1-2. Paragrap 1 yegal ende kin ombun min wom padom, kenem alamb bol ombun min wonom nalmal dingmal paim?

 YEGAL ende pemili aiyem ku na wal puli kannonjup bar molo, yau min wom mal buro pile. Kunum ende ombun kesmal wei ende minwo, dam mam tal togom. Ombun minwom mal ninambe pisem kunum, keswei pile ke dom. Ba pilkane enem, dam mam tal ku pulikes konganem ere enjep kannonjup e ngonjil, embe pile dina kerma wei paim. Pi buro pile, olom olom ku ende sende konganem enda napaim, dina kerma keswei paim ala ku ngonjup alamb kujon ngoyem kela ne nipnape nim. Dina kerma wei paim ngoyem kera kaple wei nanem.

² Yegal e ombun pam mal, kenem bol dingmal pam eri. Kenem kopanjen wanjen Adam na Iv tal, sin nganja napaim kunum kulu paradais kawei wei sembar monjil. (Stt. 1:27; 2:​7-9) Enjel aimanj aimanj kapil nomol punambel pam. Ba wamnam bol wal jelmal wei ende minwom. Enjel kulu Paradais wakronjil, ala kol aimanj morambel mem wakronjil eri. Wal embe min wombar, ngal kopanjel man bulto min wonjup bol nalerim? Baibel embe dom: “Ye dingeri [Adam] wusngama sin mala minwo, sin na gonjup mem tum. Wusngam ele alamb porpor gosum, nalenem, porpor sin enjip.” (Rom 5:12) Adam sin kenem sinjin pile gosmon. Sin e, dina kerma kes ende kenem bol panda mal paim, kenem porpor dina ngoyem keramen kaple wei nanem.—Sng. 49:8.

 3. Nalende sin e kenem bol “dina” mal paim?

³ Jises, sin e “dina” mal paim panim. (Mat. 6:12; Luk 11:4) Kenem sin esmen kunum, Johova kin dina mal paim olom kanapisem. Kenem sin esim bar topum simen e gosmon. Johova wusngam erkun ere kenem sin waknaronange dal, kenem sin esim bar topum sinamen e golo porne sikerange, ala mibulto kolmoramen ne walka ende kui nanamnge eri.—Rom 6:​7, 23.

 4. (a) Sin esim alamb pake nasinamnge dal, enjep porpor bol nawal min wonange? (Buk Song 49:​7-9) (b) “Sin” panimen yu e Baibel nal padom? (Boksa yu “ Sin” pane paim kane.)

 ⁴ Adam na Iv wakronjil wal porpor kenem ala siyem ninamen, kaple enem mo? Kenem kenem dongala siyem keramen kaple nanem. (Buk Song 49:​7-9 gere.) Ende kenem pake naronange dal, kenem kol aimanj mem nasinamnge, ala gonjup alamb aksam ne kui nanamnge eri. Weieri, kenem tukong mal golo setai pu sikerange.—Ekl. 3:19; 2 Pita 2:12.

 5. Adam wusngama sin sinjin dina mal pamba, Danjen kanka mem sem ye kenem nalmal pakerom? (Garwom piksa kane.)

⁵ Yu pulnombonjin bar yegal ende dina kerma pam pane yubol tonjin buro pile, kumoni puli kannonda ye ende dina porpor ngoyem keral paninda kunum, olom nal nepisa? Pilkane esmen, yegal e pakeronal paninda ye bol kawei wei pile sangiyo kerma wei ninda. Embe dingmal, Adam sin sinjin kenem kin dina kerma wei mal pam, Danjen Johova kanka mem sem ye wal kawei wei ende ngo kenem topro siyem nim. Jises yu pende ne aune embe nim: “Got mala alamb porpor kankawei wei kanim pile, olom Ngangem wei-dingeri enjep ngom, alamb porpor olom bol pilgi ninam ombun tuiro kolnga aimanj mem sinam.” (Jon 3:16) Olom Ngangem wal kawei wei ende mal ngom, erkelde Johova bol seno kamoramen kaple enem.

