1-2. Kotea ʼae ʼe tonu ke fai e he tahi ʼi muʼa ʼo tona papitema?

 ʼI TE ʼu taʼu ʼe nima kua hili, neʼe papitema te toko tahi miliona tupu ko te kau Fakamoʼoni ʼa Sehova. Tokolahi ia natou, neʼe natou hage ko Timoteo ʼae neʼe ko he tisipulo ʼi te ʼuluaki sekulo. Neʼe natou iloʼi te moʼoni ‘talu mai tanatou kei meamea.’ (2 Tim. 3:14, 15) Ko ʼihi neʼe natou iloʼi ia Sehova kua natou lalahi peʼe kua natou matutuʼa. Neʼe heʼeki faʼa fualoa ki ai, neʼe ʼi ai he fafine neʼe ina ako te Tohi-Tapu mo te kau Fakamoʼoni ʼa Sehova pea neʼe papitema ʼi tona taʼu 97.

² Kapau ʼe ke ako te Tohi-Tapu peʼe neʼe ke lahilahi ake ʼe tauhi ʼau matuʼā kia Sehova, neʼe kua ke manatu koa ke ke papitema? Ko he fakatuʼutuʼu lelei ia. Kae ʼi muʼa ʼo tou papitema, ʼe tonu anai ke ke foaki tou maʼuli kia Sehova. ʼE fakamahino atu anai ʼi te alatike ʼaeni, pe kotea te fakaʼuhiga ʼae ke ke foaki tou maʼuli ki te ʼAtua. ʼE toe tokoni atu anai ke ke mahino pe koʼe ʼe mole tonu ke ke mataku ki te foaki ʼo tou maʼuli ki te ʼAtua pea mo papitema moka kua ke tokalelei ki te faʼahi ʼaia.

KOTEA TE FAKAʼUHIGA ʼO TE FOAKI ʼO TOKITA MAʼULI KI TE ʼATUA?

3. Tuku mai he ʼu faʼifaʼitaki ʼi te Tohi-Tapu ʼo ni hahaʼi neʼe foaki maʼa Sehova.

³ ʼI te Tohi-Tapu, ka foaki e he tahi tona maʼuli ki te ʼAtua, ko tona fakaʼuhiga neʼe tuku keheʼi ia ia ki he gaue makehe. Ko te kau Iselaele neʼe ko he puleʼaga neʼe foaki maʼa Sehova. Kae ko  ʼihi ia natou, neʼe foaki maʼa Sehova ʼi hona aluʼaga makehe. Ohage la, ʼi te kie taputapu ʼae neʼe takai ʼaki te ʼulu ʼo Alone neʼe fakamaʼu ai te lauʼi ukamea aulo gigila ia te “fakailoga taputapu” ʼo fakatafa ki muʼa. Neʼe ha ʼi te lauʼi ukamea aulo ʼaia, neʼe tuku keheʼi ia ia ke ina fakahoko he gaue makehe maʼa Sehova. Ko tona fakaʼuhiga ke liliu ko he pelepitelo lahi ʼo Iselaele. (Lev. 8:9) Neʼe toe foaki te kau Nasilea kia Sehova ʼi hona aluʼaga makehe. Ko te kupu “Nasilea,” ʼe haʼu mai te kupu Fakahepeleo nazirʹ, ko tona fakaʼuhiga “Ko He Tahi Neʼe Vaheʼi Kehe,” peʼe “Ko He Tahi Neʼe Foaki.” Neʼe tonu ke fakaʼapaʼapa ia te kau Nasilea ki te ʼu tapu ʼae neʼe tuʼu ʼi te Lao ʼa Moisese.​—Num. 6:2-8.

4. (1) Kotea te fakaʼuhiga ʼae ko natou ʼae kua foaki ʼonatou maʼuli kia Sehova ʼe tuku keheʼi ki he gaue makehe? (2) Kotea te fakaʼuhiga ʼae ke “fakafisi” kia ia totonu? (Vakaʼi mo te pāki.)

