1. Kotea ʼae ʼe fakamoʼoni ai ko Sehova ʼe lotofoaki?

NEʼE ʼi ai te temi neʼe nofo tokotahi ai ia Sehova. Kae neʼe loto leva ia ke ina foaki te meʼa ʼofa ʼae ko te maʼuli kia natou fuli ʼae ʼe maʼuʼuli ʼi te lagi pea mo te kele. Ko Sehova ʼe ko “te ʼAtua fiafia” pea ʼe ina fia foaki te ʼu meʼa ʼae ʼe lelei. (1 Timoteo 1:11; Sakopo 1:17) Pea ʼe loto e Sehova ke tou fiafia mo tatou, koia ʼae ʼe ina akoʼi ai tatou ke tou lotofoaki.—Loma 1:20.

2, 3. (1) He koʼe ʼe tou lotofiafia moka tou lotofoaki? (2) Kotea ʼae ka tou vakaʼi ʼi te alatike ʼaeni?

² Neʼe fakatupu tatou e Sehova ki tona pāki. (Senesi 1:27) Ko tona fakaʼuhiga ʼae neʼe fakatupu tatou e Sehova ke tou maʼu ʼona kalitate. Koia kapau ʼe tou fia maʼu ia te fiafia moʼoni mo te tapuakina ʼa Sehova, ʼe tonu ke tou faʼifaʼitakiʼi ia ia. ʼE tonu ke tou tokaga ki te hahaʼi pea mo tou lotofoaki. (Filipe 2:3, 4; Sakopo 1:5) Kotea tona tupuʼaga? He neʼe ko te loto ʼaia ʼo Sehova ʼi tana fakatupu tatou. Koia tatau aipe pe ʼe tou heʼe haohaoa  kae ʼe feala ke tou faʼifaʼitakiʼi ia Sehova pea mo tou lotofoaki.

³ ʼE tou vakaʼi anai ʼi te alatike ʼaeni, he ʼu ako ʼe tou maʼu ʼi te Tohi-Tapu ʼo ʼuhiga mo te lotofoaki. ʼE tou vakaʼi anai pe koʼe ʼe fiafia ia Sehova moka tou lotofoaki. ʼE tou toe vakaʼi anai pe ʼe tokoni feafeaʼi mai te lotofoaki ke tou fakahoko ia te gaue ʼae neʼe tuku mai e Sehova, pea he koʼe ʼe tou lotofiafia mo kapau ʼe tou lotofoaki. Pea ʼe tou vakaʼi anai pe koʼe ʼe tonu ke tou lotofoaki tuʼumaʼu.

4, 5. Neʼe fakaha feafeaʼi e Sehova pea mo Sesu tanā lotofoaki? Pea he koʼe ʼe tonu ke tou faʼifaʼitakiʼi ia naua?

⁴ ʼE loto e Sehova ke tou faʼifaʼitakiʼi ia ia, koia ʼae ʼe fiafia ai moka ʼe tou lotofoaki. (Efeso 5:1) Pea ʼe loto e Sehova ke toe fiafia mo te hahaʼi. ʼE tou iloʼi te faʼahi ʼaia he neʼe ina fakatupu tatou ʼi hona aluʼaga fakaofoofo. Neʼe ina fakatupu ia te kele ke matalelei pea ke tou fiafia ʼi te ʼu meʼa fuli ʼae ʼe maʼu ai. (Pesalemo 104:24; 139:13-16) Koia ka tou faigaʼi ke tou fakafiafia ia te hahaʼi, ʼe tou vikiʼi ai ia Sehova.

⁵ ʼE tou toe faʼifaʼitakiʼi foki mo Sesu, he neʼe ina tuku mai ia te faʼifaʼitaki lelei tukupau ʼo ʼuhiga mo te lotofoaki. Neʼe ina ui fenei: “Ko te Foha ʼo te tagata, neʼe mole haʼu ia ke tauhi ia ia, kaʼe ke ina tauhi te hahaʼi pea mo foaki tona maʼuli ko he totogi maʼa te tokolahi.” (Mateo 20:28) Pea ko te apositolo ko Paulo neʼe ina fakalotomalohiʼi fenei ia te kau Kilisitiano: “Kotou taupau te faʼahiga manatu ʼae neʼe toe maʼu e Kilisito Sesu . . . Neʼe ina tuku ia meʼa fuli ʼae neʼe ina maʼu pea neʼe liliu ai ohage ko he kaugana.” (Filipe 2:5, 7) Koia ʼe lelei ke tou fai ia te fehuʼi ʼaeni: ‘ ʼE feala koa ke au faʼifaʼitakiʼi lelei age ia Sesu?’—Lau ia 1 Petelo 2:21.

