Kailoa, ʼe mole lelei te ʼu lotu fuli. ʼE lahi te ʼu faʼifaʼitaki fakalotu ʼe tuku mai e te Tohi-Tapu ʼe mole leleiʼia e te ’Atua. ʼE feala ke tou ma’u te ʼu faʼifaʼitaki ʼaia ia aluʼaga ʼe lua.

Aluʼaga 1: Te ʼu lotu ʼae ʼe atolasio ki te ʼu ʼatua hala

 ʼE ui ʼi te Tohi-Tapu ko te tauhi ʼae ki te ʼu taula ’atua ʼe “mole he ʼuhiga” pea “ʼe mole pe he ʼaoga,” ʼe mole ma’uhiga he ’e mole ina foaki mai he me’a ʼe lelei. (Selemia 10:​3-5; 16:19, 20) Ne’e fakatotonu e Sehova a ki te puleʼaga ʼo Iselaele: “ʼE mole tonu ke ke atolasio ki he tahi age ʼu ʼatua.” (Ekesote 20:​3, 23; 23:24) ʼI te temi fuli pe ʼae ʼe atolasio ai te puleʼaga ʼo Iselaele ki he ʼu tahi age ʼatua, “neʼe kovi ʼosi te ita ʼo Sehova.”​—Numelo 25:3; Levitiko 20:2; Tuʼi Fakamau 2:​13, 14.

 ʼE mole fetogi te manatu ʼa te ʼAtua ki te tauhi ʼae ʼe momoli e ʼihi kia natou “ʼae ʼe higoa ko he ʼu ʼatua.” (1 Kolonito 8:​5, 6; Kalate 4:8) ʼE ina fakatotonu kia natou ʼae ʼe fia atolasio ʼateaina pe kia te ia ke mole toe fakatahi mo natou ʼae ʼe tauhi ki te lotu hala: “Kotou ʼomai kehe mai ia natou, pea mo mavae kehe mai ai.” (2 Kolonito 6:​14-​17) He koʼe ne’e fai e Sehova he fakatotonu feia mo kapau ko te ʼu lotu ʼe lelei fuli pea ʼe natou taki fuli pe kia te ia?

Aluʼaga 2: Ko te ʼu lotu ʼae ʼe atolasio ki te ʼAtua mo’oni ʼaki he tauhi ʼe mole ina tali

ʼI ʼihi temi, ne’e atolasio te kau Iselaele ki te ʼAtua ’aki he fa’ahiga fai ne’e natou faʼifaʼitaki’i mai te ʼu fa’ahiga tauhi ʼae ne’e momoli ki te ʼu ʼatua hala. Kae ne’e fakafisi te ’Atua ki tanatou faigaʼi ʼae ke fefio’aki te tauhi ʼae ʼe mo’oni mo te tauhi ʼae ʼe hala. (Ekesote 32:8; Tetelonome 12:​2-4) Ne’e tautea’i e Sesu te ʼu pule lotu malualoi ʼo tona temi ʼuhi ko tanatou fa’ahiga atolasio ki te ʼAtua. ʼE natou hage mai ʼi mu’a ʼe natou pipiki ki te ’Atua, kae neʼe natou “meʼa noaʼi te ʼu faʼahi ʼo te Lao ʼae ʼe maʼuhiga age, ʼae ko te faitotonu, mo te manavaʼofa pea mo te agatonu.”​—Mateo 23:23.

 ʼE toe feia pe ia ʼaho nei, ʼe gata pe ki te lotu ʼae ʼe fakatafito ki te mo’oni ʼe ina taki te haha’i ki te ’Atua. ʼE tou ma’u te mo’oni ʼaia ʼi te Tohi-Tapu. (Soane 4:​24; 17:17; 2 Timoteo 3:​16, 17) Ko te ʼu lotu ʼae ʼe ko ʼanatou akonaki ʼe fakafeagai ki te ʼu akonaki ʼo te Tohi-Tapu, ʼe ina fakamama’o te haha’i mai te ’Atua. ʼE lahi te ʼu akonaki ʼe ui e te haha’i ne’e hiki mai te Tohi-Tapu ohage ko te Tahitolutapu, te laumalie tuputupua pea mo te ʼifeli ko he koga me’a ʼe ulo ai he afi ʼo he’e gata mo fakamamahi’i te tagata agahala. Kae ko te ʼu akonaki loi ʼaia ne’e to’o ia mai te ʼu tauhi ʼae ne’e momoli ki te ʼu ʼatua hala. Ko te lotu ʼae ʼe ina fakama’uhiga’i he akonaki feia “ʼe mole he ʼuhiga” ʼuhi ʼe ina fetogi te ʼu fakatotonu ʼa te ʼAtua ʼaki te ʼu talatilisio.​—Maleko 7:​7, 8.

 ʼE fehi’a te ʼAtua ʼi te ʼu lotu ʼae ʼe malualoi. (Tito 1:​16) Kapau ʼe fia tokoni he lotu ki te haha’i ke fakaovi ki te ʼAtua, ʼe tonu ke ina fakamalohi natou ke natou ma’uliʼi te ʼu pelesepeto ʼo te ʼAtua ʼi te ʼaho fuli, kae ʼe mole ina fakafeʼauga pe tanatou tauhi ki he aga’i fenua ʼe natou lelei’ia pe’e ko tanatou fakaʼapaʼapa ki te ʼu lekula ʼo te to’oto’oga fakalotu. Ohage la, ʼe ui fenei ʼi te Tohi-Tapu: “Kapau e ui e he tagata ʼe tauhi lotu, kaʼe ʼe mole ina puleʼi tona ʼalelo, ʼe ina kakaʼi tona loto totonu, pea ʼe mole he ʼaoga ʼo tana tauhi. Koʼeni te manatu ʼo totatou ʼAtua pea mo Tamai ʼo ʼuhiga mo te lotu ʼae ʼe maʼa pea mo heʼe mele: ke tokaga kia natou ʼae ʼe hala mo tamai pea mo faʼe pea mo te kau vitua ʼae ʼe mamahi, pea mo fakamamaʼo mai te ʼu aga ʼuli ʼo te malamanei. (Sakopo 1:​26, 27, nota) Ko te Bible du roi Jacques ʼe ina faka’aoga’i te kupu “lotu haohaoa” mo’o hino’i te lotu ʼae ʼe mole malualo’i.