⁴ Ka ke foaki tou maʼuli kia Sehova, ʼe ke filifili ke ke liliu ko he tisipulo ʼa Sesu Kilisito pea mo ke fakamuʼamuʼa ʼi tou maʼuli te fai ʼo te finegalo ʼo te ʼAtua. Koia, kotea ʼae ʼe tonu ke ke fai? Neʼe ui e Sesu: “Kapau ʼe fia muli mai he tahi ia te au, ke fakafisi kia ia totonu.” (Mat. 16:24) Ko te kupusiga palalau ʼaeni neʼe fakaliliu ʼi te Fakakeleka “fakafisi kia ia totonu” ʼe feala ke toe fakaliliu fenei “mole kei kita maʼuli maʼa kita totonu.” ʼI tau kua foaki tou maʼuli kia Sehova, ʼe tonu anai ke ke fakafisi kia meʼa fuli ʼe fakafeagai ki tona finegalo. (2 Ko. 5:14, 15) Ko tona fakaʼuhiga ʼe tonu anai ke ke liʼaki “te ʼu gaue ʼo te kakano,” ohage ko te ʼu felaveʼi fakasino heʼe ʼaoga. (Kal. 5:19-21; 1 Ko. 6:18) ʼE ke maʼuli mamahi koa mo kapau ʼe ke fakalogo ki te ʼu fakatotonu ʼaia? Kailoa ia, mo kapau ʼe ke ʼofa ia Sehova pea mo ke tui papau ʼe fua lelei kia koe ʼana lao. (Pes. 119:97; Esa. 48:17, 18) Neʼe ui fenei e te tehina ko Nicholas: “ ʼE feala hau fakaʼuhiga te ʼu lao ʼa Sehova ohage ko he ʼu ʼa ukamea ʼo he pilisoni, ke ʼaua naʼa ke fai te meʼa ʼae ʼe ke loto ki ai, peʼe ko he ʼa  ukamea ʼo he ʼu laione ʼe puipui ai koe mai he tuʼutamaki.”

5. (1) ʼE feafeaʼi hau foaki tou maʼuli kia Sehova? (2) Kotea ʼae ʼe kehekehe ai tau foaki tou maʼuli kia Sehova pea mo te papitema? (Vakaʼi mo te pāki.)

⁵ ʼE feafeaʼi hau foaki tou maʼuli ki te ʼAtua? Ka ke foaki tou maʼuli kia Sehova ʼe ke fakapapau kia te ia ʼi te faikole ʼe ke atolasio pe kia te ia pea ʼe ke haga fakamuʼamuʼa anai ia tona finegalo. ʼEi, ʼe ke fakapapau ʼe ke haga ʼofa anai kia te ia mo “tou loto katoa, mo tou maʼuli katoa, mo tou ʼatamai katoa pea mo tou malohi katoa.” (Mko. 12:30) ʼE kehe ia mo te papitema he ʼe ke fakaha ia muʼa ʼo te kauga malie kua ke foaki tou maʼuli kia Sehova. Kae ka ke foaki tou maʼuli kia Sehova, ʼe ko he fakapapau ʼe ke fai tokotahi, ko koe pe ia pea mo Sehova. ʼE ko he fakapapau taputapu. ʼE tonu ke ke fakahoko te fakapapau ʼaia, pea ʼe loto e Sehova ke ke fakahoko.​—Ekl. 5:4, 5.

HE KOʼE ʼE KE FOAKI TOU MAʼULI KIA SEHOVA?

6. He koʼe ʼe ke foaki tou maʼuli kia Sehova?

⁶ Kapau ʼe ke foaki tou maʼuli kia Sehova, koteʼuhi ʼe ke ʼofa ia te ia. Pea ʼe mole fakatafito pe tou ʼofa ki he ʼu meʼa ʼe ke logoʼi. Kae ʼe fakatafito ia ki “te ʼatamai malama totonu” pea mo te “mahino fakalaumalie” ʼae neʼe ke maʼu ʼo ʼuhiga mo tona finegalo. Ko tona fakaʼuhiga ia te ʼu meʼa ʼae neʼe ke ako ʼo ʼuhiga mo te ʼAtua. ʼE ko te ʼu aluʼaga ʼaia, neʼe tupu ai ia te malohi ʼo tou ʼofa ʼae kia te ia. (Kol. 1:9) ʼI tau ako te Tohi-Tapu neʼe ke tui papau ai, (1) ʼe maʼuli moʼoni ia Sehova, (2) ko te Tohi-Tapu ʼe ko tana Folafola, pea (3) ʼe ina fakaʼaogaʼi tana kautahi moʼo fakahoko tona finegalo.

