NEʼE haʼele lalo he ʼu fafine ʼe toko lua ʼi he kolo ʼe lahi ai te ʼu fale koloa, ʼi te Kolo ko Baguio, ʼi Philippines. Neʼe nā sisio ki he laupapa ʼa he ʼu Fakamoʼoni ʼa Sehova kae neʼe mole nā fakaovi ki ai. Neʼe tuʼu ʼi ai te tuagaʼane ko Helen pea neʼe malimali kia naua. Neʼe mole tutuʼu age te ʼu fafine ia kae neʼe nā punamaʼuli ʼi tana malimali age.

Ki muli age, neʼe liliu leva te ʼu fafine ʼaia kio naua ʼi te papika. Pea neʼe nā sisio leva ki he Fale Fono mo he pano lahi ʼe tuʼu ai jw.org. Neʼe nā manatuʼi ai neʼe kua nā sisio ki te ʼu mataʼi tohi ʼaia ʼi te laupapa. Neʼe nā hihifo atu aipe ʼi te papika ʼo olo ki te Fale Fono ʼo vakaʼi te ʼu hola ʼae ʼe fai ai te ʼu fono ʼa te ʼu kokelekasio kehekehe.

Neʼe kau leva te ʼu fafine ʼaia ʼe lua ki he fono. ʼI tanā hu ki te Fale Fono, ko ai ʼae neʼe nā sisio ki ai? Ko Helen. Neʼe nā iloʼi atu aipe ia te fafine ʼae neʼe malimali age kia naua. ʼE ui fenei e Helen: “ ʼI tanā fakaovi mai kia au, neʼe ʼai taku kiʼi tuʼania. Neʼe au feʼekeʼaki pe neʼe au fai he meʼa ʼe kovi.” Kae neʼe fakamahino age e te ʼu fafine te aluʼaga ʼae neʼe hoko.

Neʼe nā leleiʼia ʼaupito te fono pea neʼe nā fiafia ʼi te fakatahi mo te ʼu tehina mo tuagaʼane. Pea ʼi tanā sisio ki te fakamaʼa e ʼihi ia te fale fono, neʼe nā olo ʼo tokoni ki ai. Neʼe alu leva te tahi fafine ki he tahi fenua kae ko te tahi ʼe kau ki te ʼu fono pea neʼe kamata tana ako Tohi-Tapu. Neʼe hoko te ʼu meʼa fuli ʼaia ʼuhi pe ko he malimali.