6. Kotea ʼae neʼe fia akoʼi mai e Sesu ʼaki te hisitolia ʼo te tagata Samalitana agalelei? (Vakaʼi te ʼuluaki pāki.)

⁶ ʼE fiafia ia Sehova moka ʼe tou faʼifaʼitakiʼi ia ia mo Sesu. Pea ʼe tou fai te faʼahi ʼaia, mo kapau ʼe tou tokagaʼi te hahaʼi mo tou toʼo te ʼu faigamalie fuli ke tou tokoni kia natou. Neʼe fakaha e Sesu ia te maʼuhiga ʼo te faʼahi ʼaia ʼi tana fakamatala ia te hisitolia ʼo te tagata Samalitana agalelei. (Lau ia Luka 10:29-37.) Neʼe ina akoʼi ki ʼana tisipulo ʼe tonu ke natou tokoni ki ʼihi tatau aipe pe ʼe ko ai ia natou mo te fenua ʼae ʼe natou ʼomai mai ai. ʼE kotou manatuʼi pe koʼe neʼe fakamatala e Sesu ia te hisitolia ʼaia? Koteʼuhi neʼe fehuʼi fenei age e te tagata Sutea ki ai: “Ko ai moʼoni koa toku tatau?” Koʼeni te ako ʼe tou maʼu mai te tali ʼae neʼe fai e Sesu: kapau ʼe tou fia fakafiafiaʼi te loto ʼo Sehova, ʼe tonu ke tou lotofoaki ohage ko te tagata Samalitana.

7. ʼE feafeaʼi hatatou fakaha ʼe ko te faʼahiga fai ʼo meʼa fuli e Sehova ʼe lelei tukupau? Fakamahino.

⁷ ʼE ʼi ai te tahi tupuʼaga ke tou lotofoaki ai pea ʼe tou mahino ki ai ʼi te aluʼaga ʼae neʼe hoko ʼi te ʼoloto ʼo Eteni. Neʼe ui e Satana ʼe fiafia age anai ia Atama mo Eva mo kapau ʼe nā talagataʼa kia Sehova mo manatu pe kia naua totonu. Ko Eva, neʼe manatu pe kia ia totonu, he neʼe fia tatau mo te ʼAtua. Ko Atama, neʼe manatu pe kia ia totonu, he neʼe ina fia fakafiafiaʼi ia Eva ʼo lahi age ʼi te ʼAtua. (Senesi 3:4-6) Neʼe iku te ʼu aluʼaga ʼaia ki te malaʼia. ʼE ha mai ai, ʼe mole feala ki he tahi ke fiafia mo kapau ʼe manatu pe kia ia totonu. Kae kapau ʼe tou lotomanavaʼofa mo lotofoaki, ʼe tou fakaha ai ʼe tou tui papau ko te faʼahiga fai ʼo meʼa fuli e Sehova ʼe lelei tukupau.

8. He koʼe neʼe mole tonu ke manatu pe ia Atama mo Eva kia naua?

⁸ Logo la neʼe nonofo ʼateaina pe ia Atama mo Eva ʼi te ʼoloto ʼo Eteni, kae neʼe mole tonu ke nā manatu pe kia naua. Kotea tona tupuʼaga? Neʼe tuku age e Sehova kia naua ia te gaue ke nā fakahoko. Neʼe ina ui kia naua ke nā fakahahaʼi ia te kele katoa ʼaki ʼanā fanau pea ke nā fakaliliu te kele ko he palatiso. (Senesi 1:28) Neʼe loto e Sehova ke maʼuli fiafia te fanau ʼa Atama mo Eva, koia ʼae neʼe tonu ai ke nā manatu ki tonatou maʼuli fiafia. Neʼe feala pe ke natou gaue fakatahi ki te fakaliliu ʼo te kele katoa ko he palatiso. Neʼe ko he toe gaue fakaofoofo ia.