 6. Yu duwom pi enamen bar nal yu pende Baibela meim omukro kanamen, nalende embe enamen?

⁶ Sin kenem bol “dina” pamba, Got wal kawei wei ende kenem ngombar kenem sin nalmal wakronda kaple enem? Ki e Baibela yu pende meim bar pundom sinamen, pende embe mal, Got kin kumbol ding moramen, sin binim, Jises golo opa erim, topum ngo toprom, topro siyem kem, ala alamb dulto panim. Yu duwom pi enamen bar, yu e dingding ne Baibel wes jeljel yubol tonom, mem nalmal paim omukro kanamen. Johova kenem sin nalmal wakrom mal omukro kanpol tonamen, erkelde olom kenem kin wal erim mal buro pile sangiyo mem kerma taninamen.

MAK PAKSAMEN E: GOT KIN KUMBOL DING MORAMEN

 7. (a) Adam na Iv tal nawal ende wakronjil? (b) Adam na Iv ngal kopanjel man meimen, nal pake ende sinamen ambsik wei paim? (Rom 5:​10, 11)

⁷ Adam na Iv tal sin enjil kunum kol aimanj mem wakronjil, ala wal ende Danjel Johova bol seno kawei monjil mem wakro olom kin opyem enjil. Adam na Iv tal sin nanjil kunum yero, Johova pemilia tuwal monjil. (Luk 3:38) Ba enjel Johova yu tokele sin enjil kunum olom pemilia toori kem, ala bulto pulnombol ngal kangjil. (Stt. 3:​23, 24; 4:1) Enjel ngal kopanjel man Johova pemilia pra  tuwal moramen kaple narim, nalerim, ende kenem pakeronambe Got kin kumbol ding sende, olom kin seno pemilia tuwal moramen pam. (Rom 5:​10, 11 gere.) Ende kenem pakeronda bar erkelde “Got kin kumbol ding moramen,” ala “opyem mal ermonjin mem porninde olom kin senon kamoramen” wal kerma pam. Weieri, Johova olom olom se ngimba pu kenem pakerom bar, olom kin ala senonamen kaple enem. Nalmal embe erim?

WUSNGAM ERKUN ERIM: SIN BINIM

 8. (a) Kenem sin binim mem panimen e nawal? (b) Jises golo opa erim panimen e nawal?

⁸ Got sin binim panimen e, olom wusngam erkun erim sin pam alamb olom kin seno ala kamoram e pildom. Johova, Adam na Iv tal tai kenjil wal siyem ninal ne wusngam erkun erim, e wal ende topum dingmal wei panda wal ngo, tai kenjil wal siyem ninda pam. Baibel Nupela Testamen yu “sin binim” pane konganem enjip, ala yumem ende dingmal pam konganem e, Jises golo opa erim paninjip eri. (Rom 3:25) Baibel dom, Johova wusngam erkun erim Jises golo opa erim bar, kenem olom kin kapil seno kumbol amin moramen e pildom.

 9. Johova, Israil alamb sin enjip wakronal ne wusngam ende erkun erim, nalernge anjngo karkar narim?

⁹ Johova wusngam erkun ende Israil alamb sin enjip wakrondo, kunum apal pende tuwalto olom bol seno kamoram nepil erim. Israil, alamb kongar dingding ne tuwalto woseding pu make kawei wei ende to kapil molmol enjip, make e kangem Got Sin Binim Kunum pane pilngo makeroro enjip. Makero monjup kunum ai pris kong sipsip na bulmakau togolo alamb kangjepa opa ere, Johova ngongo erim. Embe enjip ba, kong sipsip na bulmakau togol opa enjip alamb sin weieri topornanim, nalerim, alamb mol seminro pu tukong ngonjup. Israil ga kumbol toak weiro Johova eiya nim mal opa ere olom ngonjup, kapil sin wakrom. (Hib. 10:​1-4) Ala wal ende, enjep sin enjip bar opa kunum kunum enjip erkelnge pilkane enjip, opa enjip bar sin porwei ninda napam, wusngam ende erkelde enjep sin aimanj aimanj porwei ninda ambsik kerma wei pam.

