Ko te ʼofa ʼe ina fakatahiʼi te famili. Kapau ʼe mole maʼu ia te ʼofa ʼe mole feala ke natou logo tahi pea mo faifaitahi. Kotea ʼae ʼe tonu ke fai e te tagata mo tona ʼohoana pea mo te ʼu matuʼā, ke natou fefakahaʼaki te ʼofa?

Ko he tagata ʼe ʼofa ki tona ʼohoana, ʼe ina tokagaʼi ia te ʼu meʼa ʼae ʼe ʼaoga ki ai, mo ʼana manatu, pea mo te ʼu meʼa ʼae ʼe ina logoʼi ʼi tona loto. (Efe 5:28, 29) ʼE tokaga ki ai ʼi te faʼahi fakasino, ʼo feia mo te faʼahi fakalaumalie. ʼE ina fai tuʼumaʼu tanatou ako fakafamili. (1Ti 5:8) Ko he fafine ʼe ʼofa ki tona ʼohoana, ʼe fakalogo pea mo fakaʼapaʼapa ki ai. (Efe 5:22, 33; 1Pe 3:1-6) ʼE nā fefakamolemoleʼaki ʼaki he lotolelei. (Efe 4:32) Ko he ʼu matuʼā manavaʼofa, ʼe nā tokakaga ki ʼana fanau takitokotahi pea akoʼi natou ke natou ʼoʼofa ia Sehova. (Te 6:6, 7; Efe 6:4) Kotea te ʼu fihifihia ʼe tau mo te ʼu fanau ʼi te fale ako? ʼE natou lava tauʼi koa te ʼu fakaneke kovi ʼa te tamaliki? Ka feʼofaʼaki he kiʼi famili, ʼe natou lotofimalie.

VAKAʼI TE ʼATA VITEO TOU HAGA FAKAHA TE ʼOFA ʼI TOTATOU FAMILI, PEA MO TALI KI TE ʼU FEHUʼI ʼAENI:

• Kotea ʼae ʼe fai e he tagata ʼe ʼofa ki tona ʼohoana?

• ʼE fakaha feafeaʼi e he fafine ʼe fakaʼapaʼapa ki tona ʼohoana?

• Kotea ʼae ʼe feala ke fai e te ʼu matuʼā ke natou akoʼi te Folafola ʼa te ʼAtua ki ʼanatou fanau?