9. He koʼe neʼe feala ke fiafia te hahaʼi ʼi tanatou fakaliliu ʼae ia te kele ko he palatiso?

⁹ Neʼe tonu foki ki te hahaʼi haohaoa ke natou gaue fakatahi mo Sehova, ke natou fakaliliu ia te kele ko he palatiso pea ke natou fakahoko ia tona finegalo. Kapau neʼe natou fai feia, neʼe feala ai ke natou ulu ki tona malolo. (Hepeleo 4:11) Kotou fakakaukauʼi age muʼa ia te toe gaue fakafiafia ʼaia neʼe tonu ke natou fai. Neʼe feala pe ke tapuakiʼi natou e Sehova moka neʼe mole natou manatu pe kia natou, kae natou tokakaga ki ʼihi.

10, 11. Kotea ʼae ka tokoni mai anai ke tou faifakamafola pea mo fai ni tisipulo?

¹⁰ Ia ʼaho nei, neʼe toe foaki mai e Sehova ia te gaue makehe ke tou fakahoko. ʼE loto ia ke tou fakamafola te logo lelei pea ke tou fai ni tisipulo. Ke tou fakahoko ia te gaue  ʼaia, ʼe tonu ke tou tokakaga moʼoni ki te hahaʼi. ʼI tona fakahagatonu, ʼe mole feala ke tou fakahoko ia te gaue ʼaia, mo kapau ʼe mole tou ʼoʼofa ia Sehova mo te hahaʼi.

¹¹ Neʼe ui e Paulo ko ia pea mo ʼihi Kilisitiano ʼo te temi muʼa neʼe natou “kaugā gaue mo te ʼAtua,” koteʼuhi neʼe natou fakamafola mo akoʼi te moʼoni ki te hahaʼi. (1 Kolonito 3:6, 9) Ia ʼaho nei, ʼe toe feala mo tatou ke tou “kaugā gaue mo te ʼAtua,” ʼaki tatatou fakaʼaogaʼi lahi totatou temi, totatou malohi pea mo ʼotatou koloa ki te gaue faifakamafola ʼae neʼe tuku mai e te ʼAtua kia tatou. ʼE ko he toe pilivilesio ia.

12, 13. Kotea la te ʼu fiafia ʼo te fai ʼo ni tisipulo?

¹² Ka tou fakaʼaogaʼi lahi totatou temi mo totatou malohi ki te gaue faifakamafola pea mo fai ni tisipulo, ʼe tou fiafia lahi ai. ʼE fakamoʼoni ki ai te ʼu tehina mo tuagaʼane ʼae ʼe natou takitaki hanatou ʼu ako Tohi-Tapu. ʼE tou fiafia moka fiafia ʼatatou kau ako ʼi tanatou mahino ki te ʼu faʼahi ʼae ʼe feala ke tou ako ʼaki te Tohi-Tapu, moka natou maʼu he tui ʼe malohi, moka fetogi ʼonatou maʼuli pea moka natou kamata fakaha ki ʼihi ia te ʼu faʼahi ʼae ʼe natou ako. Neʼe fiafia mo Sesu he neʼe toe “liliu fiafia” mai ia te toko 70 kau faifakamafola ʼuhi ko te ʼu aluʼaga ʼae neʼe hoko ʼi tanatou faifakamafola.—Luka 10:17-21.

¹³ ʼE toe fiafia mo ʼotatou tehina mo tuagaʼane ʼi te malamanei katoa, ʼi tanatou sisio ki te fetogi ʼo te maʼuli ʼo te hahaʼi ʼuhi ko te logo lelei. Ohage la, ko te tuagaʼane selipatea ʼe higoa ko Anna, neʼe ina fia fakalahi tana gaue ʼae kia Sehova. * (Vakaʼi te kiʼi nota.) Neʼe alu ai ki he fenua ʼi Eulopa ʼe mole hahaʼi ai te kau fakamoʼoni ʼa Sehova. Neʼe ina tohi fenei: “ ʼE kaugā malie natou ʼae ʼe fia ako ia te Tohi-Tapu pea ʼe au fiafia ai. ʼE lahi toku fiafia ʼi taku faifakamafola. Pea ka au toe liliu ki fale, ʼe mole au maʼu he temi ke au manatu pe kia au totonu. ʼE au manatu tuʼumaʼu pe ki ʼaku kau ako, ki ʼonatou fihifihia pea mo ʼonatou tuʼania. Pea ʼe au kumi pe ʼe feafeaʼi anai haku fakalotomalohiʼi mo foaki kia natou ia he tokoni. Pea ʼe au tui papau ‘ ʼe lahi age te fiafia moka kita foaki, ʼi takita tali.’ ”—Gaue 20:35.