7. Kotea ʼae ʼe tonu ke tou fai ʼi muʼa ʼo tatatou foaki totatou maʼuli ki te ʼAtua?

⁷ Ko he tahi ʼe ina foaki tona maʼuli kia Sehova,  ʼe tonu ke ina iloʼi te ʼu akonaki tafito ʼo tana Folafola pea mo maʼuliʼi ʼana lao. ʼE palalau ki tana tui ki ʼihi moka ko he aluʼaga ʼe feala. (Mat. 28:19, 20) Neʼe tuputupu tona ʼofa ʼae kia Sehova pea ʼe ko ia tokotahi pe ʼae ʼe fia tauhi ki ai. ʼE toe feia koa mo koe? Kapau ʼe ke maʼu te taʼi ʼofa ʼaia ki te ʼAtua, ʼe ke mahino ai anai ʼe mole tonu ke ke foaki pe tou maʼuli kia te ia pea mo papitema, ʼuhi pe ko tau fia lelei kia ia ʼe ina fai tau ako peʼe ko ʼau matuʼā peʼe ke fia fai ohage ko ʼou kaumeʼa.

8. Kotea te pikipikiga ʼo te lotofakafetaʼi mo te tonu ʼae ke kita foaki tokita maʼuli kia Sehova? (Pesalemo 116:12-14)

⁸ Kapau ʼe ke manatuʼi ia te ʼu meʼa ʼae neʼe fai e Sehova maʼa koe, ʼe tuputupu ai tau fia foaki tou maʼuli kia te ia. (Lau ia Pesalemo 116:12-14.) ʼE fakamahino ʼi te Tohi-Tapu ʼe ko ia ʼae ʼe ina Foaki “te ʼu meʼa ʼofa lelei fuli mo haohaoa.” (Sakp. 1:17) ʼE kau ʼi te ʼu meʼa ʼofa ʼaia te toe meʼa ʼofa maʼuhiga ʼaeni ia te sakilifisio ʼo tona ʼAlo ia Sesu. Fakakaukauʼi age muʼa te aluʼaga ʼaeni, ʼe feala ke ke maʼu he ʼu felogoi lelei mo Sehova pea mo maʼuli ʼo heʼe gata ʼuhi ko te totogi. (1 Soa. 4:9, 10, 19) Ka ke foaki tou maʼuli kia Sehova, ʼe ko hau fakaha ʼaia tau lotofakafetaʼi ki te sakilifisio. ʼEi, ʼe ke lotofakafetaʼi ki te toe ʼofa lahi ʼaia ʼa te ʼAtua pea mo ʼihi atu tapuakina ʼe ina foaki atu. (Tet. 16:17; 2 Ko. 5:15) ʼI te tohi Ke Ke Fiafia ʼo Heʼe Gata, ʼe fakamaʼuhigaʼi ai te manatu ʼaia ʼi te puani 4 ʼo te ako 46. ʼE tou maʼu ai mo te kiʼi ʼata ʼe minuta tolu ʼaeni Foaki ʼAu Meʼa ʼOfa Ki Te ʼAtua.

KUA KE TOKALELEI KOA?

9. Kapau heʼeki tokalelei he tahi ke ina foaki tona maʼuli kia Sehova, kotea ʼae ʼe mole tonu ke ina fai?

⁹ ʼE ke feuiʼaki koa heʼeki ke tokalelei ke ke foaki tou maʼuli kia Sehova pea mo papitema. ʼE lagi ke manatu ʼe tonu muʼa ke ke fai he ʼu fetogi ʼo tou maʼuli moʼo fakaalu tahi mo te ʼu lao ʼa Sehova. Peʼe lagi ʼaoga atu he temi moʼo fakamalohiʼi tau tui. (Kol. 2:6, 7) ʼE mole tatau tatatou faʼahiga tuputupu fuli. Pea ʼe mole atali ia te kau tupulaga fuli ke natou taʼu tahi ke natou foaki ʼonatou maʼuli kia Sehova pea mo papitema. Koia, ʼaua naʼa ke fakatatau ia koe ki he tahi moka ʼe ke vakavakaʼi pe ʼe ke tuputupu ʼi te faʼahi fakalaumalie. Kae ke ke sivisivi koe ia te meʼa ʼae ʼe ke lava fai.​—Kal. 6:4, 5.

10. Kapau ʼe ke manatu heʼeki ke tokalelei ke ke foaki tou maʼuli kia Sehova pea mo papitema, kotea ʼae ʼe feala ke ke fai? (Vakaʼi mo te ʼa takai “ Ia Natou ʼAe ʼe Lalahi Ake ʼi Te Moʼoni.”)

¹⁰ Kapau heʼeki ke tokalelei ke ke foaki tou maʼuli kia Sehova, taupau maʼu te fakatuʼutuʼu lelei ʼaia. Kole kia Sehova ke ina tapuakiʼi ʼau faiga ʼae ke ke fai ia fetogi fuli ʼe tonu ke ke fai. (Flp. 2:13; 3:16) ʼE mahino papau ia, ʼe fagono anai ki ʼau faikole pea mo ina tali anai.​—1 Soa. 5:14.

