ʼE ʼAOGA ke toe lahi age tatatou kataki fualoa, koteʼuhi kua ʼasili faigataʼa te maʼuli ʼi “te ʼu ʼaho fakamuli” ʼaeni. (2 Timoteo 3:1-5) ʼE kaugā malie te hahaʼi ʼae ʼe mole natou maʼu te kataki fualoa. ʼE natou manatu pe kia natou totonu, ʼe mole natou maʼuli felogoi, pea ʼe mole natou lotololomi. Koia ʼe ʼaoga ai ke tou fai te ʼu fehuʼi ʼaeni: ‘ ʼE au hage koa ko te hahaʼi ʼaia ʼo mole au kataki fualoa? Kotea te fakaʼuhiga ʼo te kataki fualoa? Kotea ʼae ʼe feala ke au fai ke au maʼu te kalitate ʼaia ʼi toku ʼuluagaaga?’

Kotea te fakaʼuhiga ʼo “te kataki fualoa” ʼi te Tohi-Tapu? ʼE mole gata ʼaki pe tatatou tauʼi he fihifihia. Ko he tahi ʼe kataki fualoa, ʼe ina katakiʼi he aluʼaga ʼaki te ʼamanaki ʼae ʼe toe lelei anai te aluʼaga ʼaia. ʼE mole manatu pe kia ia totonu, kae ʼe tokaga ki te ʼu meʼa ʼae ʼe logoʼi e ʼihi, maʼia mo natou ʼae ʼe lagi ita ai peʼe natou gaohi koviʼi ia ia. ʼE ina maʼu te ʼamanaki ʼae ʼe toe lelei anai ʼanatou felogoi. Koia ʼe mole tou punamaʼuli ai ki te ui ʼae ʼi te Tohi-Tapu ko te kataki fualoa ʼe tupu mai te ʼofa. * (Vakaʼi te kiʼi nota.) (1 Kolonito 13:4) Pea ʼe toe kau foki ia te kataki fualoa ki “te fua ʼo te laumalie.” (Kalate 5:22, 23) Kae, kotea ʼe tonu ke tou fai ke tou maʼu ia te kataki fualoa?

Ke feala hatatou maʼu te kataki fualoa, ʼe ʼaoga ke tou kole kia Sehova ke tokoni mai ʼaki tona laumalie, ʼae ʼe ina foaki kia natou ʼe falala kia te ia. (Luka 11:13) ʼE malohi ʼaupito tona laumalie, kae ʼe toe ʼaoga foki ke tou fakaalu tahi ʼatatou gaue mo ʼatatou faikole. (Pesalemo 86:10, 11) Ko tona fakaʼuhiga, ʼe tonu ke tou faiga malohi ʼi te ʼaho fuli ke tou maʼu te kataki fualoa ʼi totatou ʼuluagaaga. Kae ʼi ʼihi temi ʼe feala pe ke mole tou lavaʼi te faʼahi ʼaia. Kotea ʼae ʼe lava tokoni mai?

ʼE ʼaoga ke tou ako mo tou mulimuli ki te faʼifaʼitaki haohaoa ʼa Sesu. ʼI te palalau ʼa te apositolo ko Paulo ʼo ʼuhiga mo “te ʼulugaaga foʼou,” ʼae ʼe kau ai te kataki fualoa, neʼe ina fakalotomalohiʼi fenei tatou: “Ke pule ʼi ʼokotou loto te tokalelei ʼo Kilisito.” (Kolose 3:10, 12, 15) Ke feala hatatou fai te faʼahi ʼaia, ʼe tonu ke tou muliʼi te faʼifaʼitaki ʼo Sesu mo tou tui papau ʼe fakatokatoka anai e te ʼAtua ia te ʼu fihifihia ʼi tona temi totonu. Kapau ʼe tou maʼu ia te taʼi falala ʼaia, ʼe mole feala anai ke puli tatatou kataki fualoa tatau aipe pe kotea he aluʼaga ʼe feala ke hoko mai.—Soane 14:27; 16:33.

Kua tou fakaʼamu la ke tou maʼuʼuli ʼi te malama foʼou. Kae ʼe feala ke tou ako ke tou maʼu te kataki fualoa mo kapau ʼe tou fakakaukauʼi te kataki fualoa ʼa Sehova kia tatou. Pea ʼe fakapapau fenei mai ʼi te Tohi-Tapu: “ ʼE mole tuai ia Sehova ʼo ʼuhiga mo tana fakapapau, ohage ko te manatu ʼa ʼihi, kaʼe ʼe kataki fualoa kia koutou he ʼe mole loto ia ke fakaʼauha he tahi, kaʼe ʼe loto ia ke kaku te hahaʼi fuli ki te fakahemala.” (2 Petelo 3:9) Koia ka tou fakakaukauʼi te kataki fualoa ʼa Sehova kia tatou, ʼe uga ai tatou ke toe lahi age tatatou kataki fualoa ki ʼihi. (Loma 2:4) Tou vakaʼi he ʼu aluʼaga ʼe ʼaoga ai ke tou maʼu te kataki fualoa.

