
(1) Gaden Iden Seim Bar, Satan, Johova Kangem Ka To Kes Mokum, elim ki ende amb Ip ngom bar tanim, Johova elep Adam bol lo ngo karkar eiyala nim, e, mambnem kanarim kun napaim panim. Satan yu akro Got yu gend dom ye panim. Yu embe nim bar Johova kangem karo kes mokum. Ala olom wose “Kip Kes” pum, yu Kip Kes panimen mem, “yu gend” dam. (Jon 8:44) Amb Ip, Satan yu gend nim yu pilgi ne, Got yu tokele olom kantawol enda kanapim. (Stt. 3:1-6) Kunum ele wo pi wonom, Johova olom Ye Nalmal Wei Meim, Satan yu gend anjngo ne Got kangem ka to kes moksa ne enem. Satan yu gend dom pilgi nim alamb, Johova yu to kesim. Embe pile, Got alambem man meim Johova kangem ka kuru to kes moksam e, mambnem keswei ne pisim. Got kin kanamolo olom kangem to kes moksum er kelde, ombun puli kes yipe ya mala paim.
(2) Johova wal porpor er kem meim pakeronal ne pisem, yu kes ne Johova kangem ka to kes moksum er kun enda bu dongal wei paim. Embe enda Johova olom bol wal kerma wei paim. Mem e pange, olom embe dom: “Na kangna kerma ersi kuru keral.” (Ese. 36:23) Ala Jises pra Johova bol pilgi ne konganem kumbol ngo esim ga, yane ninam bar wal kerma ende enam, embe ninam panim: “Er keli nim kangem kuru panda.” (Mat. 6:9) Baibel kunum puli kes nalende, Johova kangem ambil min keramen wal kerma paim mal dom. Dom yu apal pende omukro kanamen: “Johova kangem paim mal kangem kerma ngonamen.” (1 Sto. 16:29; Sng. 96:8) “Golang kele Got kangem pase ngimba punom kangem ambil min keram.” (Sng. 66:2) “Na kunum kunum nim kangem ambil min keral.” (Sng. 86:12) Kunum ende Jises Jerusalem tempola molo, embe nim: “Dana nim kangem ambil min kela nim kunum” Johova ne yem kele embe nim: “Na kangna ambil min kend ala ambil min keral eri.”—Jon 12:28. a
(3) Johova wal porpor enal-ne pisem olom kangem mem pande enem. Ala pisamen: Jises Kongan King Kongar One Tausen tuwalto er porninde, Satan, Johova kangem kenem bol wal kerma wei paim mo ma er kanal ne enda. Bulto nawal min wonda? Enjol porpor na alamb Johova kangem bo nal ne pisam? Ki e, pundom sinamen wal tal ende omukro kanamen—e, Got bol ka moram alamb, na Johova mol ngimba kerem ye kongan pengem enda bar. Ala Johova bol kamoram alamb wal ende min wo anjngo er kanal ne enda mo? Ma. Enjep er kanja wal min wo sikem, enjep wose kawei pujup, kol aimanj mem weieri sinam. Ala namal kupul mal pel kantawol enda kun paima ne, enjol yu yemyem nijip, anjngo pamora mo? Ma. Kunum ele min epen na ya mala meim ga porpor, Johova kongan pengem ere enjep kantawol ka ende, kumbol amin moram. Ba, kunum ele Johova kangem alambem man bol wal kerma pamora mo?
Kunum ele alamb porpor yuwei kanpolto, Johova kangem ambil min kele er kerambe kuru wei senda. Ala Johova konganem ga min epen na ya mala meim olom bol ka molo konganem esmen ga kunum kunum, olom kangem si wal kerma wei paksam. Nalende embe enam? Nalenem enjep pilkane enam, Johova wal kaka jel mal kunum kunum enda. Ala wal ende: Jises molmene kele kongan king sip Got angela kere, Johova “wal porpor pengem enda.” (1 Kor. 15:28) Bulto mala alamb porpor kapile, “priari Got ngalem mal embe moram.” (Rom 8:21) Johova wal enal ne kombe bu pam wal weieri min wonda. E, er kelde olom ngalem man min epen na ya mala meim kumbol ding sende pemili kerma ende moram.—Efe. 1:10.
Wal embe min wonda kunum Johova pemili aiyem min epen, nalmal pisam? Kenem—porpor —Johova kangem ka ambil min keramen bu kerma panda. Johova murmulom dongal, Buk Song bol ye Depit bu ngongo embe bom: “Got Johova kangem ambil min keramen . . . Kunum kunum ambil min keramen nalenem olom kangem pase ngimba wei punom.” (Sng. 72:18, 19) Olom kangem aimanj aimanj ambil min kele punamen, nalenem, mem ka puli panda.
Johova kangem olom ye nalmal wei meim tadom. Kenem Johova kangem pismen kunum, olom kanka mem pra buro pismen. (1 Jon 4:8) Ala kenem kunum kunum buro pisamen, Johova kenem kankane ersem, kanka mem er kelnge ngangnem kem wo kenem pilgom. Ala olom mambnem dulto na kanka mem wusngama kongan pengem ere kenem kantawol enda. Ba, kenem kunum kunum pilkane enamen Johova ersem wal anjngo kanka mem taninda. Aimanj aimanj kenem Danjen Johova bol se mand wei pu, golang kele olom kangem kawei ambil min keramen.—Sng. 73:28.
a Ala Baibel tanind pilkane esmen, Johova olom “kangem pile wal pende enem eri.” Wal pende embe mal enem, olom alambem man kol tane sipnem, enjep pakeronom, opyem alamb meim bar er siyem dom, alla esim wakronom ala enjep kolmem kantawol enem—wal porpor enem olom kangem kerma Johova, pil embe enem.—Sng. 23:3; 31:3; 79:9; 106:8; 143:11.