14. ʼE feafeaʼi hatatou fiafia logo la te mole fia fakalogo ʼa te hahaʼi?

¹⁴ Tatau aipe pe ʼe mole fakalogo mai te hahaʼi moka tou faifakamafola, kae ʼe tou fiafia he ʼe ko te faigamalie ʼaia ke natou logo ki te logo lelei. ʼE loto e Sehova ke tou fai te meʼa ʼae neʼe ina kole ke fai e Esekiele: “E ke fakaha anai kia natou aku folafola, pe e natou fakalogo pe e mole natou fakalogo.” (Esekiele 2:7; Esaia 43:10) Koia tatau aipe pe ʼe tali e te hahaʼi tatatou gaue peʼe kailoa, kae ʼe maʼuhiga kia Sehova ʼatatou faiga. (Lau ia Hepeleo 6:10.) Neʼe ui fenei e te tehina ʼo ʼuhiga mo tana faifakamafola: “ ʼE tou to, mo fakavai pea mo faikole kia Sehova ke ina fakatuputupu te fia logo ʼa te hahaʼi.”—1 Kolonito 3:6.

15. ʼE tonu koa ke tou lotofoaki ʼuhi pe he ʼe lotofakafetaʼi mai he tahi? Fakamahino.

¹⁵ ʼE loto e Sesu ke tou lotofoaki he ʼe tou fiafia ai. Ka tou lotofoaki ki he tahi, pea ʼe toe lotofoaki mai anai ia te tokolahi. Koia neʼe ina fakalotomalohiʼi fenei tatou: “Kotou haga foaki, pea ʼe foaki atu anai e te hahaʼi kia koutou. ʼE natou huaʼi anai ki ʼakotou taga he fua ʼe lahi, ʼe lulu anai, mo lomi pea ʼe fonu gutugutu anai. He ʼe fakafuafua anai koutou ʼo mulimuli ki takotou faʼahiga fakafuafua.” (Luka 6:38) ʼE moʼoni ka tou lotofoaki, ʼe mole ko te hahaʼi fuli ʼae ʼe lotofakafetaʼi. Kae tatau aipe pe ʼe mole natou lotofakafetaʼi, kae tou hoko atu aipe tatatou lotofoaki. ʼE mole tou iloʼi pe ʼe fua lelei feafeaʼi anai ki he tahi mo kapau ʼe tou lotofoaki.

16. Ko ai ʼae ʼe tonu ke tou lotofoaki ki ai, pea kotea tona tupuʼaga?

¹⁶ Ko ia ʼae ʼe lotofoaki moʼoni ʼe mole ina foaki pea mo ina fakaʼamu ke toe liufaki mai. Neʼe ui fenei e Sesu: “Ka ke fai he kaitahi, fakaafe te kau masisiva, mo te kau maʼimoa, mo te ʼu ketu pea mo te kau kivi. Pea ʼe ke fiafia ai anai, koteʼuhi ʼe mole feala ke natou liufaki atu.” (Luka 14:13, 14) ʼE toe ui fenei ʼi te Tohi-Tapu: “E manuia anai te tagata manavaofa,” pea ʼe “Manuia ae e tokaga ki te masiva!” (Taaga Lea 22:9; Pesalemo 41:2) ʼE tonu ke tou lotofoaki ʼuhi he ʼe tou fia tokoni moʼoni ki ʼihi.

17. Kotea he ʼu aluʼaga ʼe tou maʼu ai ia te fiafia?

¹⁷ Neʼe toe fakaʼaogaʼi e Paulo ia te ʼu palalau ʼae neʼe fai e Sesu ʼi tana ui ʼae “e lahi age te fiafia moka kita foaki, ʼi takita tali.” Neʼe mole fia palalau ia Paulo ʼo ʼuhiga pe mo te ʼu koloa fakamalama. He ʼe feala pe ke tou toe foaki ki te hahaʼi he ʼu fakalotomalohi peʼe ko he ʼu tokoni ʼe maʼu ʼi te Tohi-Tapu peʼe ko he gaue ʼe tou fai maʼa natou. (Gaue 20:31-35) Pea kapau ʼe tou tokagaʼi ia te ʼu  palalau ʼae neʼe fai e Paulo pea mo ʼana gaue, ʼe tou mahino ai ʼe tonu ke tou foaki lahi totatou temi, totatou malohi pea mo totatou ʼofa.