ʼI te ʼaho fuli pe, ʼe lahi te ʼu aluʼaga ʼe ʼaoga ai ke tou maʼu te kataki fualoa. Ohage la, ʼe lagi ke manatu ʼe maʼuhiga te meʼa ʼae ʼe ke fia palalau ki ai, kae ʼe ʼaoga ke ke kataki fualoa ke mole ke motuhi te faipalalau ʼa ʼihi. (Sakopo 1:19) ʼE toe ʼaoga foki ke ke kataki fualoa ki he tahi ʼe fakatupu ita atu. Pea ʼe lelei ke tou manatuʼi pe ʼe feafeaʼi te sio ʼa Sehova mo Sesu ki ʼotatou vaivaiʼaga, kae ʼaua tatatou iita. ʼE mole nā tokagaʼi te ʼu kiʼi hala ʼae ʼe tou fai. Kae ʼe nā tokagaʼi tafito ʼotatou kalitate pea ʼe nā tuku mai he faigamalie ke tou hikihiki totatou ʼuluagaaga.—1 Timoteo 1:16; 1 Petelo 3:12.

Moka ui mai e he tahi ʼe mole lelei te meʼa ʼae neʼe tou ui pe neʼe tou fai, ʼe toe ʼaoga ai foki ke tou kataki fualoa. ʼI te kamata, ʼe lagi tou iita pea mo tou kumi takuʼaki. Kae ʼe fakalotomalohiʼi fenei tatou ʼi te Folafola ʼa te ʼAtua: “E lelei age he loto kataki i he loto fiamealahi. Aua naa ke ita vave i tou loto, koteuhi e nofo te ita i te fatafata o te kau vale.” (Ekelesiasi 7:8, 9) Koia tatau aipe pe ʼe hala totatou tukugakoviʼi, kae ʼe ʼaoga ke tou kataki fualoa mo tou fakakaukau ʼi muʼa ʼo hatatou palalau. Neʼe fai te faʼahi ʼaia e Sesu ʼi te temi ʼae neʼe tukugakoviʼi hala ai e ʼihi.—Mateo 11:19.

ʼE ʼaoga tafito ki te ʼu matuʼā ke natou kataki fualoa. Ohage la, mo kapau ʼe tonu ke natou fakatonutonuʼi ʼanatou fanau ʼuhi ko ʼanatou aga peʼe ko ʼonatou holi ʼae ʼe kovi. Tou vakaʼi te faʼifaʼitaki ʼa Mattias, ʼe gaue ʼi te Petele ʼi Scandinavie. ʼI tana kei tupulaga, neʼe vaʼi tuʼumaʼu e ʼona kaugā ako ʼuhi ko te ʼu akonaki ʼae neʼe tui ki ai. ʼI te kamata, neʼe mole iloʼi e ʼana matuʼā ia te aluʼaga ʼaia. Kae neʼe nā tokagaʼi leva ia tana kamata lotolotolua ʼo ʼuhiga mo tana tui. ʼE ui e Gillis, te tamai ʼa Mattias, neʼe ʼaoga kia ia mo tona ʼohoana ia te kataki fualoa ʼi te aluʼaga ʼaia. Koteʼuhi neʼe fai e Mattias ia te ʼu fehuʼi ʼaeni: “Ko ai te ʼAtua? ʼE feafeaʼi age la mo kapau ko te Tohi-Tapu ʼe mole ko te Folafola ʼa te ʼAtua? ʼE tou iloʼi feafeaʼi ko te ʼAtua ʼae ʼe ina kole moʼoni mai ke tou fai te meʼa ʼae peʼe ko ʼae?” Neʼe ina toe fehuʼi fenei ki tana tamai: “He koʼe ʼe fakamauʼi anai au mo kapau ʼe mole tatau tata tui?”

ʼE fakamahino fenei e Gillis: “ ʼI ʼihi temi, neʼe fai mai e tamā tama ʼana fehuʼi kae ita. Neʼe mole ita mai kia au peʼe ko tana faʼe, kae ki te moʼoni, he ʼe ʼi tana manatu ko te tupuʼaga la ʼaia ʼo te faigataʼa ʼo tona maʼuli.” Neʼe tokoni feafeaʼi ia Gillis ki tona foha?  ʼE ina ui fenei: “Neʼe ma faipalalau lolotoga ni hola.” Ko te meʼa ʼae neʼe tau fai e Gillis ko te fagono kia Mattias pea mo faifehuʼi ki ai ke mahino ki te ʼu meʼa ʼae ʼe ina logoʼi mo ʼana manatu. ʼI ʼihi temi ʼi muʼa ʼo hanā faipalalau, neʼe fakamahino e Gillis he aluʼaga ki tona foha pea ina ui age ke ina fakakaukauʼi te faʼahi ʼaia ʼi he ʼaho ʼe tahi peʼe lua. Pea ʼi ʼihi temi, ʼe ui e Gillis ʼe tonu muʼa ke ina fakakaukauʼi te ʼu meʼa ʼae neʼe ui age e tona foha. ʼAki taku faipalalau tuʼumaʼu mo Mattias, neʼe kamata mahino ai ki te fakaʼuhiga ʼo te sakilifisio ʼa Kilisito, mo te pule faʼitaliha ʼa Sehova pea mo tona ʼofa ʼae kia tatou. ʼE ui fenei e te tamai: “Neʼe mole faigafua pea neʼe ʼaoga he temi loaloaga, kae mamalie pe neʼe tuputupu tona ʼofa ʼae kia Sehova ʼi tona loto. ʼE ma fiafia ʼaupito mo toku ʼohoana he neʼe ma faiga ʼaki he kataki fualoa ke ma tokoni ki tamā tama ʼi tana kei tupulaga. Neʼe mole vaʼiganoa ʼama faiga he neʼe malave ki tona loto.”