10. Johova, alamb sin anjanj wakronal ne nal wusngam ende erkun erim?

¹⁰ Johova, alamb sin anjanj wakronal ne nal wusngam ende erkun erim? Olom wusngam erkun ende kanka kanim Ngangem,“opa kunum dingeri ere alamb puli sin wakronda ne erim.” (Hib. 9:28) Jises olom “kolmem topum mal ngo alamb puli topro siyem kem.” (Mat. 20:28) Topum ngo topronda panimen e nawal?

TOPUM NGOM: TOPUM NGO TOPROM

11. (a) Baibel taninde pilkane esmen, nalende ende topum ngo topro siyem kera pam? (b) Namal mongse topum ngo topro siyem kera kun wei pam?

¹¹ Baibel taninde pilkane esmen, ende topum ngo topro siyem ninda bar kenem sin bininda, ala Got kin kumbol ding moramen pam. a Johova pilkane ere, olom wusngam embe karkar ende bar erkelde, Adam tai kem wal ala siyem kera pam. Adam nawal pende tai kem? Pilkane esmen, Adam na Iv tal sin napam kawei wei monjil mem na kol aimanj aimanj morambel mem wakronjil. Embe pile, ende topum ngo topro siyem kera pamdal, tai kem wal kin topum dingmal mal weingo topro siyem kera pam. (1 Tim. 2:6) Adam tai kem wal topro siyem kera ye e, (1) sin napanda; (2) mala kolnga aimanj mora kaple enda ye, ala (3) olom olom kapil kolmem wakro kenem pakeronda. Alamb embe mal mongse kolmem wakronda  ro, kolmem tai pum ala topum kun weingo siyem kera pam.

12. Jises golo opa erim bar, nalernge topum kun weingo topro siyem kem paninamen?

¹² Mem talende pange Jises golo topum kun weingo topro siyem kera, kaple wei erim omukro kandpe. (1) Olom sin napam—“ala sin ende wei narim eri.” (1 Pita 2:22) (2) Embe pile, mala kol aimanj aimanj mora kaple erim. (3) Olom kolmem ngo golo, kenem topro siyem kera bar kapim. (Hib. 10:​9, 10) Adam sin narim kunum yero Jises kin dingmal wei monjil. (1 Kor. 15:45) Embe pile Jises kenem pilgom bar, Adam tai kem wal topum kun weingo ala topro siyem kem. (Rom 5:19) Jises e, “Adam bulto minwom.” Embe pile ye dulto ende minwo Adam tai kem wal ersiyem ninda konganem napaim. Jises “kunum dingeri golo alamb aimanj aimanj topro siyem kem.”—Hib. 7:27; 10:12.

13. Sin binim na topum ngo topro siyem kem panimen yu tal e, nalmal jeljel paibel?

¹³ Sin binim na topum ngo topro siyem kem panimen yu tal e, nalmal jeljel paibel? Got kenem sin binim panimen e, olom wal pende erim, erkelde alamb olom kin seno ala kapil moram kaple erim e pildom. Nawal erkelde kenem Johova bol seno kamoramen? Johova, ngangem Jises kem golo opa erim bar, topum kun weingo kenem sin topro siyem kem e, pildom. Embe pile Jises topum ngom e, olom maiyam kawei wei toine kenem topum kun weingo siyem kem.—Efe. 1:7; Hib. 9:14.

WAL KAMIN WOM: TOPRO SIYEM KELE ALA ALAMB DULTO PANIM

14. Kenem yipe nawal ende omukro kanamen, ala nalende embe enamen?

¹⁴ Johova kenem sin binim bar nawal ka pende minwom? Baibel yu puli pende konganem ere walka min wom mal dom. Weieri, yu embe mal omukromon mem apal pende jelmal paim. Ba yu dingding ne Johova wusngam erkun erim sin binim mal ne woseding punom. Yu embe mal dingding ne kenem mane omukro kanjin dal, kenem dingding ne sin wakrom ala nalmal pakeronom mal pilkane enamen.

15-16. (a) Baibela yu kenem “topro siyem kem” padom, yumem nalmal paim? (b) Sin na gosmon mem topornim piriari meimen bar kenem nalmal pismen?

