Ko te agahala ʼe ko he aga, ko he aluʼaga ʼe logo loto peʼe ko he manatu ʼe feagai ki te ʼu tuʼutuʼuni ʼa te ʼAtua. ʼE toe fakaʼuhiga ki te fakafeagai ki te ʼu lao Fakaʼatua. Peʼe ko he tahi ʼe ina fai he aga ʼe kovi mo talagataʼa ki te ʼAtua. (1 Soane 3:4; 5:​17) ʼE toe talanoa ʼi te Tohi-Tapu ki te ʼu agahala ʼae ʼe fai ʼaki te loto faʼitaliha, ko tona fakaʼuhiga ko he tahi ʼe ina iloi te fai ʼo te meʼa ʼae ʼe lelei kae ʼe mole ina fai.​—Sakopo 4:​17.

 ʼI te ʼu lea ʼae neʼe tohi ʼaki te Tohi-Tapu, ko te ʼu kupu ʼae neʼe fakaliliu ʼaki te kupu agahala ʼe fakaʼuhiga “neʼe mole lava hoko he fakatuʼutuʼu.” Ohage la ko te kau solia ʼo Iselaele neʼe faiva ʼi te tau makamaka ʼo “mole hala he tahi ia natou.” Koia, ko te manatu ʼaia ʼe fakaʼuhiga “neʼe mole fai he agahala.” (Tuʼi Fakamau 20:16) ʼEi, ko te fai ʼo he agahala ko tona ʼuhiga neʼe mole lava hoko he fakatuʼutuʼu ʼae ko te ʼu lekula haohaoa ʼa te ʼAtua.

 ʼI tana fakatupu ia meʼa fuli, ʼe tuha mo te ʼAtua ke ina fai he ʼu lao maʼa te tagata. (Apokalipesi 4:​11) ʼE tou tahi huʼi maʼua anai ki te ʼAtua ʼo mulimuli ki ʼatatou aga.​—Loma 14:12.

ʼE feala koa ke mole tou fai he agahala?

 Kailoa. ʼE ui ʼi te Tohi-Tapu “ʼe agahala te hahaʼi fuli pe, pea ʼe mole natou kaku ki te kololia ʼo te ʼAtua.” (Loma 3:23; 1 Hau 8:46; Ekelesiasi 7:20; 1 Soane 1:8) Kotea tona tupuʼaga?

 ʼI te kamata ko Atama mo Eva ʼatatou ʼuluaki matuʼā, neʼe nā haohaoa, he neʼe fakatupu naua ʼo mulimuli ki te pāki ʼo te ʼAtua. (Senesi 1:​27) Kae ʼaki leva tanā talagataʼa ki te ʼAtua, neʼe mole kei nā haohaoa leva. (Senesi 3:​5, 6, 17-​19) ʼO nā tuku holo ai te ʼu nunuʼa kovi ʼo tanā talagataʼa ki ʼanā fanau fuli ia te agahala pea mo te heʼe haohaoa. (Loma 5:​12) Ohage ko tona ui e te Hau ko Tavite: “Neʼe fanauʼi au kae neʼe kua au lakahala.”​—Pesalemo 51:5.

ʼE ʼi ai koa ni agahala ʼe mamafa age ʼi ʼihi atu agahala?

 ʼEi. Ohage la, ʼe ui ʼi te Tohi-Tapu ko te hahaʼi tagata ʼo te kolo ko Sotoma neʼe natou “agakovi” pea ko ʼanatou agahala neʼe “mamafa aupito.” (Senesi 13:13; 18:20) Tokagaʼi aluʼaga ʼe tolu ʼe ina fakafealagia ke tou mahino ki te kovi pea mo te mamafa ʼo he agahala.

1.   Te mamafa. ʼE fakatokagaʼi ʼi te Tohi-Tapu te ʼu agahala mamafa ohage ko te ʼu felaveʼi fakasino heʼe ʼaoga, mo te tauhi taula ʼatua, mo te kaihaʼa, mo te inu kava fakavalevale, mo te faʼao te ʼu koloa ʼa he tahi mo te faifakapo pea mo te faifakalauʼakau. (1 Kolonito 6:​9-​11; Apokalipesi 21:8) ʼE ina fakakeheʼi mai te ʼu agahala ʼae neʼe mole fakakaukauʼi ohage ko he ʼu palalaʼu mo he ʼu aga fakatupu mamahi. (Taʼaga Lea 12:18; Efeso 4:​31, 32) Kae, ʼe uga tatou e te Tohi-Tapu ke ʼaua naʼa tou ui ko he kiʼi agahala veliveli pe, he ʼe feala ai ke ina taki tatou ke tou fai he ʼu aga ʼe kovi age ia ʼe fakafeagai ki te ʼu lao ʼa te ʼAtua.​—Mateo 5:​27, 28.

2.   Te ʼu meʼa ʼi te loto. Ko ʼihi hahaʼi neʼe natou fai ni agahala ʼuhi ʼae ʼe mole natou mahino ki te finegalo ʼo te ʼAtua. (Gaue 17:30; 1 Timoteo 1:​13) Logo la ʼe mole he ʼu takuʼaki lelei ʼo te ʼu agahala ʼaia, kae ʼe fakakeheʼi e te Tohi Tapu mai te ʼu agahala ʼae ʼe fai ʼaki te loto faʼitaliha ki te ʼu lao ʼo te ʼAtua. (Numelo 15:30, 31) Ko te ʼu agahala ʼae neʼe fai ʼaki te loto faʼitaliha ʼe tupu mai he ‘loto ʼe kovi.’​—Selemia 16:12.

3.   Te fai tuʼumaʼu ʼo he agahala. ʼE toe fakakehekeheʼi ʼi te Tohi-Tapu te agahala ʼae ʼe tau hoko ʼi he temi mo te agahala ʼae ʼe fai ʼi he temi loaloaga. (1 Soane 3:​4-8) Ko natou ʼae ʼe natou “haga fai faʼifaʼitaliha te agahala,” logo ai pe la tanatou kua iloʼi te fai ʼo te meʼa ʼae ʼe totonu kae ʼe natou atalitali ʼi te mataku ki te fakamau ʼo te Atua.​—Hepeleo 10:26, 27.

 Ko natou ʼae neʼe natou fai he ʼu agahala mamafa, ʼe natou logoʼi tonatou taʼomia ʼuhi ko te kua mamafa fau ʼo ʼanatou agahala. Ohage, ko te Hau ko Tavite neʼe ina ui fenei: “ʼE au taʼomia ʼi ʼaku agahala, ʼe hage ko he kavega mamafa ʼe mole au lava ʼamo.” (Pesalemo 38:4) Kae, ko te Tohi-Tapu ʼe ina fakapapauʼi mai: “Ke liʼaki e te agakovi ʼana aga, pea mo te tagata agakovi ʼana manatu. Ke toe liliu mai kia Sehova pea ʼe ʼofa anai ki ai, ʼei ki totatou ʼAtua, he ʼe fakamolemole lahi anai ki ai.”​—Esaia 55:7.