Neʼe iloʼi e Sakopo ʼe tuha mo Sehova te pipiki ʼateaina kia te ia, logo la neʼe heʼeki ina fakatuʼu he lao ki te tauhi taula ʼatua. (Ek 20:3-5) Koia, ʼi te ui age e Sehova ke toe liliu ki Petele, neʼe fakatotonu leva e Sakopo kia natou fuli ʼae neʼe ʼi ai mo ia, ke natou liʼaki ʼanatou taula ʼatua. Neʼe laku e Sakopo te ʼu taula ʼatua ʼae neʼe ko he ʼu meʼa puipui ʼo natou, ʼo kau ai te ʼu foʼi hau. (Sen 35:1-4) ʼE mahino ia neʼe fiafia ʼaupito ia Sehova ʼi te gaue ʼae neʼe fakahoko e Sakopo.

Ia ʼaho nei, ʼe feafeaʼi hatatou lava tauhi ʼateaina pe kia Sehova? ʼE tonu muʼa ke tou tekeʼi te ʼu meʼa fuli ʼae ʼe pipiki ki te tauhi taula ʼatua peʼe ko te faifakalauʼakau. Ko tona fakaʼuhiga ke liʼaki te ʼu meʼa fuli ʼae ʼe pipiki ki te ʼu gaohi meʼa fakatemonio, pea ke tou vakavakaʼi leleiʼi ʼatatou fakafiafia. Ohage la, kotou fai te ʼu fehuʼi ʼaeni: ‘ ʼE au leleiʼia koa te ʼu tohi peʼe ko te ʼu ʼata ʼae ʼe ʼasi ai he ʼu hahaʼi ʼe natou inu te toto, peʼe ko he ʼu hahaʼi kua mamate pea kua toe maʼuʼuli ake ia ohage ko ni temonio, peʼe ko he faifakalauʼakau? ʼE fakaha mai koa ʼi ʼaku fakafiafia, ko te ʼu gaohi meʼa fakamanamana peʼe ko te ʼu faitutuku ʼe mole hona ia kovi?’ ʼE tonu ke tou fakamamaʼo mai te ʼu meʼa fuli ʼaia he ʼe fehiʼa ʼaupito ki ai ia Sehova.—Pes 97:10.

VAKAʼI TE ʼATA VITEO “FAKAFEAGAI KI TE TEVOLO,” PEA MO TALI KI TE ʼU FEHUʼI ʼAENI:

• Kotea te aluʼaga neʼe hoko kia Palesa?

• He koʼe ʼe ko he aga fakapotopoto ʼo te kumi tokoni ki te kau tagata ʼafea moka ʼe tau he tahi kua ako, peʼe ko kita mo he fihifihia ʼo ʼuhiga mo te ʼu faifakalauʼakau?

• Kapau ʼe tou loto ke puipui tatou e Sehova, kotea ʼae ʼe tonu anai ke tou liʼaki?

• Kotea te tonu ʼae neʼe fai e Palesa?

• ʼE feafeaʼi hau tekeʼi te ʼu fakaneke ʼa te kau temonio?