¹⁵ Baibela yu, topro siyem kem padom e, Jises golo opa ere kenem piriari meimen e pildom. Wal embe erim bar aposol Pita embe nim: “Enem pilkane enam, mambnem pende ye erwanjip bar Got erkem yipe piriari meim, e enem kopanjep man bol sinjip mambnem, kes mora wal gol na silpa Got ngo enem siyem nakem, [lit. “enem topum ngo topro; ala enem siyem kem.”] Jises Krais maiyam topum kerma pam wal ngo enem topro siyem kem, maiyam e sipsip maiyam mal ma, ala sipsip e kusom ende nganjema napam, kawei wei mom.”—1 Pita 1:​18, 19; ftn.

¹⁶ Jises golo kenem topro siyem kem erkelde, sin na gonjup mem piriari meimen. (Rom 5:21) Memka pande kenem Johova na Jises bol kawei wei pile sangiyo kerma wei ninamen, nalenem, Jises maiyam kawei wei toine kenem topro siyem kem.—1 Kor. 15:22.

17-18. (a) Kenem alamb dulto panimen nal nepilnimen? (b) Johova kenem alamb dulto panim bar pake nalmal simen?

¹⁷ Baibel Johova konganem alamb dulto padom. Nalenem, kenem sin enjin bar kenem kenem topum ngo, enem sin topro siyem keram panadom. Johova mambnem embe enem bar; olom lo pakim mal karkar kawei enem. Kenem kenem wal ende enjin bar alamb dulto panadom, ala Johova kenem sin esmen kanapisem eri. Jises golo opa erim bar pilgi nimen pile, Johova kenem sin esmen wakronda kapisem.—Rom 3:24; Gal. 2:16.

 ¹⁸ Johova kenem alamb dulto padom bar pake nalmal simen? Ga pende semin epen pu Jises bol kongan King enam, Got na ngalna man alamb dulto pane sikem. (Tai. 3:7; 1 Jon 3:1) Nalerim, enjep sin aijep wakrom. Enjep sin ere ere enjip mambnem wakro sikenjip, embe pile Got Gapmana kongan enam kaple enem. (Rom 8:​1, 2, 30) Mala moram nepilgi nim ga, Got enjep alamb dulto pane sin wakrom, embe pile olom kin seno mala aimanj aimanj moram. (Jems 2:​21-23) Alamb puli keswei Got nganmal Amagedon tuironam alamb, ala weiwei nagoram. (Jon 11:26) “Mambnem dulto enjip na mambnem kes enjip alamb” aima gonjup kipkua wur pameim, ala akil sewonam. (Apo. 24:15; Jon 5:​28, 29) Johova yu dom pilsi karkar ere ya mala konganem ermeim alamb, “piriari mem pase ngimba wei punom si Got ngalem man, mal moram.” (Rom 8:21) Kunum ende sende ala wose kawei wei pu—Danjen Johova ngalem man mal, moramen kawei wei pismen!

19. Johova na Jises kenem bol wal pende enjil bar, nawal ka pende min wom? (Boksa yu pengem, “ Johova Kenem Sin Wakrom,” pane paim kanjel.)

¹⁹ Kenem yu duwom min ngimba pulnombonjin bar, yegal ende wal puli kannom porninge, dina kerma pam ngoyem kera kaple narim paninjin mal, kenem embe ding mal monjin. Ba Johova sangiyo wei nengonamen, nalenem, kenem pakerom. Nomolpa enjin bar woka pum, nalerim, Johova wusngam erkun ere Jises kem wo golo kenem sin topro siyem kem. Jises golo opa erim bar pilgi nimen erkelde, sin na gosum mem tuiro piriari meimen. Johova kenem sin wakronom, weieri wakro sikerem ala buro napisem. Wal kerma wei paim kanka mem sem Danjen Johova min epen meim, yipe olom bol senonamen kaple enem.

20. Yu duwom bulto enamen bar nawal pende omukro kanamen?

²⁰ Johova na Jises kenem bol mambnem ka enjil bar buro yemkel pismen kunum, kumbola kawei wei pile sangiyo kerma wei nimen. (2 Kor. 5:15) Enjel pake naronambilnge, kenem walka ende kui nanamnge! Johova kenem dingding ne sin wakrom bar mem nalmal paim? Yu duwom bulto enamen bar Baibela yu ekin pende meim kenem pakerondo, Johova sin weieri wakronom pile kumbol yu pande anjngo kisal golo namoramen mal omukro kanamen.