HE KOʼE ʼE LOTOLOTOLUA ʼIHI?

11. ʼE tokoni feafeaʼi mai anai ia Sehova ke tou nofo agatonu kia te ia?

¹¹ ʼE tokalelei ʼihi ke natou foaki ʼonatou maʼuli kia Sehova mo papitema kae ʼe natou lotolotolua aipe. ʼE natou tau feuiʼaki: ‘Kapau ʼe au fai te faʼahi ʼaia, ʼe au fai anai he agahala mamafa pea mo fakamavae au?’ Kapau ʼe ke tuʼania te faʼahi ʼaia, manatuʼi ʼe foaki atu anai e Sehova ia meʼa fuli ʼe ʼaoga atu ke ke ‘fai te ʼu meʼa ʼae ʼe tuha mo ia pea mo fakafiafiaʼi ai tona loto.’ (Kol. 1:10) ʼE ina toe foaki atu anai te malohi ke ke fakahoko lelei te faʼahi ʼaia. Neʼe ina fakaha ʼe ina lava fakahoko he neʼe kua ina fai maʼa te tokolahi. (1 Ko. 10:13) Koia ʼae ʼe mole hahaʼi ai ia natou ʼe fakamavae. ʼE foaki mai e Sehova ia meʼa fuli ʼe ʼaoga mai ke tou nofo agatonu.

12. Kotea ʼae ka tokoni atu anai ke ʼaua naʼa ke fai he agahala mamafa?

¹² ʼE fakaneke tatou fuli ke tou fai he ʼu  meʼa ʼe kovi ʼuhi pe ko totatou ʼuhiga agahala. (Sakp. 1:14) Kae, ʼe ke filifili pe ʼe ke tali peʼe kailoa ia te fakahala. ʼEi, ʼe ko koe ʼae ʼe ke filifili ia tou faʼahiga maʼuli. Kae, ʼe ui ia e ʼihi ʼe feala hau ako ke ke lolomi ʼou holi ʼae ʼe kovi. Pea kapau ʼe toe ha mai, ʼe mole feala ke ke fakahoko. Koia, ke ke faikole ʼi te ʼaho fuli ke ke ako tuʼumaʼu ia te Tohi-Tapu pea mo kau ki te ʼu fono. Pea palalau ki tau tui ki ʼihi. Ka ke fai feia, pea ʼe ke maʼu anai te malohi moʼo fakahoko tau fakapapau. ʼAua naʼa galo kia koe ʼe tokoni atu anai ia Sehova ki te fahaʼi ʼaia.​—Kal. 5:16.

13. Kotea te faʼifaʼitaki lelei neʼe tuku mai e Sosefo?

¹³ ʼE faigafua anai kia koe hau fakahoko tau fakapapau mo kapau ʼe ke iloʼi fakatomuʼa pe kotea ka ke fai moka fakahalaʼi koe. Tokolahi ia natou ʼi te Tohi-Tapu neʼe natou toe fai te faʼahi ʼaia, logo foki la neʼe natou toe agahala pe mo natou. Tou talanoa kia Sosefo. Neʼe faiga tuʼa lahi ia te ʼohoana ʼo Potifale ke ina fakahalaʼi kae neʼe kua ina iloʼi te meʼa ʼae ʼe tonu ke ina fai. ʼE ui mai ʼi te Tohi-Tapu neʼe “fakafisi” ki ʼona fakaneke pea neʼe ina ui age ki ai: “ ʼE lava feafeaʼi haku fai te toe agakovi lahi ʼaia pea mo agahala moʼoni ki te ʼAtua?” (Sen. 39:8-10) ʼE mahino ia, neʼe kua iloʼi e Sosefo te meʼa ʼae ka ina fai ʼi muʼa ʼo tona fakahalaʼi e te ʼohoana ʼo Potifale. Neʼe tokoni ai ki ai ke ina fai te tonu ʼae ʼe lelei moka fakahalaʼi.

14. Kotea ʼae ʼe tokoni mai anai ke tou liʼaki te ʼu meʼa ʼae ʼe kovi?

¹⁴ ʼE feafeaʼi hau toe faʼifaʼitakiʼi ia Sosefo? ʼAki hau filifili ʼi te temi nei pe kotea ka ke fai moka fakahalaʼi koe. Ke ke ako ke ke foimo liʼaki ia te ʼu meʼa ʼae ʼe fehiʼa ki ai ia Sehova pea mo faiga ke ʼaua naʼa ke manatu ki te ʼu fahaʼi ʼaia. (Pes. 97:10; 119:165) Kapau ʼe ke fai feia, ʼe mole ke lotolotolua anai moka fakahalaʼi koe. ʼE ke iloʼi anai pe kotea ʼae ʼe tonu ke ke fai ʼo feia pe mo te aga ʼae ʼe tonu ke ke mau.