18. Kotea ʼae neʼe tokagaʼi e te kau popoto moka tou lotofoaki?

¹⁸ Neʼe tokagaʼi e te kau popoto ʼae ʼe natou sivi ia te aga ʼa te hahaʼi, ʼe tou fiafia moka ʼe tou lotofoaki. Pea neʼe natou toe ui, ka fai e te hahaʼi he meʼa ʼe lelei ki ʼihi ʼe natou logoʼi ai he fiafia lahi. Neʼe toe ui e te kau popoto, kapau ʼe tou tokoni ki ʼihi, pea ʼe tou maʼu ai ia he fakatuʼutuʼu mo he ʼuhiga moʼoni ʼo totatou maʼuli. Koia ʼe ui ai e ʼihi kau popoto, ko te hahaʼi ʼae ʼe gaue kae mole totogi ʼe lelei age tonatou maʼuli malolo pea mo natou fiafia. ʼE moʼoni, ʼe mole tou punamaʼuli tatou ki ai koteʼuhi ko totatou Tupuʼaga ʼofa, ia Sehova, neʼe ina ui tuʼumaʼu pe ko te lotofoaki ʼe ina fakatupu ia te lotofiafia.—2 Timoteo 3:16, 17.

19, 20. He koʼe ʼe tou fia lotofoaki?

¹⁹ ʼE faigataʼa tatatou lotofoaki tuʼumaʼu tafito la mo kapau ʼe tou tokagaʼi ia te hahaʼi ʼae ʼe natou manatu pe kia natou totonu. Neʼe fakamanatuʼi mai e Sesu ia te ʼu fakatotonu ʼe lua pea mo lahi age, ko te ʼofa kia Sehova ʼaki totatou loto katoa, mo totatou maʼuli katoa, mo totatou malohi katoa, mo totatou ʼatamai katoa pea mo totatou ʼofa ʼae ki ʼotatou tatau ohage pe ko tatatou ʼofa kia tatou totonu. (Maleko 12:28-31) Neʼe tou vakaʼi ʼi te alatike ʼaeni, ko natou ʼae ʼe ʼoʼofa kia Sehova ʼe natou faʼifaʼitakiʼi ia ia. Ko Sehova mo Sesu ʼe nā lotofoaki. ʼE nā fakalotomalohiʼi tatou ke tou faʼifaʼitakiʼi ia naua he ʼe nā iloʼi ʼe tou fiafia moʼoni ai anai. Kapau ʼe tou lotofoaki ʼaki te ʼu gaue ʼae ʼe tou fakahoko maʼa te ʼAtua pea mo ʼotatou tatau, ʼe tou fakamaʼuhigaʼi ai ia Sehova pea ʼe fua lelei anai kia tatou pea mo ʼihi atu.

²⁰ ʼE mahino papau ia, kua tou fai ia meʼa fuli ke tou lotofoaki pea mo tokoni ki ʼihi kae tafito ki ʼotatou tehina mo tuagaʼane. (Kalate 6:10) Kapau ʼe tou haga fai feia, ʼe lotofakafetaʼi anai te hahaʼi mo ʼoʼofa ia tatou pea ʼe tou fiafia anai. ʼE ui fenei ʼi te Tohi-Tapu: “Ko te laumalie ae e manavaofa e makona anai, pea ko ae e fakavai e toe fakavai anai ia ia totonu.” (Taaga Lea 11:25) ʼE ʼi ai te tahi ʼu aluʼaga ʼi totatou maʼuli peʼe ko te faifakamafola, ʼe feala ke tou fakaha ai ʼe mole tou manatu pe kia tatou totonu kae ʼe tou agaʼofa mo lotofoaki. Koia, ʼe tou palalau anai ki te ʼu aluʼaga ʼaia ʼi te alatike ʼae ka hoa mai.