ʼI te temi ʼae neʼe tokoni ai ia Gillis mo tona ʼohoana ki tanā tama, neʼe nā falala ki te lagolago ʼa Sehova. ʼE ui fenei e Gillis: “Neʼe au tau ui kia Mattias, neʼe ma faikole tuʼumaʼu mo tana faʼe ke tokoni age ia Sehova ki ai ke mahino ki te moʼoni ʼuhi ko tamā ʼofa mamahi ʼae kia ia.” Ko te ʼu matuʼā ʼaia neʼe fiafia ʼaupito he neʼe nā kataki fualoa pea neʼe mole he temi neʼe nā tuku ai ʼanā faiga.

Ka tou tokaga ki he tahi ʼo totatou famili peʼe ko he kaumeʼa kua tau fualoa mo he mahaki, ʼe ʼaoga ke tou maʼu te kataki fualoa. Tou vakaʼi te faʼifaʼitaki ʼo Ellen * (vakaʼi te kiʼi nota), ʼae ʼe toe maʼuli pe ʼi Scandinavie.

Neʼe pa tuʼa lua te ua ʼi te ʼuto ʼo te ʼohoana ʼo Ellen kua hili ki ai teitei taʼu ʼe valu. Koia ʼae ʼe mole kei feala ai ke ina logoʼi te fiafia, te lotomamahi peʼe ko te manavaʼofa. ʼE faigataʼa ʼaupito te aluʼaga ʼaia kia Ellen. ʼE ina ui fenei: “ ʼE tonu ke lahi taku kataki fualoa mo ʼaku faikole.” ʼE ina toe ui: “Ko te vaega ʼae ʼe ina fakalotofimalieʼi au ko Filipe 4:13, ʼae ʼe ui ai: ‘ ʼE au maʼu te malohi kia meʼa fuli ʼuhi ko ia ʼae ʼe ina foaki mai te malohi.’ ” ʼE ina katakiʼi te aluʼaga ʼaia ʼaki te malohi pea mo te lagolago ʼa Sehova.—Pesalemo 62:6, 7.

ʼEi, ko te faʼifaʼitaki ʼae ʼe lelei tukupau ʼo ʼuhiga mo te kataki fualoa, ʼe ko Sehova totonu. (2 Petelo 3:15) ʼI te Tohi-Tapu, ʼe lahi te ʼu aluʼaga ʼe kataki fualoa ai ia Sehova. (Neemia 9:30; Esaia 30:18) ʼE lagi ke manatuʼi pe neʼe feafeaʼi ia Sehova ʼi te faifehuʼi tuʼa lahi age ʼa Apalahamo ʼo ʼuhiga mo Tana tonu ʼae ke ina maumauʼi ia Sotoma? Neʼe mole taʼofi e Sehova te palalau ʼa Apalahamo. ʼAki he kataki fualoa neʼe fagono ki te ʼu fehuʼi takitahi ʼa Apalahamo pea mo tana talanoa ki ʼana tuʼania. Pea neʼe ina loto ke iloʼi e Apalahamo neʼe fagono lelei kia ia ʼi tana fakaha age ʼona tuʼania. Neʼe ina toe fakapapau age foki ʼe mole Ina maumauʼi anai ia Sotoma mo kapau ʼe maʼu pe he toko hogofulu kau agatonu ʼi te kolo ʼaia. (Senesi 18:22-33) ʼE fagono tuʼumaʼu ia Sehova ʼaki he kataki fualoa, pea ʼe mole he temi ʼe puli ai tona lotololomi.

Ko te kataki fualoa ʼe ko he kalitate maʼuhiga ʼo te ʼuluagaaga foʼou ʼae ʼe tonu ke kofuʼi e te kau Kilisitiano fuli. Kapau ʼe tou faiga malohi ke tou maʼu te kalitate ʼaia, ʼe tou fakamaʼuhigaʼi ai tatatou Tamai ʼofa mo kataki fualoa, ia Sehova, pea ʼe tou kau anai ia natou ʼae ʼe “natou maʼu te ʼu fakapapau, ʼuhi ko tanatou tui pea mo tanatou kataki fualoa.”—Hepeleo 6:10-12.