15. ʼE fakaha feafeaʼi e he tahi ʼe ina “kumi fakamalotoloto ia” Sehova? (Hepeleo 11:6)

¹⁵ ʼE feafeaʼi kia koe? Kotea ʼe ina taʼofi koe ke ke foaki tou maʼuli kia Sehova pea mo papitema, kae kua ke iloʼi kua ke maʼu te moʼoni pea mo ke fia tauhi kia te ia mo tou loto katoa? Kapau koia, muliʼi te faʼifaʼitaki lelei ʼa te Hau ko Tavite mo kole mamahi fenei kia Sehova: “ ʼAtua e, sivisivi au mo iloʼi toku loto. ʼEi, sivisivi au mo iloʼi ʼoku tuʼania. Vakaʼi pe ʼe mole ʼi ai he aga ʼe kovi ia au, pea mo takitaki au ʼi te ala ʼo te heʼe gata.” (Pes. 139:23, 24) ʼE tapuakiʼi  e Sehova ia natou ʼae ʼe natou “kumi fakamalotoloto ia ia.” Pea ʼe ke fakaha kia te ia ʼe ko te aluʼaga ʼaia ʼe ke fai. ʼEi, ʼe ke faiga ke ke fakahoko tau fakatuʼutuʼu ʼae ke ke foaki tou maʼuli kia te ia pea mo papitema.​—Lau ia Hepeleo 11:6.

HAGA FAKAOVI KIA SEHOVA

16-17. ʼE lava taki feafeaʼi mai e Sehova ia natou ʼae ʼe lalahi ake ʼi te moʼoni? (Soane 6:44)

¹⁶ Neʼe ui e Sesu ko Sehova ʼae ʼe ina taki mai ʼana tisipulo. (Lau ia Soane 6:44.) Neʼe kua ke fakakaukauʼi koa ia tona fakaʼuhiga kia koe? ʼE mole koa la malave kia koe te ʼu palalau ʼaia? ʼE sio ia Sehova ki te meʼa ʼae ʼe lelei ʼi he tahi moka ʼe ina taki mai kia te ia. ʼE ina fakaʼuhiga ia ia ʼaia ko hona “koloa makehe.” (Tet. 7:6) Koia, ʼe toe feia pe mo te sio ʼa Sehova kia koe.

¹⁷ ʼE lagi ko koe ko he tupulaga neʼe lahilahi ake ʼi te moʼoni. pea lagi ʼe ke manatu ʼe ke tauhi kia Sehova ʼuhi pe ʼe tauhi ʼau matuʼā kia te ia. kae mole ʼuhi neʼe taki mai koe e Sehova kia te ia. Kae ʼe ui fenei ʼi te Tohi-Tapu: “Kotou fakaovi ki te ʼAtua, pea ʼe fakaovi atu anai kia koutou.” (Sakp. 4:8; 1 Klk. 28:9) Ka ke fakatuʼutuʼu ke ke fakaovi kia Sehova, pea ʼe toe fakaovi atu anai mo ia kia koe. ʼE mole ina fakaʼuhiga koe ohage pe ʼe ke kau ki he kutuga. ʼE ina taki mai kia te ia te tagata takitokotahi. Pea ko te aluʼaga pe ʼaia ʼe ina toe fai kia natou ʼae neʼe lalahi ake ʼi te moʼoni. Koia, ka lahilahi ake he tahi ʼi te moʼoni ʼo fakatuʼutuʼu ke fakaovi kia te ia, pea ʼe fakahoko anai e Sehova te aluʼaga ʼae ʼe tuʼu ia Sakopo 4:8.​—Vakaʼi ia 2 Tesalonika 2:13.

18. Kotea ʼae ka tou vakaʼi ʼi te alatike ka hoa mai? (Pesalemo 40:8)

¹⁸ Ka ke foaki tou maʼuli kia Sehova pea mo papitema, ʼe ke maʼu ia te faʼahiga manatu ʼa Sesu. Neʼe fiafia ʼi te fai ʼo te finegalo ʼo tana Tamai. (Lau ia Pesalemo 40:8; Hep. 10:7) ʼI te alatike ka hoa mai, ʼe tou vakaʼi anai pe kotea ʼae ka tokoni atu ke ke haga tauhi agatonu kia Sehova hili tou papitema.